(005MK)
အိန္ဒိယနိုင်ငံ မီဇိုရမ်ပြည်နယ်တွင် ၂၀၂၃ ခုနှစ်အတွင်း မူးယစ်ဆေး၀ါးမှုဖြင့် အဖမ်းခံရသူ ၃၈၀ ကျော်ထဲတွင် မြန်မာနိုင်ငံသား ၅၀ ကျော် ပါ၀င်သည်ဟု မီဇိုရမ်ပြည်နယ် ရဲတပ်ဖွဲ့က ယမန်နေ့က ထုတ်ပြန်သည်။
မီဇိုရမ်ပြည်နယ်ရဲတပ်ဖွဲ့၏ မှတ်တမ်းအရ ၂၀၂၃ ခုနှစ်အတွင်း မီဇိုရမ်ပြည်နယ်ထဲတွင် မူးယစ်ဆေး၀ါမျိုးစုံ ကာလတန်ဖိုး ရူပီးသိန်း ၅၀၀၀ နီးပါးခန့် ဖမ်းဆီးရမိခဲ့ပြီး အဆိုပါ မူးယစ်ဆေး၀ါးများနှင့် ပတ်သက်ဆက်နွယ်သူ အယောက် ၃၈၅ ဦးကို ဖမ်းဆီးခဲ့သည့်အနက် မြန်မာနိုင်ငံသား ၅၅ ယောက် ပါ၀င်သည်ဟု သိရသည်။
မီဇိုရမ်ပြည်နယ် ရဲတပ်ဖွဲ့အနေဖြင့် ၂၀၂၃ ခုနှစ်ထဲမှာ ဘိန်းဖြူ ၆၈.၀၅၅ ကီလိုဂရမ်၊ Methamphetamine စိတ်ကြွ ဆေးပြား ၁၅၄.၁၇၂ ကီလိုဂရမ်၊ Crystal Meth ၄၉.၀၀၅ ကီလိုဂရမ်၊ ဆေးခြောက် ၁၁၂.၉၄၃ ကီလိုဂရမ်၊ Pseud oephedrine ၂၁၀.၇၂ ကီလိုဂရမ်၊ ဘိန်း ၄.၉၁၈ ကီလိုဂရမ်နှင့် Codeine ချောင်းဆိုးပျောက်ဆေး ၁၁၂ ဖူးတို့ ဖမ်းဆီးရမိ ခဲ့သည်ဟု သိရသည်။
အိန္ဒိယ-မြန်မာနယ်စပ်တွင်တည်ရှိသော မီဇိုရမ်ပြည်နယ်သည် မြန်မာနိုင်ငံမှတဆင့် အိန္ဒိယပြည်မဘက်သို့ မူးယစ်ဆေး၀ါး သယ်ယူပို့ဆောင်ရာတွင် အဓိကလမ်းကြောင်းအဖြစ် အသုံးပြုရာဒေသဖြစ်သည်ဟု မီဇိုရမ်ရဲတပ်ဖွဲ့က ဆိုသည်။
မြန်မာနိုင်ငံတွင် ၂၀၂၁ ခုနှစ် စစ်အာဏာသိမ်းမှုဖြစ်ပွားသည့် နောက်ပိုင်းတွင် အိန္ဒိယ-မြန်မာ နယ်စပ်လမ်းကြောင်းကတဆင့် မီဇိုရမ်ပြည်နယ်ထဲသို့ မူးယစ်ဆေး၀ါး အထူးသဖြင့် ဘိန်းဖြူနှင့် စိတ်ကြွဆေးပြား တင်သွင်းမှုပိုမိုများလာပြီး ၂၀၂၃ ခုနှစ်သည် မီဇိုရမ်ပြည်နယ်တွင် မူးယစ်ဆေး၀ါးဖမ်းဆီးမှု စံချိန်တင်မြင့်တက်သည့်နှစ်လည်းဖြစ်သည်။
