(006SV)
အာဏာသိမ်းစစ်တပ်က မင်းတပ်မြို့ပေါ်ကို ဂျက်ဖိုက်တာများဖြင့် လေကြောင်းတိုက်ခိုက်မှုများ ပြုလုပ်ခဲ့ရာ ဒေသခံပြည်သူ ၁ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာများ ရရှိသည်ဟု မင်းတပ်ဒေသခံတချို့ထံမှ သိရသည်။
ဧပြီလ ၁၁ ရက် ည ၁၀ နာရီခန့်က ချင်းပြည်နယ်၊ မင်းတပ်မြို့ပေါ် နေရာ အများအပြားကို အာဏာသိမ်းစစ်တပ်က ဂျက်ဖိုက်တာ ၃ စီး အသုံးပြု၍ မီးလောင်ဗုံးအပါအဝင် ဗုံး ၈ လုံးခန့်ဖြင့် တိုက်ခိုက်ခြင်းဖြစ်သည်ဟု သိရသည်။
“ဗုံးကြဲတိုက်ခိုက်တာက ၁ ဦးက သေဆုံးသွားတယ်၊၊ ၁၀ ဦးကျော်ကတော့ ထိခိုက်ဒဏ်ရာတွေ ရရှိပါတယ်။ သေဆုံးသွားတာက အမျိုးသားပါ၊၊ ရဲသုံ့ပန်းဖြစ်တယ်လို့တော့ ကြားမိပါတယ်။ ထိခိုက်ဒဏ်ရာ ရရှိသူတွေထဲမှာတော့ အရပ်သားတွေရော အရပ်သား မဟုတ်ဘူးတွေရော ပါပါတယ်” ဟု မင်းတပ်ဒေသခံတစ်ဦးက ပြောသည်။
ဗုံးကြဲတိုက်ခိုက်ခံရမှုကြောင့် မင်းတပ်မြို့ပေါ်က အရပ်သားနေအိမ်များနှင့် စာတိုက်ရုံး၊ ချင်းဗုဒ္ဓသာသနပါလအဖွဲ့ရုံးအပါအဝင် အဆောက်အဦး ၂၀ ကျော် ထိခိုက်ပျက်စီးပြီး အိမ်စီးကား ၄ စီးလည်း ထိခိုက်ပျက်စီးသည်ဟု သိရသည်။
ချင်းကာကွယ်ရေးတပ်ဖွဲ့ – မင်းတပ်က သိမ်းပိုက်ထိန်းချုပ်ပြီး အုပ်ချုပ်ရေးလုပ်ငန်းများ အကောင်အထည်ဖော် လည်ပတ်နေသည့် မင်းတပ်မြို့ပေါ်နှင့် မြို့နယ်ဒေသများကို အာဏာသိမ်းစစ်တပ်က လေကြောင်းတိုက်ခိုက်မှုများ မကြာခဏ ပြုလုပ်နေကြောင်း သိရသည်။
