(03PT)
ချင်းပြည်နယ် ဖလမ်းမြို့နယ် အိန္ဒိယ-မြန်မာနယ်စပ် ရိခေါဒါရ်မြို့တွင် တပ်စွဲထာသော စစ်ကောင်စီတပ်ဖွဲ့၏ သေနတ်ရမ်းသမ်းပစ်ခတ်မှုကြောင့် ယမန်နေ့ ဇွန်လ ၁၂ ရက်နေ့မနက်ပိုင်းမှာ အသက် ၁၂ နှစ်အရွယ်ကလေး ငယ်အပါအဝင်ပြည်သူ ၂ ဦးထိမှန်ခဲ့သည်ဟု သိရသည်။
တိုက်ပွဲတစ်စုံတစ်ရာဖြစ်ပွားခြင်းမရှိဘဲ ရိခေါဒါရ်မြို့တပ်စခန်းမှ စစ်ကောင်စီတပ်ဖွဲ့များသည် သေနတ်ရမ်းသမ်းပစ်ခတ်ခဲ့မှုကြောင့် အမှတ် (၂) ရပ်ကွက်ရှိ နေအိမ်အတွင်း အသက် ၁၂ နှစ်လူငယ်တစ်ဦးထိမှန်ခဲ့သည်ဟု ဒေသခံတစ်ဦးကပြောသည်။
”အဲ့ဒီမနက်မှာ သေနတ်သံကြားလိုက်တယ်။ ပြီးတော့ သူတို့ရဲ နေအိမ် နံရံကို ဖောက်ဝင်သွားပြီးတော့ အိမ်ထဲက သံနဲ့လုပ်ထားတဲ့ စားပွဲ တိုင်ကို ထိုးဖေါက်ပြီးတော့ အသံချဲ့စက် Soundbox ကိုလည်း ထိုးဖောက်ပြီးတဲ့နောက် သူ့ရဲ့ ဖင်နားလေးမှာ အဲ့ဒီကျည်က ထိသွားတာ။ ဇိုခေါ်ထာရ် ဆေးရုံကို ပို့လိုက်တယ်။ ဘုရားကျေးဇူးကြောင့် ထိခိုက်တာ အရမ်းမပြင်းထန်ဘူး” ဟု နီးစပ်သူ မိသားစုဝင်တစ်ဦးက ပြောသည်။
ထို့အပြင် စစ်ကောင်စီ၏ သေနတ်ရမ်းသမ်းပစ်ခတ်မှုကြောင့် ဟိုင်မွလ်ကျေးရွာအနီးတွင် ခရီးသွားကုန်တင်ကား ယာဉ်နောက်လိုက်တစ်ဦးလည်း ကျည်ဆံထိမှန်ကာ အရေးပေါ် ဆေးရုံတင်ထားရသည်ဟု သိရသည်။
