ကလေးမြို့မှာ အသားဈေးအပါအဝင် ကုန်ဈေးနှုန်းအဆမတန်မြင့်တက်နေ

(002MG)

မိုးရာသီကာလအတွင်း လမ်းပန်းဆက်သွယ်ရေးအခက်အခဲနှင့် မြို့တွင်း ကုန်စည်ဝင်ရောက်မှုနည်းပါးခြင်းကြောင့် ကလေးမြို့ပေါ်တွင် အသားဈေးအပါအဝင် အခြေခံစားသောက်ကုန်ဈေးနှုန်းများ အဆမတန်မြင့် တက်နေသည်ဟု သိရသည်။

ထိုကဲ့သို့ ကုန်ဈေးနှုန်းမြင့်တက်ခြင်းတို့ကြောင့် အခြေခံလူတန်းစားအများစုမှာ စားဝတ်နေရေးအတွက် အခက် အခဲများကြုံတွေ့နေရသည်ဟု ကလေးမြို့က အိမ်ရှင်မတစ်ဦးက ပြော သည်။

“ဆန်တမျိုးထဲစားလို့ရတာမဟုတ်ဘူး။ အသားတွေဆိုရင် CP ကြက်တွေ နားမလည်ဘူး အကုန်ဈေးတက်တာ။ ဝက်သား ၄ သောင်း၊ ရပ်ကွက်မှာပေါ်ရင်တော့ ၃သောင်း နဲ့ရတယ်။ ရေရှည်မှာ အသားစားဖို့ခက်လာမယ်။ ကော်ပီထုပ် အစိပ်သားကို ၃၀၀၀ ပေးရတယ်၊ နေ့တိုင်းကြတော့ အရွက်ကြီးလည်း မဖြစ်ပြန်ဘူးလေ။ အခုက အသီးအရွက်ဈေးက အသားဈေးနဲ့ အတူတူဖြစ်လာတာ။” ဟု အိမ်ရှင်မက ပြောသည်။

အခြေခံစားသောက်ကုန်အပြင် အများစုစားသုံးကြသည့် ကနန်ဧရာမင်းကော်ချက်အသစ် ဆန်တအိတ် လျှင် ယခင်တွင် ၉၀,၀၀၀ ကျပ် မှ ၁၃၀,၀၀၀ ကျပ် နှင့် ကနန်ဧရာမင်းကော်ချက် အဟောင်း တစ်အိတ် လျှင် ကျပ် ၁၆၀,၀၀၀ ကျပ်အထိ မြင့်တက်သွားသည်ဟု သိရသည်။

အလားတူ မြေပဲဆီပုံးအဝါ တစ်ပုံးလျှင် ၁၉၈,၀၀၀ကျပ်၊ နေကြာဆီတစ်ပုံးလျှင် ၁၇၅,၀၀၀ ကျပ်၊ မီးသွေးတစ် အိတ် လျှင် ၂၃၀၀၀ ကျပ် မှ ၂၈၀၀၀ ကျပ် အထိ ဝယ်ယူအသုံးပြုနေကြရသည်ဟု သိရသည်။

ထို့အပြင် ကြက်ဥ ၁ လုံး ၇၀၀ ကျပ်၊ အမဲသား တစ်ပိဿာ ၄၀,၀၀၀ ကျပ် ၊ ယခင်တွင် ကြက်သား တစ်ပိဿာ ၃၀, ၀၀၀ ကျပ်ရှိခဲ့သော်လည်း လက်ရှိတွင် ၄၀,၀၀၀ ကျပ်၊ ခရမ်းချဉ်သီး တစ်ပိဿာ ၁၀,၀၀၀ ကျပ်၊ အားလူး တစ်ပိဿာ ၁၄၀၀၀ ကျပ်မှ ၁၅၀၀၀ ကျပ်၊ ကြက်သွန်နီ တစ်ပိဿာလျှင် ၁၀,၀၀၀ ကျပ် တို့ရှိသည်ဟု သိရသည်။

ယခုကဲ့သို့ အခြေခံစားသုံးကုန်ဈေးနှုန်းများ နေ့စဉ်နှင့်အမျှ မြင့်တက်နေသော ကြောင့် မိသားစုများသည့် အခြေခံလူ တန်းစား၊ သာမန်နေ့စားသမားများမှာ စားဝတ်နေရေးအတွက် ပို၍အခက်အခဲကြုံတွေ့နေကြရသည်ဟု သိရသည်။

လက်ရှိတွင် မန္တလေးမြို့ဘက်မှ ကလေးမြို့သို့ ကုန်ပစ္စည်းများသယ်ယူရာတွင် မဟာမြိုင်ကားလမ်းပိုင်း အား အဓိက အသုံးပြုနေရကာ မိုးတွင်ကာလအတွင်း လမ်းပျက်စီးမှု၊ လမ်းခရီး ကြန့်ကြာမှုများ ကြုံတွေ့နေကြရသောကြောင့် မြို့ တွင်း ကုန်ပစ္စည်းများ ဝင်ရောက်ရာမှာ ခက်ခဲမှုပိုကြုံနေရခြင်းဖြစ်ကြောင်း ကုန်ကားသမားများထံမှသိရသည်။