(006SV)
ချင်းပြည်နယ်၊ မင်းတပ်မြို့အခြေစိုက် ခလရ ၂၇၄ တပ်ရင်းက တိုက်နယ် ၄ သို့ လက်နက်ကြီးများဖြင့် ပစ်ခတ်နေမှုကြောင့် ကလေးငယ် (၂) ဦး ထိခိုက်ဒဏ်ရာများ ရရှိသွားပြီး နေအိမ်တချို့လည်း ပျက်စီးသွားသည်ဟု ချင်းကာကွယ်ရေးတပ်ဖွဲ့ – မင်းတပ်က ယနေ့ သတင်းထုတ်ပြန်သည်။
ယနေ့ စက်တင်ဘာလ ၂၉ ရက်က မင်းတပ်မြို့နယ်အတွင်းရှိ တိုက်နယ် ၄ ဘက်သို့ မင်းတပ်မြို့ပေါ်က ခလရ ၂၇၄ တပ်ရင်းမှ လက်နက်ကြီးဖြင့် ရမ်းသမ်းပစ်ခတ်ခဲ့ရာ အသက် ၁၇ နှစ်အရွယ် မိန်းကလေးငယ်တစ်ဦးနှင့် အသက် ၁၀ နှစ်အရွယ် ယောင်္ကျားလေးတစ်ဦး ထိခိုက်ဒဏ်ရာများ ရရှိခဲ့ခြင်းဖြစ်သည်။
ယင်းသို့ လက်နက်ကြီးနှင့် ရမ်းသမ်းပစ်ခတ်မှုကြောင့် အရပ်သားနေအိမ် တစ်လုံးနှင့် အိမ်သာ (၂) လုံးတို့မှာ ထိခိုက်ပျက်စီး သွားသည်ဟု သိရသည်။
မင်းတပ်မြို့ ခလရ ၂၇၄ တပ်ရင်းက မည်သည့်အတွက်ကြောင့် လက်နက်ကြီးများ ရမ်းတမ်းပစ်ခတ်နေမှုနှင့် ထိဒဏ်ရာဒဏ်ရာ ရရှိသွားသော ကလေးငယ် ၂ ဦး၏ အခြေအနေကို မင်းတပ် တော်လှန်ရေးအင်အားစုများထံ ဆက်သွယ်မေးမြန်းနေဆဲဖြစ်ပြီး ဆက်သွယ်၍ မရသေးပါ။
ပြီးခဲ့တဲ့ စက်တင်ဘာ ၂၆ ရက်က မင်းတပ်မြို့အဝင်တွင် စစ်ကောင်စီထောင်ထားသည့် မြေမြှုပ်မိုင်းကြောင့် တောင်ယာသွားသော သက်ကြီးပိုင်း အရပ်သားတစ်ဦး ထိခိုက်သေဆုံးခဲ့ပြီး ထိခိုက်ဒဏ်ရာများရရှိခဲ့သော ဇနီးဖြစ်သူကို ခလရ ၂၇၄ တပ်ရင်းက ဆေးကုသပေးနေသည်ဟု မင်းတပ်မြို့ပြည်သူအုပ်ချုပ်ရေးမှ တာဝန်ရှိသူ ကိုယောမာန်က ပြောသည်။
စက်တင်ဘာလ ၂၄ ရက်က မင်းတပ်မြို့အဝင်က ဂိတ်ကို CDF – မင်းတပ်က ရုတ်တရက် စီးနင်းတိုက်ခိုက်ရာ စစ်ကောင်စီမှ ရဲတပ်ကြပ်တစ်ဦး သေဆုံးပြီး ထိခိုက်ဒဏ်ရာ ၃ ဦး ရရှိတယ်လို့ ဒေသခံများက ပြောသည်။
မင်းတပ်မြို့ပေါ်က စစ်ကောင်စီတပ်စခန်းနှင့် ကင်းစခန်းများကို CDF – မင်းတပ်က ပျောက်ကြားတိုက်ခိုက်မှုတွေ ခပ်စိပ်စိပ် ပိုပြလုပ်နေပြီး စစ်ကောင်စီတပ်က ဖမ်းဆီးစစ်ဆေးမှုတွေ ပိုလုပ်ဆောင်လာသည်၊ ထိုသို့ မတရားစွပ်စွဲဖမ်းဆီးမှုများရှိနေ၍ ပြည်သူများ သတိပြုနေထိုင်ရန်နှင့် စစ်တပ်အနီးအနားတွင် မနေထိုင်ရန် CDF မင်းတပ်က သတိထုတ်ပြန်ထားသည်။
