(004SS)
ချင်းပြည်နယ်၊ ပလက်ဝမြို့နယ်မှ မီဇိုရမ်ပြည်နယ်သို့ စစ်ဘေးရှောင်လာကြသော ကျောင်းသူ/သားများ ပညာဆက်လက်သင်ယူနိုင်ရန် အိန္ဒိယ-မြန်မာနယ်စပ်တနေရာတွင် Paletwa Education Centre ကျောင်းဖွင့်လှစ်လိုက်ပြီဟု သိရသည်။
ပလက်ဝမြို့နယ်တွင် စစ်ကောင်စီတပ်နှင့် အာရက္ခတပ်တော် (AA) တို့ ဖြစ်ပွားသည့် တိုက်ပွဲများကြောင့် ထွက်ပြေးတိမ်းရှောင်နေကြသည့် ကျောင်းသူ/သားများ ပညာဆက်လက်သင်ယူနိုင်ရေးအတွက် ရည်ရွယ်ကာ မီဇိုရမ်ပြည်နယ်တောင်ပိုင်း လောင်တလိုင်ခရိုင် နယ်စပ်ကျေးရွာတနေရာမှာ ဖွင့်လှစ်လိုက်ခြင်းဖြစ်သည်ဟု Paletwa Education Centre ကျောင်း ဒါရိုက်တာ ဆရာမောဆက်ကပြောသည်။
“ပလက်ဝမှာ ကျောင်းဖွင့်မဲ့ အစီစဉ်လဲ မရှိတော့တဲ့အတွက်ကြောင့်ပေါ့နော်၊ နောက်ပြီးတော့ ကျောင်း ဆရာ ဆရာမလဲ ဘယ်သူမှ မရှိတော့ဘူးပေါ့၊ အဓိက ဒီစစ်ဘေးရှောင်ကလေးတွေ ကျောင်းတက်လို့ရမဲ့နေရာ မရှိတော့တဲ့အတွက် ကြောင့် ဒီမှာ တက်လို့ရနိုင်အောင် စီစဉ်ပေးရတာပါ” ဟု ဆရာမောဆက်ကပြောသည်။
မေလ ၁ ရက်နေ့ကစ၍ ကျောင်းအပ်နှံခြင်းလက်ခံခဲ့ပြီးနောက် မေလ ၂၀ ရက်နေ့ကစ၍ ဖွင့်လှစ်သင်ကြားသွားမည်ဟု သိရသည်။
အစကနဦးပိုင်းတွင် အလယ်တန်းနှင့် အထက်တန်းကိုသာ ဖွင့်လှစ်ရန် စီစဉ်ထားခဲ့ သော်လည်း မိဘပြည်သူများ တောင်းဆိုမှုကြောင့် သူငယ်တန်းမှ အထက်တန်း ၁၂ တန်းအထိ ဖွင့်လှစ်သွားမည်ဟု သိရသည်။
ယနေ့ မေလ ၁၃ ရက်နေ့အထိ ကျောင်းတက်ရန် အမည်စာရင်းပေးသွင်းသူ အယောက် ၁၉၀ ကျော်နှင့် ရွာဘက်မှ ထပ်မံရောက်ရှိမည့် ကျောင်းသူကျောင်းသားများအပါအဝင် စုစုပေါင်း အယောက် ၄၀၀ ကျော်ရှိပြီဖြစ်ကာ သင်ကြားပေးမည့် ဆရာ၊ ဆရာမအင်အား ၂၅ ဦးရှိကြောင်း တာာဝန်ရှိသူထံမှ သိရသည်။
ထိုသို့ ကျောင်းဖွင့်လှစ်နိုင်ရေးအတွက် လုပ်ဆောင်ရာတွင် အခက်အခဲများစွာရှိပြီး ကူညီထောက်ပံ့မှုလည်း များစွာလိုအပ်နေကြောင်း ဆရာမောဆက်က ပြောသည်။
“အများကြီး ခက်ခဲတယ်၊ နေရာထိုင်ခင်းရယ်၊ နောက်ပြီးတော့ ဘာသာစကားမတတ်တာရယ် အများကြီးရှိတာပေါ့၊ ပြီးတော့ အခု ဆရာဆရာမ နေအိမ်တွေဆောက်တာ မပြီးသေးဘူး၊ နောက် ကျောင်းအဆောင်၊ ထိုင်ခုံတွေ၊ စာရေး ကိရိယာကအစ အများကြီးလိုတာပေါ့လေ။ အခု ကျွန်တော်တို့ဆီ စာရင်းပေးတာ အကုန် ရောက်နိုင်မယ် ဆိုရင် အယောက် ၅၀၀ လောက် မှန်းထားတယ် ဆိုတော့ အကူအညီတွေအရမ်းလိုလာမှာဖြစ်ပါတယ်” ဟု ၎င်း ကပြောသည်။
လက်ရှိတွင် ကျောင်းသား/သူ ဦးရေပေါ်မူတည်ပြီ မူလတန်းကျောင်းဆောင် ၁ ဆောင်၊ အလယ်တန်းကျောင်းဆောင် ၁ ဆောင်၊ အထက်တန်းကျောင်းဆောင်နှင့် ကျောင်းသူကျောင်းသားများအဆောင် ၂ ဆောင်၊ ဆရာ/မနေအိမ် ၅ လုံး ဆောက်လုပ်ပြီးစီးပြီဖြစ်ကာ အခြားလိုအပ်သော ကျောင်ဆောင်များ ဆောက်လုပ်နေဆဲဖြစ်၍ မိဘပြည်သူများမှ အကူအညီများ ပေးအပ်နိုင်ရန် Paletwa Education Centreမှ တာဝန်ရှိသူက တိုက်တွန်းထားသည်။
