(005MK)
မီဇိုရမ်ပြည်နယ် ကျန်ဖိုင်းမြို့အခြေစိုက် မီဇိုးကျောင်းသားသမဂ္ဂ (MZP) က ၎င်းတို့ဒေသတွင်းနေထိုင်ကြသော မြန်မာစစ်ဘေး ရှောင်များ လိုက်နာရမည့် စည်းကမ်းများကို ယနေ့ ထုတ်ပြန်လိုက်သည်။
မြန်မာ့နိုင်ငံရေးအခြေအနေကြောင့် မြန်မာနိုင်ငံက မိမိတို့ညီအကိုအမြောက်အများ မီဇိုရမ်ပြည်နယ်သို့ စစ်ဘေးရှောင် ခိုလုံလာကြပြီး ၎င်းတို့အနက် အိန္ဒိယနိုင်ငံသားများသာ ပိုင်ဆိုင်ခွင့်ရှိသော စာရွက်စာတမ်း သက်သေအထောက်များ ပိုင်ဆိုင်သူများနှင့် ပိုင်ဆိုင်ရန်ကြိုးစားနေသူများရှိသည်ဟု Mizo Zirlai Pawl(MZP), Headquarters Champhai ၏ ထုတ်ပြန်ချက်တွင် ဖော်ပြထားသည်။
ယင်းကိစ္စသည် မိမိတို့နိုင်ငံ လူမျိုးအတွက် နောင်အနာဂတ်တွင်ဆိုးကျိုးများဖြစ်လာစေနိုင်သည့်အတွက် ယခုကဲ့သို့ အသိပေးထုတ်ပြန်ခြင်းဖြစ်သည်ဟု ဆိုသည်။
စစ်ဘေးရှောင်များသည် အိန္ဒိယနိုင်ငံသားများမဟုတ်ကြသည့်အတွက် အိန္ဒိယနိုင်ငံသားများသာ ပိုင်ဆိုင်ခွင့်ရှိသော Voter ID, Aadhaar Card, Birth Certificate, Ration Card စသည့်စာရွက်စာတမ်း သက်သေအထောက် အထားများ ပိုင်ဆိုင် ခွင့်မရှိဟု MZP Headquarters Champhai ကဆိုသည်။
ထို့အပြင် အစိုးရကပိတ်ပင်ထားသော မူးယစ်ဆေးဝါးနှင့်ကူးသန်းရောင်းဝယ်ခြင်းများမပြုရန်၊ ဆိုင်ခန်း၊ အိမ်ခြံမြေ၊ ဝယ်ယူပိုင်ဆိုင်ခွင့်မရှိကြောင်း နှင့် စစ်ဘေးရှောင်များဖြစ်ကြသည့်နည်းတူ စစ်ဘေးရှောင်ကဲ့သို့ပြုမူနေထိုင်ကြရန်လိုအပ်ကြောင်း၊ မိမိတို့ ညီအကိုအချင်းချင်းကြား စည်းလုံးညီညွတ်မှုအားကောင်းလာစေရေးအတွက် မပြုအပ်သောအရာများအား သိလျှက်နှင့်ကျူးလွန်းခြင်းမပြုကြရန် အသိပေးအပ်သည်ဟု MZP, Headquarters Champhai ၏ ထုတ်ပြန်ချက်တွင် ဖော်ပြထားသည်။
ထုတ်ပြန်ချက်ပါအကြောင်းအရာများအား လက်တွေ့အကောင်အထည်ဖော်ဆောင်ရွက်နိုင်ရေးအတွက် ဆက်လက်လုပ်ဆောင်သွားမည်ဟုဆိုသည်။
ကျန်ဖိုင်း(Champhai) သည် မီဇိုရမ်ပြည်နယ်၏ နယ်စပ်မြို့တစ်မြို့ဖြစ်ပြီး ချင်းပြည်နယ်နှင့် ထိစပ်လျှက်ရှိကာ အိန္ဒိယ-မြန်မာ နယ်စပ်ကုန်သွယ်ရေးလမ်းကြောင်းပေါ်တည်ရှိသော စီးပွားရေးအရအချက်အချာကျသောမြို့ဖြစ်သည်။ ယခု လက်ရှိ ကျန်ဖိုင်းခရိုင်ထဲတွင် မြန်မာနိုင်ငံက စစ်ဘေးရှောင် တစ်သောင်းကျော် နေထိုင်လျှက်ရှိကြောင်းသိရသည်။
မီဇိုရမ်ပြည်နယ်တစ်ခုလုံးတွင် မြန်မာနိုင်ငံက စစ်ဘေးရှောင် ၃ သောင်းကျော်ရှိသည်ဟု သိရပြီး ဧပြီလ ၁၈ ရက် နေ့ တုန်းကလည်း မီဇိုရမ်ပြည်နယ်က ဩဇာအကြီးဆုံးအရပ်ဖက်အဖွဲ့အစည်း ဗဟိုမီဇိုးလူငယ်များအသင်း(CYMA) က စစ်ဘေးရှောင်များလိုက်နာရမည့် တင်းကြပ်သောစည်းကမ်းများထုတ်ပြန်ခဲ့ပြီးဖြစ်သည်။
