(006SV)
ချင်းတော်လှန်ရေးတပ်ဖွဲ့ CDF – KKG ၏ ဗဟိုကော်မတီဝင် ၁ ဦး အပါအဝင် ရဲဘော် ၂ ဦးနှင့် ဒေသခံပြည်သူ ၁ ဦးတို့ကို လုပ်ကြံသတ်ဖြတ်သူများအား ခိုလှုံခွင့်ပြုသူများကို ထိရောက်စွာ အရေးယူသွားမည်ဟု CDF – KKG ၏ ဗဟိုအလုပ်မှုဆောင် ကော်မတီက ကြေညာသည်။
လုပ်ကြံသတ်ဖြတ်သူများကို ကျူးလွန်သူများနှင့် ၎င်းတို့၏ အချက်အလက်များကို ဖော်ထုတ်နိုင်ပြီဟု ယနေ့ ဩဂုတ်လ ၁၆ ရက်တွင် CDF – KKG က ထုတ်ပြန်သည်။
အမှုကိစ္စနှင့်ပတ်သက်၍ စုံစမ်းစစ်ဆေးရန် ကျန်ရှိနေသေးသည်ဖြစ်၍ လိုအပ်သော အသိပေး ထုတ်ပြန်မှုများကို တရားဝင် ဆက်လက်ထုတ်ပြန်သွားမည်ဖြစ်ပြီး ထွက်ပြေးလွတ်မြောက်နေသော ကျူးလွန်သူများကို ခိုလှုံခွင့်ပြုသူ၊ ပံ့ပိုးကူညီသူများကိုလည်း ထိရောက်စွာ အရေးယူသွားမည်ဟု သိရသည်။
မတရားသတ်ဖြတ်ခံရသော CDF – KKG မှ အဖွဲ့ဝင်များနှင့် စစ်ရှောင်အပြစ်မဲ့ ပြည်သူတို့အတွက် တရားမျှတမှု ရရှိရေး၊ အမှုမှန် ပေါ်ပေါက်ရေးတို့ကို အစွမ်းကုန် ကြိုးပမ်းဆောင်ရွက်သွားမည်ဟု CDF – KKG ထံမှ သိရသည်။
ဩဂုတ်လ ၁၂ ရက် ညတွင် CDF – KKG ၏ မြို့နယ်/ ဒေသကိုယ်စားလှယ်နှင့် ဗဟိုကော်မတီဝင် ဖြစ်သူ ဖြိုးလွင်ဦး (ခ) ဘဖြိုး၊ တပ်ရင်း ၆ မှ ရဲဘော် မဲကြီးနှင့် အပြစ်မဲ့ စစ်ရှောင်ပြည်သူတစ်ဦးတို့ကို တော်လှန်ရေးအမည်ခံ စစ်ကျင့်ဝတ်မရှိသူတချို့က လုပ်ကြံသတ်ဖြတ်မှု ကျူးလွန်ခဲ့သည်ဟု သိရသည်။
တပ်ဖွဲ့ဝင်တချို့ လုပ်ကြံသတ်ဖြတ်ခံရမှုသည် တော်လှန်ရေးကာလအတွင်း ဆုံးရှုံးမှုကြီး တစ်ခုဖြစ်ပြီး နှမြောတသ ယူကျုံးမရဖြစ်ရသည်ဟု CDF – KKG က ထုတ်ပြန်သည်။
ဂန့်ဂေါမြို့နယ်၊ ရှုံးရှီးကျေးရွာ ရာဇမုနိဘုန်းကြီးကျောင်းကုန်းအနီးတွင် CDF -KKG တပ်ရင်း ၆ ဥက္ကဌ အပါအဝင် ရဲဘော် ၂ ဦးနှင့် ဒေသခံတစ်ဦးတို့ကို ဒေသတွင်းလက်နက်ကိုင် တော်လှန်ရေးတပ်ဖွဲ့တစ်ခုဖြစ်သော Black Dragon Force တပ်ဖွဲ့မှ ရဲဘော်တချို့က လုပ်ကြံသတ်ဖြတ်ခဲ့သည်ဟု ဒေသတွင်းသတင်းရင်းမြစ်များထံမှ သိရသည်။
