(006SV)
ချင်းပြည်နယ်၊ ကန်ပက်လက်မြို့နယ်၊ တိုက်နယ်အမှတ် (၅) အတွင်းက ကျေးရွာများတွင် တစ်ရွာလျှင် ၅ ဦးနှုန်းဖြင့် စစ်မှုထမ်းရန် CDF – ကန်ပက်လက်က ခေါ်ယူစုဆောင်းနေကြောင်း ကန်ပက်လက်မြို့နယ်၊ အမှတ် ၅ ပြည်သူလူထုက စက်တင်ဘာလ ၁ ရက်မှာ ထုတ်ပြန်သည်။
ကန်ပက်လက်တိုက်နယ် အမှတ် (၅) က ကျေးရွာများတွင် လူငယ်၊ လူလတ်ပိုင်းများကို CDF- ကန်ပက်လက်မှ စစ်မှုထမ်းရန် အမိန့်ပေးပြီး လက်နက်ဖြင့် ခြိမ်းခြောက်အနိုင်ကျင့်ကာ စစ်မှုမထမ်းမနေရစနစ်ကို ကျင့်သုံးလျက် အဓမ္မစုဆောင်းနေသည်ကို တွေ့ရှိရသည်ဟု အမှတ် (၅) ဒေသခံများ၏ ထုတ်ပြန်ချက်တွင် ဖော်ပြထားသည်။
ဩဂုတ်လ ဒုတိယပတ်အတွင်း မကြားကျေးရွာမှ လူငယ် ၃ ဦး၊ တုံငယ်ကျေရွာမှ လူငယ် ၂ ဦး၊ ခါပန်းကျေးရွာမှ လူငယ် ၆ ဦးတို့ကို စစ်မှုထမ်းစေရန် အာရက္ခတပ်တော် (AA) သင်တန်းကျောင်းသို့ ခေါ်ဆောင်သွားခဲ့ကြသည်ဟု ထုတ်ပြန်သည်။
ပြည်သူလူထု၏ သဘောဆန္ဒမပါဘဲ အဓမ္မ စစ်မှုထမ်းစေခြင်း၊ လူ့အခွင့်အရေး ချိုးဖောက်ခြင်းများ ဆက်လက်လုပ်ဆောင်ပါက နောက်ဆက်တွဲ ဖြစ်ပေါ်လာနိုင်သည့် ပြသနာများကို သက်ဆိုင်ရာတာဝန်ရှိသူများမှ အပြည့်အဝ တာဝန်ယူရမည်ဖြစ်ကြောင်း အမှတ် ၅ ပြည်သူလူထုက ထုတ်ပြန်လာသည်။
အမှတ် (၅) ပြည်သူလူထု၏ ထုတ်ပြန်ချက်နှင့် ပတ်သက်၍ CDF – ကန်ပက်လက် တာဝန်ရှိသူများထံ ဆက်သွယ်မေးမြန်းနေ သော်လည်း မရရှိသေးပါ။
ထို့အပြင် ကန်ပက်လက်မြို့နယ်အတွင်း အာရက္ခတပ်တော် ULA/AA က စစ်ရေးလှုပ်ရှားခြင်း၊ တပ်စခန်းချတပ်စွဲခြင်း လုံးဝ မပြုလုပ်ရန် ကန်ပက်လက်မြို့နယ်၊ ပြည်သူလူထုမှ ကန့်ကွက်ကြောင်း စက်တင်ဘာလ ၁ ရက်က သတင်းထုတ်ပြန်ထားသည်။
ကန်ပက်လက်မြို့နယ်ရှိ CDF အဖွဲ့တချို့သည် ပြည်သူများ၏ သဘောထားဆန္ဒရယူခြင်းမရှိဘဲ ULA/AA ကို ဖိတ်ခေါ်ပြီးနောက် ကန်ပက်လက်မြို့နယ်အတွင်း CDF အဖွဲ့အချင်းချင်းကြား ပဋိပက္ခဖြစ်ပေါ်လာခြင်း၊ လက်နက်ကိုင်အဖွဲ့မှ ပြည်သူကို ခြိမ်းခြောက်လာခြင်းနှင့် ဖမ်းဆီးခြင်းတို့ ပြုလုပ်နေသောကြောင့် မလိုလားအပ်သော ပြဿနာမျိုးစုံ ဖြစ်ပေါ်နေကြောင်း ထုတ်ပြန်သည်။
တချိန်တည်းတွင် ULA/ AA ၏ ညီနောင်မဟာမိတ်ပီသစွာ ချင်းပြည်လွတ်မြောက်ရေး ဆက်လက် ပေးဆပ်မှုများအပေါ် ကျေးဇူး တင်ရှိကြောင်း ကန်ပက်လက် – ပအဖနှင့် CDF ကန်ပက်လက် က ဩဂုတ်လ ၃၀ ရက် ရက်စွဲဖြင့် စက်တင်ဘာလ ၂ ရက်က ထုတ်ပြန်ထားသည်။
မဟာမိတ်ပီသနိုင်ရေးကို အလေးထားပြီး အနာဂါတ်တွင် ယခုထက် ပိုမိုကောင်းမွန်သော ချစ်ကြည်ရေး နှင့် ဆက်ဆံရေးကို တည်ဆောက်သွားမည်ဖြစ်ကြောင်း အလေးအနက်ဖော်ပြအပ်ပါသည်ဟု CDF – ကန်ပက်လက်က ထုတ်ပြန်ထားသည်။
၂၀၂၄ ဧပြီလက ချင်းညီနောင်အဖွဲ့၏ ကျင်ဒွေးမြို့သိမ်းတိုက်ပွဲတွင် CDF – ကန်ပက်လက်၏ အကူအညီ တောင်းခံမှုကြောင့် စစ်ရေးအကူအညီ၊ လူအင်အား၊ လက်နက်ခဲယမ်းများနှင့် အခြားလိုအပ်သော အကူအညီများကို ULA/AA က ပံ့ပိုးကူညီပေးခဲ့ကြောင်း သိရသည်။
ကျင်ဒွေးတိုက်ပွဲတွင် ULA/AA ရဲဘော်များ၏ အသက်နှင့် ကိုယ်လက်အင်္ဂါ ပေးဆပ်ခဲ့မှုများ ရှိခဲ့ပြီး ရဲဘော်တစ်ဦးချင်းစီ၏ ကြီးမားသော ပေးဆပ်မှုတို့အတွက် CDF ကန်ပက်လက်မှ အထူးကျေးဇူးတင်ရှိပါကြောင်း ကန်ပက်လက်ပြည်သူလူထု ကိုယ်စားဂုဏ်ပြုမှတ်တမ်းတင်အပ်ပါကြောင်း ကန်ပက်လက် ပအဖနှင့် CDF တို့က ထုတ်ပြန်သည်။
