(006SV)
ချင်းပြည်နယ်တောင်ပိုင်း ကန်ပက်လက်၊ မင်းတပ်နှင့် မတူပီမြို့နယ်များကို ယနေ့တွင် စစ်ကော်မရှင်တပ်က လေကြောင်းတိုက်ခိုက်မှုများကြောင့် ၁၃ နှစ်အရွယ် ကလေးငယ် ၁ ဦး သေဆုံးပြီး ၁၀ ဦးခန့်ထိခိုက်ဒဏ်ရာများ ရရှိသကဲ့သို့ နေအိမ်နှင့် အစိုးရအဆောက်အဦး အများအပြား ထိခိုက်ပျက်စီးကြောင်း သိရသည်။
ယနေ့ ဖေဖော်ဝါရီ ၈ ရက် နံနက် ၉ နာရီခွဲခန့်က ကန်ပက်လက်မြို့ တစ်နေရာကို စစ်ကော်မရှင်က ဂျက်ဖိုက်တာ ၁ စီးဖြင့် လေကြောင်းတိုက်ခိုက်မှု ပြုလုပ်ရာ ဗုံး ၂ လုံး ကြဲချခဲ့ကြောင်း ဒေသခံတစ်ဦးဖြစ်သူ Hkl mindat ထံမှ သိရသည်။
လေကြောင်းတိုက်ခိုက်မှုကြောင့် ကန်ပက်လက်မြို့မှ ပြည်သူနေအိမ်များနှင့် အစိုးရရုံးတချို့ ထိခိုက်ပျက်စီးမှု ရှိကြောင်း သိရသည်။
ယနေ့ နံနက် ၁၀ နာရီခန့်မှာလည်း မင်းတပ်မြို့ပေါ် တစ်နေရာကို စစ်ကော်မရှင်တပ်သည် ဂျက်ဖိုက်တာ ၁ စီးဖြင့် ဗုံး ၂ လုံး အသုံးပြု၍ လေကြောင်းတိုက်ခိုက်ခဲ့ရာ ဈေးဆိုင်များ၊ ဓမ္မရုံ၊ ခန်းမဆောင်ဟောင်းနှင့် နေအိမ်တချို့ထိခိုက်ပျက်စီးသည်ဟု သိရသည်။
အလားတူ ယနေ့ မွန်လွဲ ၁၂ နာရီခွဲခန့်တွင် မတူပီမြို့နယ်ရှိ ကျေးရွာတစ်ရွာကို စစ်ကော်မရှင်တပ်က ဂျက်ဖိုက်တာ ၁ စီးဖြင့် ၄ ကြိမ် ဗုံးကြဲတိုက်ခိုက်ခဲ့သလို နေ့လည် ၂ နာရီ ၄၆ မီနှစ်ခန့်မှာလည်း ဂျက်ဖိုက်တာ ၁ စီးဖြင့် ၁ ကြိမ် လေကြောင်းတိုက်ခိုက်ခဲ့ကြောင်း သိရသည်။
အဆိုပါလေကြောင်းတိုက်ခိုက်မှုကြောင့် ၁၃ နှစ်အရွယ် ကလေးငယ် ၁ ဦး သေဆုံးပြီး ထိခိုက်ဒဏ်ရာ ရရှိသူ ၁၀ ဦးခန့်ရှိကြောင်း၊ ဆီသယ်ကား ၁ စီးနှင့် နေအိမ် ၁ လုံး မီးလောင်ပျက်စီးသွားပြီး နေအိမ်တချို့ ထိခိုက်ပျက်စီးမှု ရှိကြောင်း Hkl mindat ကဖော်ပြ သည်။ လေကြောင်းတိုက်ခိုက်မှုကြောင့် ကလေးငယ် သေဆုံးမှုနှင့်ပတ်သက်၍ ခိုနူမ်းသုန်အနေဖြင့် သီးခြားအတည်ပြုနိုင်ခြင်း မရှိသေးပါဘူး။
ဖေဖော်ဝါရီလ ၇ ရက် မွန်လွှဲ ၁၂ နာရီ ၂၂ မီနစ်ခန့်ကလည်း မင်းတပ်မြို့နယ် အမှတ် ၁ တိုက်နယ်ထဲရှိ ကျေးရွာ ၂ ရွာအနီးကို လေကြောင်းတိုက်ခိုက်မှုများ ပြုလုပ်သွားသကဲ့သို့ နေ့လည် ၂ နာရီခန့်တွင် မင်းတပ်မြို့ အနောက်ခြမ်းဘက်ကို ဂျက်ဖိုက်တာ ၁ စီးဖြင့် ဗုံးကြဲတိုက်ခိုက်မှု ၄ ကြိမ်ပြုလုပ်ကြောင်း သိရသည်။
ဓာတ်ပုံ- Hkl Mindat
