ချင်းပြည်နယ် တီးတိန်မြ်ို့နယ် ကလေး-တီးတိန်ကားလမ်းမပေါ်က ဟိန်ဇိန် (Hriangzing) ကျေးရွာအနီးအဝိုက်မှာ စစ်ကောင်စီတပ်နဲ့ ချင်းပြည်သူ့ကာကွယ်ရေး ပူးပေါင်းတပ်ဖွဲ့တို့ တိုက်ပွဲဆက်လက်ပြင်းထန်နေပြီး စစ်ကောင်စီတပ်က လေကြောင်းအပါအဝင် ဘီးတပ်အမြောက်လက်နက်ကြီးတွေနဲ့ အပြင်းအထန် ထိုးစစ်ဆင်နေတယ်လို့ သိရပါတယ်။
စစ်ကောင်စီတပ်ဟာ ယနေ့မနက်ပိုင်း ၇ နာရီလောက်ကစပြီး ကလေးမြ်ို့တက္ကသိုလ်ကျောင်းဝင်းထဲကနေ ဘီးတပ်အမြောက်လက်နက်ကြီးတွေနဲ့ ဟိန်ဇိန်ကျေးရွာအနီးတဝိုက်ကို အနည်းဆုံး အကြိမ် ၂၀ လောက် ပစ်ခတ်ခဲ့ပြီးနောက် ရဟတ်ယာဉ် ၂ စီးနဲ့ လေကြောင်းကနေပါ တိုက်ခိုက်မှုတွေလုပ်နေတယ်လို့ PDF- Zoland ပြောရေးဆိုခွင့်ရှိသူက ပြောပါတယ်။
“ဒီနေ့မနက် ၇ ခွဲလောက်ကနေ ကလေးမြိ့တက္ကသိုလ်ကျောင်းဝင်းထဲကနေ အမြောက် ၃ လက်နဲ့ တောက်လျှောက်ထုနေတယ် အကြိမ် ၂၀ လောက်တော့ထုမယ် ၈ နာရီခွဲလောက်ကျတော့ ဟတ်စကီး ၂ စီးနဲ့ ကျနော်တို့ ရှိတယ်လို့ ထင်တဲ့နေရာတွေကို သူတို့ပတ်ပြီးတော့ လှမ်းပစ်တာပေါ့”
အင်အား ၁၀၀ ဝန်းကျင်လောက်ရှိတဲ့ စစ်ကောင်စီတပ်ဖွဲ့ဝင်တွေဟာ ဟိန်ဇိန်ကျေးရွာအနီး သိုင်းငင်ကျေးရွာအောက်နားမှာ ရှေ့ဆက်မတိုးနိုင်ပဲသောင်တင်နေပြီး သိုင်းငင်ကျေးရွာဘက်ကို ရှေ့ဆက်တိုးနိုင်ဖို့အတွက် ယခုလိုလက်နက်ကြီးနဲ့ လေကြောင်းကနေပါ ပစ်ကူနေတာဖြစ်ပါတယ်။
စစ်ကောင်စီတပ်က အမြောက်လက်နက်ကြီးနဲ့ လေကြောင်းကနေပါ ထိုးစစ်ဆင်ပစ်ကူခဲ့ပြီးနောက် ဟိန်ဇိန်ကျေးရွာအနီးမှာ သောင်တင်နေတဲ့ စစ်ကောင်စီတပ်သားတွေဟာ ရှေ့ဆက်တိုးလာနေပြီး ချင်းပြည်သူ့ကာကွယ်ရေးတပ်ဖွဲ့တွေနဲ့ မြေပြင်တိုက်ပွဲတွေ ပြင်းထန်နေဆဲလို့ သိရပါတယ်။
“၈ နာရီကျော်ကျော်မှာလေယာဉ်နဲ့လာထုတယ် အဲဒါထုပြီးပြီးချင်း သူတို့ခြေလျင်နဲ့တက်လာတယ် အခုကတောက် လျှောက်ပစ်နေတုန်းပဲ”
တချိန်ထဲမှာပဲ တီးတိန်မြို့အခြေစိုက် စစ်ကောင်စီတပ်သားတွေဟာ ဒီမနက်ပိုင်းမှာပဲ တီးတိန်မြို့ကနေ ကလေးမြို့ဘက်သို့ ဆင်းလာနေပြီး ချင်းပြည်သူ့ကာကွယ်ရေးတပ်ဖွဲ့တွေကို အရှေ့နဲ့အနောက်ကနေ ကြားညှပ်ဖိတိုက်လာနိုင်တယ်လို့ ယူဆရပါတယ်။
ဟိန်ဇိန်ကျေးရွာအနီးမှာ စခန်းချသောင်တင်နေတဲ့ စစ်ကောင်စတပ်စခန်းကို ယမန်နေ့ သန်းခေါင်းယံကျော်ကျော်လောက်က ချင်းပြည်သူ့ကာကွယ်ရေးပူးပေါင်းတပ်ဖွဲ့တွေက ဝင်ရောက်စီးနင်းတိုက်ခိုက်ခဲ့ရာမှာ စစ်ကောင်စီတပ်သား အနည်းဆုံး ၁၅ ဦး သေဆုံးခဲ့ပါတယ်။
Photo Credit: DVB
