(004SS)
ချင်းပြည်နယ်အတွင်း ကြုံတွေ့နေရသော ကျန်းမာရေးဝန်ထမ်း လိုအပ်ချက်ကို ဖြေရှင်းရန်အတွက် ၂၀၂၆ ခုနှစ် ဇန်နဝါရီလ မှစ၍ Bachelor of Medicine, Bachelor of Surgery (M.B.,B.S) ဆေးပညာဘွဲ့/ခွဲစိတ်ပညာဘွဲ့ သင်တန်းကို ပထမဆုံး အကြိမ် ဖွင့်လှစ်သွားမည်ဟု ချင်းပြည်အစိုးရ၏ ကျန်းမာရေးနှင့် အားကစားဝန်ကြီးဌာနက ယနေ့တွင် ထုတ်ပြန်ကြေညာသည်။
သင်တန်းကို University of Medicine (1)၊ Interim University Council နှင့် ပူးပေါင်းဖွင့်လှစ်မည်ဖြစ်ပြီး ကျောင်းသား အယောက် ၃၀ သာ လက်ခံမည်ဟု သိရသည်။
သင်တန်းကာလမှာ ၆ နှစ်သာသင်ကြားရေးနှင့် ၁ နှစ် အလုပ်သင်ကာလပါဝင်ကာ စုစုပေါင်း ၇ နှစ်ကြာမြင့်မည်ဖြစ်သည်။
လျှောက်ထားသူများအနေဖြင့် ၂၀၂၅ ခုနှစ် စက်တင်ဘာလ ၃၀ ရက် ညနေ ၄:၀၀ နာရီအထိ လျှောက်ထားနိုင်မည် ဖြစ်သည်။
လျှောက်ထားသူများအနေဖြင့်-
၁။ ၂၀၂၁ မတိုင်မီ သို့မဟုတ် ၂၀၂၁ နောက်ပိုင်း NUG ပညာရေးစနစ်ဖြင့် ၁၀တန်း(သို့)၁၂တန်း အောင်မြင်သူ၊ ချင်းပြည်အစိုးရ လက်အောက်ရှိ Pre-college တက်ရောက်နေသူ/ပြီးစီးသူများ
၂။ BECA စာမေးပွဲတွင် Grade C အနည်းဆုံးရရှိသူများ
၃။ အသက် ၂၅ နှစ်အောက်လူငယ်များ
၄။ သိပ္ပံဘာသာတွဲ(သင်္ချာ၊ဓာတုဗေဒ၊ဇီဝဗေဒ)ဖြင့် အနည်းဆုံး ၇၀% အထက်ရှိပြီး အင်္ဂလိပ်ဘာသာတွင် ၆၀% အထက်ရရှိသူများ
၅။ GED ဖြေဆိုထားသူများအနေဖြင့် စုစုပေါင်း ၆၈၀ မှတ်အထက်ရရှိသူများ
၆။ GCSE ဖြေဆိုထားသူများမှာ Biology/Human Biology တွင် Grade 7 အထက်၊ Chemistry၊ Physics နှင့် Maths တွင် Grade 6 အထက်ရရှိသူများ
၇။ သင်တန်းကာလအပြည့် တက်ရောက်နိုင်သူများ
လျှောက်ထားနိုင်သည်ဟု ချင်းပြည်အစိုးရ၏ ကျန်းမာရေးနှင့် အားကစားဝန်ကြီးဌာနက ယနေ့တွင် ထုတ်ပြန်သည်။
သင်တန်းပြီးဆုံးပြီး ဆေးဘွဲ့ရရှိသူများအနေဖြင့် ချင်းပြည်ဒေသတွင် အနည်းဆုံး ၅ နှစ်ကြာ တာဝန်ထမ်းဆောင်ရမည်ဟုလည်း ဖော်ပြထားသည်။
လျှောက်လွှာနှင့်ပတ်သက်သည့် အသေးစိတ်အချက်အလက်များကို ချင်းပြည်အစိုးရ၏ ကျန်းမာရေးဝန်ကြီးဌာန Facebook စာမျက်နှာတွင် ရယူနိုင်ပြီး လူကိုယ်တိုင် လျှောက်ထားရမည်ဖြစ်ကြောင်း သိရသည်။
