မီဇိုရမ်ပြည်နယ်က သဘာဝဘေးဒဏ်သင့်ပြည်သူများအတွက် အမေရိကန်အခြေစိုက် ချင်းအဖွဲ့အစည်းများက ရူပီး ၇ သိန်းနီးပါးလှူဒါန်း

(005MK)

မီဇိုရမ်ပြည်နယ်တွင် ဆိုင်ကလုန်း Remal မုန်တိုင်းကြောင့် မိုးများပြီး မြေပြိုမှုအကြီးအကျယ်ဖြစ်ပွားကာ လူပေါင်း ၃၀ ကျော် အသက်ဆုံးရှုံးမှုဖြစ်ပွားခဲ့သော သဘာဝဘေးဒဏ်သင့်ပြည်သူများကူညီရန် အမေရိကန်အခြေစိုက် ချင်းအဖွဲ့အစည်းများက ရူပီးငွေ ၇ သိန်းနီးပါး ပေးအပ်လှူဒါန်းခဲ့သည်ဟု သိရသည်။

အမေရိကန်အခြေစိုက် ချင်းအဖွဲ့အစည်းများမှ ပေးပိုသည့် အလှူငွေ စုစုပေါင်း ရူပီး ၆၈၂,၀၀၀ ကို ၎င်းတို့ကိုယ်စား ချင်းအမျိုးသားအဖွဲ့ချုပ် (CNO) တာ၀န်ရှိပုဂ္ဂိုလ်များက မီဇိုးလူငယ်အသင်း Central YMA ထံ ယနေ့ ဇွန်လ ၁၄ ရက် တွင် ပေးအပ်ခဲ့သည်ဟု Rihli Voice ကဖော်ပြသည်။

ထိုသို့ ပေးပို့သည့် အဖွဲ့အစည်းများမှာ Chin Association of Maryland, USA မှ ရူပီး ၈၂,၀၀၀ ၊ Chin Community of USA ၊ Chin TV, USA နှင့် Chin Crises Relief Community of USA မှ ရူပီး ၆ သိန်းတို့ဖြစ်သည်။

ပြီးခဲ့သည့် ဇွန်လ ၃ ရက်နေ့ကလည်း သဘာဝ ဘေးဒဏ်သင့်ပြည်သူများအတွက် ချင်းအမျိုးသားအဖွဲ့ချုပ် (CNO) မှ CYMA ထံ ရူပီး ၁ သိန်းပေးအပ်လှူဒါန်းခဲ့ပြီး Chin Baptist Association, North America (CBANA) ကလည်း သဘာဝဘေးဒဏ်သင့်ပြည်သူများအတွက် ပြည်နယ်ဝန်ကြီးချုပ်ထံမှတဆင့် အလှူငွေ ဒေါ်လာ ၅၀၀၀ ပေးအပ်ခဲ့ကြောင်းသိရသည်။

အလားတူ အခြားသော ချင်းအရပ်ဖက်အဖွဲ့အစည်းများကလည်း မီဇိုရမ်ပြည်နယ်အတွက် အလှူငွေများ အသီးသီး ပေးအပ်လှူဒါန်းမှုများလည်းရှိခဲ့သည်။

မြန်မာစစ်ဘေးရှောင် ၃ သောင်းကျော်ခိုလုံကြသော မီဇိုရမ်ပြည်နယ်တွင် မေလ ၂၇ ရက်က တိုက်ခတ်ခဲ့သော ဆိုင်ကလုန်းမုန်တိုင်း Remal ကြောင့် လူဦးရေစုစုပေါင်း ၃၄ ဦးသေဆုံးခဲ့သည်။