ချင်းပြည်နယ် တီးတိန်မြို့အနီးတွင် စစ်ကောင်စီတပ်ဖွဲ့နှင့် ချင်းဒေသကာကွယ်ရေးပူးပေါင်းတပ်ဖွဲ့တို့ ယနေ့မွန်းလွဲပိုင်း ၂ နာရီခန့်က တိုက်ပွဲဖြစ်ပွားကာ စစ်ကောင်စီဘက်က ၇ ဦးသေဆုံးပြီး ၁၅ ဦးခန့် ဒဏ်ရာရရှိခဲ့သည်ဟု သိရသည်။
စစ်ကိုင်းတိုင်း ကလေးမြို့မှ ဇွန်လ ၁၆ ရက်နေ့က ချင်းပြည်နယ်သို့ စစ်ကား ၁၇ စီးဖြင့်တက်လာသော စစ်ကောင်စီတပ်ဖွဲ့ကို ယနေ့တွင် တီးတိန်မြို့မရောက်ခင် Hawp အနီးသို့ ရောက်ရှိသည့်အချိန်တွင် ၎င်းတို့၏ ရှေ့ပြေးတပ်ဖွဲ့နှင့် PDF-Zoland, CDF/CDM-Siyin တို့ တိုက်ပွဲဖြစ်ပွားခဲ့ခြင်းဖြစ်သည်ဟု PDF-Zoland က ထုတ်ပြန်သည်။
အဆိုပါတိုက်ပွဲတွင် စစ်ကောင်စီတပ်ဖွဲ့ဘက်မှ ၇ ဦးသေဆုံးပြီး ၁၅ ဦး ဒဏ်ရာရရှိခဲ့သည်ဟု PDF-Zoland က ဆိုသည်။
စစ်ကောင်စီတပ်ဖွဲ့များသည် လက်နက်ကြီးများဖြင့် တောက်လျှောက်ပစ်ခတ်သောကြောင့် ချင်းဒေသကာကွယ်ရေးပူးပေါင်းတပ်ဖွဲ့တို့သည် ဘေးကင်းစွာ ပြန်လည်ဆုတ်ခွါခဲ့ကြသည်။
ယနေ့တိုက်ပွဲကြောင့် ကလေးမြို့မှ ချင်းပြည်နယ်အမှတ် ၂ နယ်စပ်ကုန်သွယ်ရေး ရိခေါဒါရ်သို့ထွက်ခွါသော လိုင်းကားများလည်း လမ်းတဝက်မှ ပြန်လှည့်သွားခဲ့ရသည်ဟု သိရသည်။
