(004SS)
အိန္ဒိယနိုင်ငံ၊ အာသံပြည်နယ်တွင် ဖမ်းဆီးထောင်ချခံနေရသော ချင်းလူငယ် ၃၂ ဦးသည် ယနေ့ ဇန်နဝါရီ ၃၁ ရက် မနက်ပိုင်းကစ၍ ထောင်ထဲမှာ အစာငတ်ခံ ဆန္ဒထုတ်ဖော်ခဲ့ကြသည်ဟု သိရသည်။
ချင်းလူငယ် ၃၂ ဦးတို့သည် လွတ်ရက်စေ့ပြီးဖြစ်သော်လည်း ပြန်လည်လွှတ်ပေးခြင်းမရှိသောကြောင့် ယခုကဲ့သို့ အစာငတ်ခံ ဆန္ဒဖော်ထုတ်ခြင်းဖြစ်သည်ဟု ၎င်းတို့အရေး ဆောင်ရွက်ပေးနေသော India for Myanmar ဦးဆောင်သူ ဆလိုင်းဒိုခါရ်က ပြောသည်။
“ဆန္ဒပြတာတော့ ဒီမနက်မှ ပြတာပါ၊ ပြတာက သူတို့အကုန်လုံးပါပဲ၊ အမြန်ဆုံး လွှတ်ပေးဖို့ပေါ့၊ လွှတ်ပေးပြီးတော့ UNHCR ရဲ့ စောင့်လျှောက်မှုအောက်မှာ ထားဖို့ဆိုတဲ့ဟာပေါ့၊ ကြားထဲမှာကလဲ ဗဟိုအစိုးရက အမြန်ဆုံးလွှတ်ပေးမယ်ဆိုပြီး ကတိပေးထားတာရှိတယ် ဒါပေမဲ့ အဲဒီကတိ မတည်ဘူး၊ ပြီးတော့ UNHCR ကလဲ UN ကဒ်မပေးဘူးဆိုတော့ သူတို့ UNHCR ရော၊ အစိုးရထံမှာ တောင်းဆိုချင်တဲ့သဘော ဖြစ်ပါတယ်” ဟု ဆလိုင်းဒိုခါရ်ကပြောသည်။
အသက် ၁၈ နှစ်မှ ၂၅ နှစ်ဝန်းကျင်ခန့်ရှိကြသည့် ချင်းလူငယ် ၃၂ ဦးသည် စစ်ပြေးဒုက္ခသည်အဖြစ် နယူးဒေလီမြို့ UNHCR လက်အောက်တွင် ခိုလှုံရန် ထွက်လာကြစဉ် အာသံပြည်နယ်မှာ ဖမ်းဆီးခံရခြင်းဖြစ်ပြီး ထက်ဝက်ခန့်မှာ အမျိုးသမီးလူငယ်များဖြစ်ကြောင်း သိရသည်။
လက်ရှိတွင် ၎င်းတို့သည် ထောင်ထဲတွင် ဆက်လက်ထိန်းသိမ်းခံနေကြရပြီး ရုပ်ပိုင်းဆိုင်ရာ အခက်အခဲများအပြင် အထူးသဖြင့် လွတ်ရက်စေ့ပြီဖြစ်သော်လည်း ပြန်လည် လွှတ်ပေးခြင်းမရှိသောကြောင့် စိတ်ပိုင်းဆိုင်ရာ ထိခိုက်မှု များကြုံတွေ့နေကြရသည်ဟု India for Myanmar ဦးဆောင်သူက ပြောသည်။
၎င်းတို့အားလုံးသည် ပြစ်ဒဏ်၊ ငွေဒဏ် အားလုံး ကုန်ကျခံပြီးသူများ ဖြစ်ကြောင်း၊ မြန်မာနိုင်ငံအတွင်း နိုင်ငံရေးမတည်ငြိမ် မှုကို အကြောင်းပြကာ ထောင်စည်းကမ်းများအတိုင်း ဆက်လက်ထိန်းသိမ်းခံကြရခြင်းဖြစ်ကြောင်း India for Myanmar က ဆိုသည်။
“ဒီ Foreigner Act နဲ့ပါတ်သက်တဲ့ဟာဆိုတော့ အားလုံးက ပြည်ထဲရေးဝန်ကြီးဌာန လက်အောက်မှာရှိတဲ့အတွက် ဗဟိုအစိုးရက တာဝန်အရှိဆုံးပေါ့နော်။ တစ်ဘက်မှာ Federalနိုင်ငံဖြစ်တဲ့အတွက် ပြည်နယ်တရားရုံးတွေရဲ့ ဆုံးဖြတ် ချက်ကလဲ တအားအရေးကြီးတယ်။ ဒါပေမဲ့ ဒီအခြေအနေကို မဖြစ်မနေဆောင်ရွက်မယ်ဆိုရင် ဗဟိုအစိုးရရဲ့ဆုံးဖြတ်ချက် ကအရေးပါဆုံးဖြစ်တယ်ဆိုတော့ ဒီဟာကတော့ ဗဟိုအစိုးရပေါ်မူတည်တယ်လို့ မြင်တယ်” ဟု ဆလိုင်းဒိုခါရ်ကပြောသည်။
အိန္ဒိယနိုင်ငံ ၊ မဏိပူရပြည်နယ် အင်ဖားမြို့အကျဉ်းထောင်ထဲမှာ မြန်မာနိုင်ငံသား ၁၀၀ ကျော်ဆက်လက်ထိန်းသိမ်းခံထားရ ပြီး ၎င်းတို့ထဲက အကျဉ်းသား ၁၀၀ ဝန်းကျင်ကို မဏိပူရ်အစိုးရက စစ်ကောင်စီထံ လွှဲပြောင်းခဲ့ပြီးဖြစ်သည်။
