ပလက်ဝမြို့နယ်အတွင်းရှိ စစ်ဘေးရှောင်စခန်း (IDPs Camp) များ မိုးတွင်းကာလအတွင်း ကြီးမားသည့်အခက်အခဲ ကြုံရနိုင်

0
By လားနွန် – ချင်းပြည်နယ်တောင်ပိုင်း ပလက်ဝမြို့နယ်အတွင်းရှိ စစ်ဘေးရှောင်ပြည်သူ အများဆုံးနေထိုင်ကြသည့် ပလက်ဝမြို့နှင့် ဆမီးမြို့ရှိ စစ်ဘေးရှောင်ယာယီစခန်း (IDPs Camp) များကို အချိန်မီပြုပြင်နိုင်ခြင်းမရှိပါက မိုးတွင်းကာလအတွင်း ကြီးမားသည့် အခက်အခဲကြုံရနိုင်သည်ဟု အရပ်ဘက်အဖွဲ့အစည်းများကပြောသည်။
ပလက်ဝမြို့နယ် ဆမီးမြို့ရှိ စစ်ဘေးရှောင်ပြည်သူများနေထိုင်ကြသည့် ဝါးများဖြင့်ဆောက်လုပ်ထားသော စစ်ရှောင်စခန်း (IDPs Camp) သည် ဝါးပိုးထိုးကာ ဟောင်းနွမ်းဆွေးမြေ့နေပြီဖြစ်သောကြောင့် အချိန်မီပြုပြင်ရန် အရေးတကြီးလိုအပ်နေကြောင်း စစ်ဘေးရှောင်ပြည်သူများ အနီးကပ်ကူညီဆောင်ရွက်ပေးနေသည့် People Hope အဖွဲ့ဒါရိုက်တာ ဦးဇော်လီအောင်ကပြောသည်။
“တကယ်လို့များ ပလက်ဝနဲ့ ဆမီးက တိုက်ပွဲရှောင်ပြည်သူများ ဆက်နေမယ်ဆိုရင်ကျနော်တို့မှှာ ပြီးခဲ့တဲ့ ဧပြီပထမပတ်တွင်းမှာလေပြင်းမုန်တိုင်း တိုက်တဲ့အခါမှာ မနှစ်ကဆောက်တဲ့ဝါးခင်း ၀ါးကာ အမိုးတို့က လုံးဝအဆင်မပြေဘူး အမိုးတွေလန်သွားတယ် ပြီးတော့ ဟောင်းနွမ်းနေပြီ ဝါးဆိုတာက ခုပ်တဲ့အချိန်ရှိတယ် ကျနော်တို့က ခုပ်တဲ့ချိန်မှာမခုပ်တဲ့အတွက် ၀ါးပိုးထိုးတယ် အဲဒါကြောင့် သူတို့နေဖို့လုံးဝလုံးဝ အဆင်မပြေဘူး သူတို့နေဖို့အိမ်ကတော့ ဒီနှစ်မိုးရွာမယ်ဆိုရင်တော့ ကျနော်တို့ တခုခု ဆောင်ရွက်ပြီးစီးမှုမရှိဘူးဆိုရင်တော့ သူတို့အတွက်ကတော့ အကြီးမားဆုံးစိန်ခေါ်မှုတော့ရင်ဆိုင်မယ်ထင်တယ်” ဟု ဦးဇော်လီအောင်ကပြောသည်။
ဆမီးမြို့တွင် စစ်ဘေးရှောင်စခန်း ၅ ခုရှိပြီး အိမ်ခြေ ၈၀၀ ကျော်ရှိကာ စစ်ဘေးဒုက္ခသည်ပြည်သူ ၃၀၀၀ ကျော်ခန့်ရှိသည်။
စစ်ဘေးရှောင်ပြည်သူများအတွက် ကမ္ဘာ့စားနပ်ရိက္ခာအစီစဉ် WFP မှ လစဉ် အခြေခံစားသောက်ကုန်များဖြစ်သည့် ဆန် ဆီ ဆား ထောက်ပံ့မှုရှိနေသော်လည်း ကျန်းမာရေးစောင့်ရှောက်မှုပိုင်းတွင်အားနည်းမှုရှိသည်ဟု ဦးဇော်လီအောင်ကပြောသည်။
ပလက်ဝမြို့ပေါ်ရှိ စစ်ဘေးရှောင်စခန်း (IDPs Camp) များသည်လည်း အခင်းအကာများအား ဝါးဖြင့်ဆောက်လုပ်ကြသည့်အတွက် ဝါးပိုးထိုးကာ နေထိုင်ရန် အဆင်မပြေတော့ကြောင်း မိုးရာသီတွင်နေထိုင်ရေးအတွက် အခက်ကြုံရနိုင်သည်ဟု ပလက်ဝမြို့ပေါ် စစ်ဘေးရှောင်ကူညီရေးအဖွဲ့မှ ဦးဇာနီကပြောသည်။
