မင်းတပ်မြို့က အစိုးရ အဆောက်အဦးနှင့် နေအိမ်များ လေကြောင်းတိုက်ခိုက်ခံရ၊ အရပ်သားများ သေဆုံးမှုရှိဟုဆို

(006SV)

ချင်းပြည်နယ်၊ မင်းတပ်မြို့ပေါ်က အစိုးရအဆောက်အဦးနှင့် လူနေအိမ်နေရာများကို စစ်ကောင်စီက လေကြောင်း တိုက်ခိုက်မှုများ ပြုလုပ်ခဲ့ရာ အရပ်သားပြည်သူများ သေဆုံးမှုရှိသည်ဟု မင်းတပ်မြို့နယ်ပြည်သူ့အုပ်ချုပ်ရေးအဖွဲ့ထံမှ သိရသည်။

ယမန်နေ့ မေလ ၇ ရက် စစ်ကောင်စီက လေကြောင်းတိုက်ခိုက်မှုများကို နေ့လယ် ၁ နာရီခွဲခန့်တွင် မင်းတပ်မြို့အနီးဝန်းကျင်ကို ဗုံး ၂ လုံး ကြဲချတိုက်ခိုက်ခဲ့ရာ လူနေအိမ်တချို့ ထိခိုက်ပျက်စီးမှု ပမာဏ ကြီးမားကြောင်း ဓါတ်ပုံသက်သေဖြင့် မင်းတပ် -ပအဖက မေလ ၇ ရက်က သတင်းထုတ်ပြန်သည်။

နေ့လယ် ၂ နာရီ ၄၀ ခန့်တွင်လည်း မင်းတပ်မြို့ပေါ်ကို ဂျက်ဖိုက်တာဖြင့် ထပ်မံဗုံးကြဲတိုက်ခိုက်ခဲ့ရာ အစိုးရ အဆောက်အဦးနှင့် ဝန်းထမ်းအိမ်ရာများ ထိခိုက်ပျက်စီးပြီး အရပ်သားပြည်သူများ အသက်ဆုံးရှုံးမှု ရှိခဲ့သည်ဟု သိရသည်။

စစ်ကောင်စီ၏ လေကြောင်းတိုက်ခိုက်မှုများကြောင့် ဒေသခံပြည်သူ အမျိုးသား ၃ ဦး သေဆုံးသွားကြောင်း ချင်းဒေသတွင်း သတင်းဌာနတချို့က ဖော်ပြထားသော်လည်း သီးခြားအတည်ပြု၍မရသေးပေ။

မင်းတပ်မြို့ပေါ်လေကြောင်းတိုက်ခိုက်ခံရမှုနှင့် ပတ်သက်၍ ပြည်သူထိခိုက်သေဆုံးမှု၊ အဆောက်အဦးပျက်စီးမှုများအကြောင်း မင်းတပ်မြို့ပအဖ တာဝန်ရှိသူများထံ မေလ ၈ ရက် နေ့လယ်ပိုင်းအထိ ဆက်သွယ်မေးမြန်းခဲ့သော်လည်း မရသေးပါ။

ဧပြီလ ၁၆ ရက်ကလည်း မင်းတပ်မြို့ပေါ်ကို စစ်ကောင်စီသည် တိုက်လေယာဉ်ဖြင့် ဗုံးကြဲတိုက်ခိုက်ရာ အစိုးရရုံး အဆောက်အဦး ၁ ခုနှင့် ဝန်ထမ်း အိမ်ရာ ၂ လုံး၊ လူနေအိမ် ၄ လုံး ထိခိုက်ပျက်စီးခဲ့သည်ဟု သိရသည်။

စစ်ကောင်စီသည် ချင်းပြည်နယ်တောင်ပိုင်း၊ မင်းတပ်နှင့် ကန်ပက်လက်မြို့တို့ကို လေကြောင်းတိုက်ခိုက်မှုများ ခပ်စိပ်စပ်ပြုလုပ်နေပြီး အစိုးရအဆောက်အဦးများနှင့် လူနေအိမ်များ ထိခိုက်ပျက်စီးမှုများ ဖြစ်ပွားနေကြောင်း၊ အရပ်သားပြည်သူများလည်း ထိခိုက်သေဆုံးမှုများလည်း ရှိနေကြောင်း သိရသည်။

မင်းတပ်မြို့ကို CDF – မင်းတပ်က သိမ်းပိုက်ထိန်းချုပ်ထားပြီးနောက် ပြန်လည်ထူထောင်ရေးနှင့် ပြန်လည်နေရာချထားရေးများ လုပ်ဆောင်ကာ အုပ်ချုပ်ရေးယန္တရာလည်ပတ်လျက်ရှိသည်။