Salai Vakok
ချင်းပြည်နယ်၊ မင်းတပ်မြို့နယ်၊ ဝုမ်းခုန်းကျေးရွာကို စစ်ကောင်စီက လေကြောင်းမှ ပေါင် ၅၀၀ ဗုံးဖြင့် တိုက်ခိုက်ခြင်း၊ လက်နက်ကြီးဖြင့် ပစ်ခတ်ခြင်းကြောင့် ကလေးငယ်တစ်ဦးနှင့် နို့တိုက်မိခင်တစ်ဦးအပါအဝင် အရပ်သားပြည်သူ ၃ ဦး သေဆုံးပြီး တစ်ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
“စစ်အုပ်စုက အကြောင်းမဲ့ ပြည်သူတွေနေထိုင်တဲ့ ကျေးရွာကို လေကြောင်းက ဗုံးကြဲတိုက်ခိုက်သွားပါတယ်။ ပြီးတော့ ၃ ကြိမ် လှည့်ပတ်ပြီး စက်သေနတ်နဲ့ ပစ်တယ်။ တိုက်ပွဲ မရှိဘဲ ပြည်သူတွေ နေထိုင်တဲ့ ကျေးရွာကို အကြောင်းမဲ့ တိုက်ခိုက်သွားတာပါ” လို့ မင်းတပ်မြို့က ဒေသခံ တဦးက ပြောသည်။
ယနေ့ နံနက် ၁၁ နာရီခန့်တွင် မင်းတပ်မြို့နယ်၊ မရှိန်းလှော်အုပ်စု၊ ဝုမ်းခုန်ကျေးရွာရှိ ပြည်သူများနှင့် စစ်ဘေးရှာင်ပြည်သူများနေထိုင်ရာကို စစ်ကောင်စီက တိုက်လေယာဉ်ဖြင့် ပေါင် ၅၀၀ ဗုံးသီး ၂ လုံး၊ အတွဲလိုက်ဗုံးသီး ၄ လုံး၊ ရော့ကတ်၊ ပွိုင့်ဖိုက်ကျည်များနှင့် လာရောက်ပစ်ခတ်ခဲ့ကြောင်း သိရသည်။
ထို့အပြင် မင်းတပ်မြို့ရှိ ခလရ (၂၇၄) တပ်မှလည်း လက်နက်ကြီး (၄) ချက်ဖြင့် ဝုမ်ခုမ်းကျေးရွာဘက်ကို ရမ်းသမ်းပစ်ခတ်ခဲ့သည်ဟု မင်းတပ်- CDF က ယနေ့ ဇူလိုင် ၈ ရက် ထုတ်ပြန်သည်။
စစ်ကောင်စီ၏ လေကြောင်း၊ လက်နက်ကြီးဖြင့် ပစ်ခတ်တိုက်ခိုက်မှုကြောင့် အသက် ၉ နှစ်ရွယ် မိန်းကလေး (၁) ဦး၊ အသက် (၃၀) နှစ်ရွယ် (၂ လသား) နို့တိုက်မိခင် (၁) ဦး၊ အသက် ၆၅ နှစ်အရွယ် အမျိုးသမီးတစ်ဦး၊ စုစုပေါင်း ၃ ဦး ထိမှန် သေဆုံးခဲ့ပြီး အသက် (၄၅)နှစ်အရွယ် အမျိုးသားတစ်ဦး ပြင်းထန်စွာ ဒဏ်ရာရရှိခဲ့ကြောင်း သိရသည်။
လာရောက်တိုက်ခိုက်ခဲ့သော Pilot နာမည်ကို တော်လှန်ရေးအင်အားစုများနှင့် ပူးပေါင်းကာ စုံစမ်းဖော်ထုတ်၊ တုံ့ပြန်မှု လုပ်ဆောင်သွားမည်ဟု ချင်းကာကွယ်ရေးတပ်ဖွဲ့ (မင်းတပ်) က ထုတ်ပြန်သည်။
စစ်အာဏာသိမ်းချိန်မှ ၂၀၂၃ ခုနှစ် ဧပြီလကုန်အထိ ချင်းပြည်နယ်မှာ စစ်ကောင်စီက လေကြောင်းတိုက်ခိုက်မှု ၇၇ ကြိမ်ထက်မနည်း ပြုလုပ်ခဲ့ပြီး ချင်းအမျိုးသား ၆၄ ဦး သေဆုံးခဲ့ရာ၊ ၁၀ ဦးသာ ချင်းကာကွယ်ရေးတပ်ဖွဲ့ဝင်များဖြစ်ကြောင်း၊ ကျန် ၅၄ ဦးမှာ သာမန်အရပ်သားပြည်သူများဖြစ်ကြောင်း ချင်းရေးရာအဖွဲ့ချုပ် (ICA) က ထုတ်ပြန်ထားသည်။