“အခုက အရင်နှစ် မိုးရာသိတုန်းကဆောက်ထားတာဆိုတော့ ဝါးအိမ် ဝါးတိုင်း ဝါးခင်း ဝါးကာ အမိုးလောက်ကသွတ်မိုးတွေ တချို့တွေက အဲဒါပဲ ပြီးတော့ ၀ါးဆိုတာ တနှစ်လောက်ပဲခံတယ်လေ တစ်နှစ်ပြည့်ပြီလေ အကယ်၍ သူတို့နေရပ်ကို မပြန်သေးဘူး မပြန်ရဘူးဆိုရင် သူတို့နေအိမ် ပြန်ပြုပြင်ဖို့လိုမယ်’’ ဟု ဦးဇာနီကပြောသည်။
ကမ္ဘာ့စားနပ်ရိက္ခာအစီစဉ် WFP အနေဖြင့် ဆန် ဆီ ဆား များသာ ထောက်ပံ့ပေးနိုင်ပြီး အလှူရှင်များလည်း မရှိသည့်အတွက် အခြားအထောက်အပံ့များ ရရှိနိုင်ခြင်းမရှိတော့ကြောင်း ဦးဇာနီကဆက်ပြောသည်။
“အဓိကတော့ သူတို့ခက်ခဲတာကတော့ ဟင်းဝယ်ဖို့က ကျနော်တို့တိုက်ပွဲရှောင်အနေနဲ့ အလှူငွေ အလှူရှင်တွေလည်းမရှိတော့ဘူးဆိုတော့ မပေးနိုင်ဘူး သူတို့ဟင်းဝယ်ဖို့ ထင်းဝယ်ဖို့ အဲဒါအခက်အခဲတွေပဲ သူတို့မှာခက်ခဲတာတွေကတော့ သူတို့ တောထဲ လွတ်လွတ်လပ်လပ် မရှာနိုင်ဘူးဆိုတော့ ထင်းဝယ်ဖို့တို့လိုတယ်” ဟု ဦးဇာနီကပြောသည်။
ပလက်ဝမြို့ပေါ်တွင် စစ်ဘေးရှောင်စခန်း ၁၀ ခုရှိပြီး အိမ်ခြေစုစုပေါင်း ၁၀၀၀ ကျော်ရှိကာ လူဦးရေ ၅၀၀၀ ခန့်ရှိသည်။
ပြီးခဲ့သည့် ဧပြီလ ၄ ရက်နေ့ညနေပိုင်းက လေပြင်းတိုက်ခတ်မှုကြောင့် ပလက်ဝမြို့နယ်အတွင်းရှိ စစ်ဘေးရှောင်ပြည်သူများနေထိုင်ကြသည့် အိမ်ခြေ ၄၀၀ နီးပါးခန့် အမိုးလန်ပြိုကျပျက်စီးခဲ့ပြီးဖြစ်သည်။
ဖေဖော်ဝါရီလ ၁ ရက်နေ့ တပ်မတော်က နိုင်ငံတော်အာဏာသိမ်းယူလိုက်ပြီီီီီီီးနောက်ပိုင်းတွင် ပလက်ဝမြို့နယ်အတွင်းရှိ စစ်ဘေးရှောင်ပြည်သူများသည် အာဏာသိမ်းစစ်ကောင်စီထံမှ ကူညီထောက်ပံ့မှုမရှိတော့ပေ။
အစိုးရမဟုတ်သည့် အဖွဲ့အစည်းများကလည်း လက်ရှိမြန်မာ့နိုင်ငံရေးအခြေအနေကြောင့် ယခင်ကကဲ့သို့ ကူညီထောက်ပံ့မှုများ ပုံမှန်မပေးနိုင်တော့ခြင်းဖြစ်သည်။
ပလက်ဝမြို့နယ်တွင် အာဏာသိမ်းစစ်ကောင်စီ လက်နက်ကိုင်တပ်ဖွဲ့များနှင့် ရက္ခိုင့်တပ်တော် AA တို့အကြားပြီးခဲ့သည့် ၂၀၂၀ ခုနှစ်နှစ်ဆန်းပိုင်းက တိုက်ပွဲအပြင်းအထန်ဖြစ်ပွားမှုကြောင့် ပလက်ဝမြို့ပေါ်နှင့် ဆမီးမြို့ပေါ်တို့တွင် နေရပ်စွန့်ခွာ ထွက်ပြေးတိမ်းရှောင်လာသည့် စစ်ဘေးရှောင်ပြည်သူ သောင်းဂဏာန်းထိရှိခဲ့သည်။
Share.

About Author

Leave A Reply