(006SV)
ချင်းပြည်နယ်၊ မင်းတပ်မြို့နယ်၊ တိုက်နယ် ၁၃ ထဲက အောက်ချိုင့်ကျေးရွာကို စစ်ကောင်စီက ဖျက်အားပြင်း ပေါင် ၅၀၀ ဗုံး အပါအဝင် လေကြောင်းတိုက်ခိုက်မှု ပြင်းပြင်းထန်ထန်ပြုလုပ်ပြီး ၂ ပတ်အကြာတွင် ယမန်နေ့က ဂျက်ဖိုက်တာ ၂ စီးဖြင့် ထပ်မံတိုက်ခိုက်ခဲ့ကြောင်း သတင်းရရှိသည်။
ဧပြီလ ၁၇ ရက် ညပိုင်း ၉ နာရီခန့်တွင် တိုက်နယ် ၁၃၊ အောက်ချိုင့်ကျေးရွာအနီးဝန်းကျင်ကို တိုက်ပွဲဖြစ်ပွားခြင်း မရှိဘဲ ဂျက်ဖိုက်တာ ၂ စီးဖြင့် ဗုံးကြဲတိုက်ခိုက်မှု ၄ ကြိမ် ပြုလုပ်သွားခဲ့ကြောင်း မင်းတပ်မြို့ဒေသခံက ပြောသည်။
“ဘယ်လိုကြောင့် တိုက်ခိုက်သလဲတော့ အတိအကျမသိဘူး။ အဲဒီမှာ တိုက်ပွဲလည်း မရှိဘူး။ တိုက်ခိုက်သွားတာက ရွာအနားဝန်းကျင်ကိုပါ။ ရွာထဲကို မကျဘူး” ဟု မင်းတပ်ဒေသခံက ပြောသည်။
ယင်းကြောင့် အရပ်သားပြည်သူများနှင့် အရပ်သားနေအိမ်များ ထိခိုက်ပျက်စီးမှုမရှိကြောင်း သိရသည်။
အောက်ချိုင့်ကျေးရွာသည် ပြီးခဲ့သည့် ဧပြီလ ၂ ရက် မွန်းလွဲ ၃ နာရီခန့်ကလည်း စစ်ကောင်စီက တိုက်လေယာဉ် ၃ စီးဖြင့် ဖျက်အားပြင်း ပေါင် ၅၀၀ ဗုံးများအပါအဝင် ဗုံးကြဲတိုက်ခိုက်မှု ၁၀ ကြိမ်ခန့်ပြုလုပ်ခဲ့ပြီး စက်သေနတ်များဖြင့်ပါ ပစ်ခတ်တိုက်ခိုက်ခဲ့သည်။
ယင်းတိုက်ခိုက်မှုကြောင့် အရပ်သားပြည်သူ ၅ ဦး ထိခိုက်ဒဏ်ရာများရရှိခဲ့ပြီး တစ်ဦးမှာ ခြေတစ်ဖက် ဆုံးရှုံးခဲ့ရကြောင်း၊ စာသင်ကျောင်းအပါအဝင် နေအိမ် ၁၀ လုံး ပျက်စီးခဲ့ပြီး ယင်းတိုက်ခိုက်မှုကြောင့် ရွာပတ်ဝန်းကျင်မှာ တောမီးများ ၂ ရက်ကျော်ကြာ လောင်ကျွမ်းနေခဲ့ကြောင်း သိရသည်။
တိုက်နယ် ၁၃ ထဲက အောက်ချိုင်ရွာသည် မင်းတပ်မြို့နယ်၊ မတူပီမြို့နယ်နှင့် ပလက်ဝမြို့နယ်တို့နှင့် ဆက်စပ်နေသော ဒေသထဲတွင် တည်ရှိနေကြောင်း သိရသည်။
ဧပြီလ ၁၇ ရက်ကလည်း မင်းတပ်မြို့ ခလရ – ၂၇၄ တပ်ရင်းက မင်းတပ်မြို့ပေါ်က ၂ နေရာကို လက်နက်ကြီးဖြင့် ပစ်ခတ်သောကြောင့် ၈ နှစ်အရွယ် ကလေးငယ်တစ်ဦး ထိခိုက်ဒဏ်ရာများရရှိပြီး နေအိမ်တချို့ ထိခိုက်ပျက်စီးခဲ့ကြောင်း သိရသည်။
စစ်ကောင်စီ၏ ဖျက်အားပြင်း ပေါင် ၅၀၀ ဗုံးနှင့် Cluster ဗုံး အပါအဝင် လေကြောင်းတိုက်ခိုက်မှုကြောင့် မင်းတပ်မြို့နယ်မှာ ၃ လအတွင်း ပြည်သူ ၁၀ ဦးသေဆုံးပြီး ၁၃ ဦး ထိခိုက်ဒဏ်ရာများ ရရှိခဲ့ကြောင်း၊ လက်နက်ကြီးပစ်ခတ်မှုများကြောင့် ပြည်သူ ၉ ဦး ထိခိုက်ဒဏ်ရာများရရှိခဲ့ကြောင်း CDF – မင်းတပ်က ထုတ်ပြန်ထားသည်။
