(002MG)
စစ်ကိုင်းတိုင်း၊ ကလေးမြို့မှ ချင်းပြည်နယ်မြောက်ပိုင်း ဖလမ်း- တီးတိန်မြို့သို့ ဆက်သွယ်သောကားလမ်းပိုင်း၌ စစ်တပ်၏ စစ်ရေးဂိတ်များတွင် ဂိတ်ကြေးအများအပြားပေးဆောင်နေရသောကြောင့် ကားခများမြင့်တက်နေဆဲဖြစ်ကြောင်း သိရသည်။
အာဏာသိမ်းစစ်တပ်သည် ကလေးမြို့နှင့် ချင်းပြည်နယ်မြောက်ပိုင်း အဓိကဆက်သွယ်ထားသည့် ကားလမ်းမကြီးအား ပြန်လည်ထိန်းချုပ်ခဲ့ပြီးနောက် ယာဉ်အအသွားအလာပြန်လည်ခွင့်ပြုလိုက်သော်လည်း စစ်ဆေးရေးဂိတ်အများအပြား ထားရှိကာ ဂိတ်ကြေးအဆမတန်ကောက်ခံခြင်းများ ပြုလုပ်နေသည်ဟု တီးတိန်မြို့ခံကပြောသည်။
တီးတိန်မြို့ခံက “ကလေးနဲ့ တီးတိန်ကြားပုံမှန်လမ်းသုံးလို့ရပေမယ့် စစ်ကော်မရှင်တွေက လမ်းတလျှောက်လုံး နေရာယူ တော့လေ ဂိတ်ကြေးတွေက ပေးနေရတာ၊ ၁ ဂိတ်မှာ ၂ သောင်းစီပေးရင်တောင်မှ ၇ ဂိတ်လောက်ရှိရင်တောင် တစ်သိန်း လေးသောင်းလောက်ဖြစ်နေပြီဆိုတော့ ကားသမားတွေကို အပြစ်ပြန်တင်လို့မရပြန်ဘူး ဘာလို့လဲဆိုရင် သူတို့ကလည်း လမ်းမှာက ဂိတ်ကြေးထိုးတဲ့ဟာတွေက များတော့လေ။ ကလေးနဲ့ တီးတိန်ကြားမှာ ဂိတ်က ၉ ခုလောက်ကို ရှိတာ။” ဟုပြောသည်။
လက်ရှိတွင် ကလေးမြို့မှ တီးတိန်မြို့သို့ မော်တော်ယာဉ်စီးခ လူတစ်ဦးလျှင် ငွေကျပ် တစ်သိန်းခွဲမှ တစ်သိန်းရှစ်သောင်း အထိရှိပြီး ကလေးမြို့မှ ဖလမ်းကားခမှာ ကျပ် နှစ်သိန်းခန့်ရှိသည်ဟု သိရသည်။
ကလေးမြို့မှ ချင်းပြည်နယ်မြောက်ပိုင်း ဆက်သွယ်ရာတွင် အဓိက အသုံးပြုနေကြသည့် ကလေး-သိုင်းငင်း လမ်းပိုင်း ပုံမှန်အသုံးပြု၍ရပြီဖြစ်သော်လည်း ဂိတ်ကြေးနှင့် တန်ဆာခမြင့်တက်နေခြင်းကြောင့် အခြေခံကုန်ဈေးနှုန်းများ မြင့်တက်နေဆဲဖြစ်သည်ဟု သိရသည်။
“တီးတိန်မြို့ပေါ်က ကုန်စုံဆိုင်တွေ၊ အလှပြင်ဆိုင်တွေ ဖွင့်ကြတယ် ပုံမှန်လည်ပတ်နေပြီ ကုန်ဈေးက အကျတော့မရှိဘူး အတက်ပိုင်းပဲရှိတယ်။ ဆိုင်ဖွင့်တဲ့သူတွေအတွက် တန်ဆာခက တော်တော်လေးများတာပေါ့ ကလေးကနေ တီးတိန် အထိကို ပါဆယ်သေးသေးလေး တစ်ဗူးကို ၁ သောင်း၊ ၁ သောင်းခွဲ အဲ့လိုပုံစံ အဲ့တာတာင်မှ နည်းနည်း လေးတယ်ဆိုရင် ၂ သောင်းလောက်တောင်းတာမျိုးရှိတယ် လွယ်တော့ မလွယ် ဘူး။” ဟု တီးတိန်မြို့ဒေသခံက ပြောသည်။
