(004SS)
ချင်းပြည်နယ်၊ တီးတိန်မြို့မှ ကလေးမြို့သို့ သွားရာလမ်းပိုင်းရှိ ဆိုင်မွောလ်ကျေးရွာနှင့် ဒမ်လိုကျေးရွာကြားတွင် စစ်ကောင်စီတပ်ဖွဲ့အား PDF-Zoland က ယမန်နေ့ ဇူလိုင်ဘလ ၂၁ ရက်နေ့ ညနေပိုင်း တွင် ခြုံခိုတိုက်ခိုက်ခဲ့ကြောင်း သိရသည်။
အဆိုပါခြုံခိုတိုက်ခိုက်မှုမှာ နာရီဝက်ခန့်ကြာမြင့်ကြောင်း သိရပြီး ZRA-EC တပ်ဖွဲ့ဝင် ၃ ဦး ကျဆုံးကြောင်း သိရသည်။
ယမန်နေ့ ညနေပိုင်း ၈ နာရီဝန်းကျော်အချိန်တွင် နယ်မြေလုံခြုံရေးလှည့်နေစဉ် PDF-Zoland မှ မြေမြုပ်မိုင်း၊ လက်နက်ကြီး လက်နက်ငယ် များဖြင့် တိုက်ခိုက်ခဲ့ပြီး ZRA-EC ဘက်မှ တပ်ဖွဲ့ဝင် ၃ ဦး ကျဆုံးခဲ့သည်ဟု ZRA-EC တပ်ဖွဲ့ဝင် Joshua Zomi က ၎င်း၏ လူမှုကွန်ယက်စာမျက်နှာတွင် ဖော်ပြထားသည်။
သို့သော် အဆိုပါတိုက်ခိုက်မှုသည် ZRA-EC အား သီးသန့်တိုက်ခိုက်ခြင်းမဟုတ်ဘဲ ခန့်မှန်းခြေ စကစတပ်ဖွဲ့ဝင် ၁၅ ဦးခန့်ရှိသော ကား ၂ စီးအား ခြုံခိုတိုက်ခိုက်ခဲ့ခြင်းဟု PDF-Zoland နှင့်နီးစပ်သူထံမှ သိရသည်။
“Zoland က မနေ့ညနေ ၈ နာရီကျော်လောက်မှာ နာရီဝက်လောက်ဖြစ်မယ် စကစတွေကို Ambush လုပ်လိုက်တယ်။ စကစဘက် ဘယ်လောက်ကျသွားလဲ ဆိုတာတော့ မသိရဘူး။ ZRA တပ်ဖွဲ့ဝင် ၃ ဦးကျတယ်လို့ကြားသိရတယ်။ အဲတုန်းက ZRA လည်း ပါနေလို့ဖြစ်မယ် ” ဟု PDF-Zoland နှင့် နီးစပ်သူအမျိုးသားတစ်ဦးက ပြောသည်။
အဆိုပါ တိုက်ခိုက်မှုအတွင်း သေဆုံးသွားသည့် ZRA-EC တပ်ဖွဲ့ဝင် ၃ ဦးမှာ လမ်ဇမ်းရွာသား မွန်ဂျက်၊ ဘွမ်းလီရွာသား ကေဗီ နှင့် လဲဇန် ရွာသား ထန်နို တို့ဖြစ်ကြောင်း သိရသည်။
