ကလေးမြို့မှ ချင်းပြည်နယ်ဘက်သို့ တက်လာသည့် စစ်ကောင်စီတပ်ဖွဲ့များသည် မတ်လ ၁၁ ရက်နေ့ မနက် ၈ နာရီခွဲခန့်က CDF-CDM Siyin နှင့် MEDF ချင်းကာကွယ်ရေး ပူးပေါင်းတပ်ဖွဲ့က မိုင်းဆွဲတိုက်ခိုက်ကာ စစ်ကောင်စီတပ်သား ၆ ဦးပွဲချင်းသေဆုံးခဲ့ပြီး ၂၁ ဦး ဒဏ်ရာများရရှိခဲ့သည်ဟု သိရသည်။
ချင်းပြည်နယ် ဖလမ်းဘက်သို့ဦးတည်လာသော စစ်ကောင်စီတပ်ဖွဲ့သည် ယင်းနေ့တရက်တည်းတွင် မနက်ပိုင်း ၈ နာရီခွဲမှ ညနေပိုင်း ၄ နာရီအထိ (၁၀) ကြိမ်တိုင် မိုင်းဆွဲတိုက်ခိုက်ခံရပြီး စစ်ကောင်စီဘက်မှ အထိအခိုက်အသေအပျောက်များသည်ဟု Chinland Defense Force CDM Siyin မှ သတင်းထုတ်ပြန်ထားသည်။
အဆိုပါ စစ်ကောင်စီတပ်ဖွဲ့များသည် မတ်လ ၇ ရက်နှင့် ၉ ရက်နေ့က သံချပ်ကာ ၂ စီးအပါအဝင် ကားအစီး ၃၀ ကျော်ဖြင့် ကလေးမြို့မှ ချင်းတောင်ဘက်သို့ တက်လာခဲ့ကြခြင်းဖြစ်သည်။
ကလေး- တီးတိန်လမ်းမကို အများပြည်သူများ ပြန်လည်အသုံးပြုနိုင်ပြီဖြစ်သော်လည်း ဟားခါး၊ ဖလမ်း-သိုင်းငင်းလမ်းပိုင်းကိုမှု လုံးဝသွားလာခြင်းမပြုလုပ်ရန် Chinland Defense Force CDM Siyin ၏ ထုတ်ပြန်ချက်တွင် ဖော်ပြထားသည်။
