(06SV)
ချင်းပြည်နယ်၊ မင်းတပ်မြို့ အခြေစိုက် ခလရ (၂၇၄) တပ်ရင်းမှ စစ်ကောင်စီတပ်သားများက မင်းတပ် (ချင်း) အမျိုးသား ခရစ်ယာန်ဓမ္မဆရာ (၁) ဦးနှင့် သင်းထောက် လူကြီး (၃) ဦးကို ဖမ်းဆီးနှိပ်စက်ပြီး သတ်ဖြတ်လိုက်သည်ဟု မင်းတပ်မြို့နယ် ပြည်သူအုပ်ချုပ်ရေးအဖွဲ့ထံမှ သိရသည်။
“သူတို့ ဖမ်းခေါ်သွားပြီးတော့ (မိသားစုဝင်) မေးမြန်းတဲ့အခါမှာ ၊ သူတို့ စစ်ဆေးမေးမြန်းနေတုန်းလို့ ပြောတယ်။ နောက်တစ်ကြိမ် အဖမ်းခံရတဲ့ သူတွေကို ပြန်မေးတော့ မရှိဘူး၊ မသိဘူးလို့ပဲ ငြင်းတယ်။ သူတို့စစ်ဆေးမေးမြန်းတဲ့အချိန်မှာ သတ်ဖြတ်လိုက်ပုံပဲ။ ဘေးအနီးနားက လူတွေကလည်း သူတို့ အနှိပ်စက်ခံရတယ်။ အသံတွေ ကြားနေရတယ်ပေါ့နော်၊ ကျနော်တို့က ဖမ်းဆီးနှိပ်စက်လို့ သေသွားရင်လည်း အလောင်းတော့ ပြန်ပေးပါ၊ ဈာပနာ လုပ်ဖို့ပါဆိုရင်လည်း သူတို့က မသိဘူး။ မရှိဘူးပဲ ဘူးခံ ငြင်းတာပေါ့နော်။ အဲဒါကို ကြည့်ပြီး အသက်သေဆုံး သွားပြီးလို့ သတ်မှတ်ယူဆလို့ ရတာပေါ့လေ” ဟု မင်းတပ်မြို့နယ်၊ ပြည်သူ့အုပ်ချုပ်ရေးအဖွဲ့မှ တာဝန်ရှိသူ ကိုယောမာန်က ပြောသည်။
မင်းတပ်မြို့၊ အနောက်ရပ်ကွက်ရှိ ခရစ်ယာန်ဘုရားကျောင်း စစ်ဘေးရှောင်စခန်အတွင်း ရပ်ထားသော ဆိုင်ကယ် များလွန်းသည်ဟု အကြောင်းပြပြီး ခလရ (၂၇၄) တပ်ရင်းမှ အရက်သေစာများ မူးယစ်နေသော စစ်ကောင်စီတပ်သားများက ခရစ်ယာန်ဓမ္မဆရာ အပါအဝင် သင်းထောက်လူကြီး ၄ ဦးကို ဇူလိုင်လ ၁၆ ရက် ဖမ်းဆီးသွားခြင်းဖြစ်သည်ဟု သိရသည်။
ယင်းဘာသာရေးခေါင်ဆောင်များသည် မြို့ပေါ်တွင် စစ်ဘေးရှောင်နေရသော ပြည်သူများ အဆင်ပြေစေရန် ဦးဆောင်၍ စီစဉ်ပေးနေသူများဖြစ်သည် သိရသည်။
ဇူလိုင်လ ၂၆ ရက် ဖမ်းဆီးခံရပြီး (၁၀) ရက်အကြာတွင် မိသားစုဝင်များနှင့် ဘာသာရေးခေါင်းဆောင်များက ဒုတိယအကြိမ် ထပ်မံမေးမြန်းရာ ဖမ်းဆီးခံရသူများကို မသိကြောင်း၊ မရှိကြောင်းသာ တုံ့ပြန်ခဲ့ပြီး မေးမြန်း နှိပ်စက်ရာတွင် အသက်သေဆုံးသွားသည်ဟု ယူဆရကြောင်း သိရသည်။
စစ်ကောင်စီ၏ ဘာသာရေး ဓမ္မဆရာနှင့် သင်းထောက်လူကြီးများကို ပစ်မှတ်ထား ဖမ်းဆီးသတ်ဖြတ်ခြင်းကို ပြင်းထန်စွာ ရှုတ်ချကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ယနေ့ ဇူလိုင်လ ၂၇ ရက်က ထုတ်ပြန်သည်။
မင်းတပ်မြို့ပေါ်ရှိ ပြည်သူများအနေဖြင့် စစ်ကောင်စီ၏ သရုပ်မှန်ကို သိရှိနားလည်ပြီးနောက် တော်လှန်ရေးမှာ ဆက်လက်ပူးပေါင်း ပါဝင်ကြရန် မင်းတပ်မြို့နယ် ပြည်သူ့ အုပ်ချုပ်ရေးအဖွဲ့က နှိုးဆော်သည်။
