(006SV)
လူသားမျိုးနွယ်အပေါ် ကျူးလွန်သော ရာဇဝတ်မှု တရားခံအဖြစ် ဖမ်းဝရမ်းထုတ်ခံရမည့် အာဏာသိမ်းခေါင်းဆောင် မင်းအောင်လှိုင်ကို နိုင်ငံတကာက ဖမ်းဆီးအရေးယူနိုင်ရေး အရှိန်မြှင့် ကြိုးပမ်းအားထုတ်သွားမည်ဟု NUG ၊ CNF အပါအဝင် တော်လှန်ရေးမဟာမိတ်အဖွဲ့များက ထုတ်ပြန်သည်။
ရိုဟင်ဂျာများအပေါ် ကျူးလွန်သည့် ရာဇဝတ်မှုများအတွက် စစ်ခေါင်းဆောင် မင်းအောင်လှိုင်ကို ဖမ်းဝရန်ထုတ်ရန် အပြည် ပြည်ဆိုင်ရာ ရာဇဝတ်မှုတရားရုံး (ICC) သို့ နိုဝင်ဘာလ ၂၇ ရက်က ICC ၏ ရှေ့နေချုပ်က လျှောက်ထားခြင်းအပေါ် NUG နှင့် K2C ဟုခေါ်သော KNU၊ KNPP၊ CNF တို့က နိုဝင်ဘာလ ၃၀ ရက်က ပူးတွဲ ကြေညာချက်ထုတ်ပြန်ခြင်းဖြစ်သည်။
အလားတူ မြန်မာလူထုအပေါ် ကျူးလွန်သည့် လူသားမျိုးနွယ်အပေါ် ကျူးလွန်သော ရာဇဝတ်မှုများကို ဖော်ထုတ်ပြီး နိုင်ငံတကာ ဥပဒေများနှင့်အညီ ICC ၊ ICJ နိုင်ငံတကာ တရားစီရင်ရေး ယန္တရားများမှတဆင့် တာဝန်ယူမှု၊ တာဝန်ခံမှု ရရှိစေရေးအတွက်လည်း ကြိုးပမ်းအားထုတ်သွားမည်ဟု သိရသည်။
အသွင်ကူးပြောင်းရေးကာလ တရားမျှတမှုကို ဖော်ဆောင်ရေးသည်လည်း မမှိတ်မသုန်ထားရှိသော ကတိကဝတ်ဖြစ်သည်ဟု ယင်းမဟာမိတ်အဖွဲ့က ဆိုသည်။
အပြည်ပြည်ဆိုင်ရာ ရာဇဝတ်မှု တရားရုံး (ICC) ရှေ့နေချုပ်၏ ဆောင်ရွက်ချက်ကို ကြိုဆိုကြောင်း၊ မြန်မာ့တပ်မတော် သမိုင်းတွင် လူသားမျိုးနွယ်အပေါ် ကျူးလွန်သော ရာဇဝတ်မှု တရားခံအဖြစ် နိုင်ငံတကာ တရားရုံးတခု၏ ဖမ်းဝရမ်းထုတ်ရန် ပထမဆုံး လျှောက်ထားခြင်း ခံရခြင်းဖြစ်ကြောင်း ပူးတွဲထုတ်ပြန်သည်။
ထိုအခြေအနေသည် မြန်မာ့တပ်မတော် အပါအဝင် မြန်မာနိုင်င၏ လုံခြုံရေးစနစ်၊ တရားရေးစနစ်၊ နိုင်ငံရေး စနစ် ပြုပြင် ပြောင်းလဲရန် အရေးပေါ်အပ်လျက်ရှိသည်ကို ဖော်ပြနေခြင်းဖြစ်ကြောင်း သိရသည်။
ထို့ကြောင့် စစ်တပ်အတွင်းက တပ်မတော်သားအားလုံးသည် တပ်မတော်ကို လူသားမျိုးနွယ်အပေါ် ရာဇဝတ်မှု ကျူးလွန်သူ မင်းအောင်လှိုင် လက်ထဲမှ ပြန်ကယ်ထုတ်ရန်၊ လူထုလိုလာပြီး လူထုကို အကာအကွယ်ပေးသော အကျိုးပြုတပ်မတော်အဖြစ် ဖက်ဒရယ်ဒီမိုကရေစီ အခြေခံမှုများနှင့်အညီ လုံခြုံရေးကဏ္ဍအသစ်ကို ဆောင်ရွက်ကြရန် တိုက်တွန်းဖိတ်ခေါ်နေသည်။
ဖမ်းဝရမ်းထုတ်ခံရမည့် စစ်ခေါင်းဆောင်က ဦးစီးကျင်းပမည့် ရွေးကောက်ပွဲသည်လည်း တရားဝင်ခြင်း မရှိဘဲ မိုက်တွင်း နက်ခြင်းသာဖြစ်ပြီး နိုင်ငံရေး ထွက်ပေါက် လုံးဝဖြစ်လာမည် မဟုတ်ပါဟု တော်လှန်ရေးမဟာမိတ်အဖွဲ့များက သတိပေးသည်။
အိမ်နီးချင်းနိုင်ငံများ၊ အာဆီယံ၊ ကုလသမဂ္ဂနှင့် နိုင်ငံတကာ အသိုင်းအဝန်း၏ အာဏာသိမ်းစစ်အုပ်စုနှင့် ပုံစံအမျိုးမျိုး ပြုလုပ် နေသော ဆက်ဆံရေးများသည် လူသားမျိုးနွယ်အပေါ် ကျူးလွန်သော ရာဇဝတ်မှုများ ဖြစ်ပွားခြင်းကို အားပေးသော အခြေအနေ မဖြစ်ပေါစေရန် တော်လှန်ရေးအဖွဲ့များက သတိပေးသည်။
