ချင်းပြည်နယ် ကန်ပက်လက်မြို့၊ အထွေထွေအုပ်ချုပ်ရေးဦးစီးဌာနနှင့် အခြေခံပညာအထက်တန်းကျောင်းတို့တွင် တပ်စွဲထားသော စစ်ကောင်စီတပ်ဖွဲ့နှင့် CDF-Kanpetlet တပ်ဖွဲ့တို့ ဇူလိုင်လ ၁၂ ရက်နေ့က တိုက်ပွဲဖြစ်ပွားကာ စစ်ကောင်စီတပ်သား ၂ ဦး သေဆုံးခဲ့သည်ဟု သိရသည်။
အဆိုပါတိုက်ပွဲမှာ ယမန်နေ့ မနက် ၁၁ နာရီမှ နေ့လယ် ၂ နာရီအထိ တရက်တည်းတွင် နှစ်ကြိမ်တိုက်ပွဲဖြစ်ပွားကာ CDF-Kanpetlet ဖက်မှ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း CDF-Kanpetlet မှ သတင်းထုတ်ပြန်ထားသည်။
ဇူလိုင်လ ၁၁ ရက်နေ့ကလည်း ကန်ပက်လက်မြို့ ထွေထွေအုပ်ချုပ်ရေးဦးစီးဌာနတွင် တပ်စွဲထားသော စစ်ကောင်စီတပ်ဖွဲ့နှင့် ၃ နာရီကျော်ကြာ တိုက်ပွဲဖြစ်ပွားခဲ့ကြပြီး အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း CDF-Kanpetlet က ဆိုသည်။
ပြီးခဲ့သည့် ဇွန်လ ၁၂ ရက်နေ့က ကန်ပက်လက်မြို့ အထွေထွေအုပ်ချုပ်ရေးဦးစီးဌာနတွင် တပ်စွဲထားသည့် စစ်ကောင်စီတပ်ဖွဲ့ဝင်များကို CDF-Kanpetlet မှ သွားရောက်ပစ်ခတ်ခဲ့ရာ စစ်ကောင်စီတပ်သား ၅ ဦး သေဆုံးမှုရှိခဲ့ကြောင်း သိရသည်။
