ချင်းပြည်နယ် မင်းတပ်နှင့် ဟားခါးမြို့မှာ နေထိုင်သော ဒေသခံအမျိုးသား ၄ ဦးကို စစ်အုပ်ချုပ်ရေး (Martial Law) စစ်ခုံရုံးက နှစ်ရှည်ထောင်ဒဏ်များ ချမှတ်ခဲ့သည်ဟု သိရသည်။
မင်းတပ်မြို့နေ လိန်းခေါဂေဆိုသူကို တော်လှန်ရေးတပ်ဖွဲ့များအား ဆန်၊ဆီ၊ ဆား စသည့်ရိက္ခာများထောက်ပံ့ခြင်း၊ သတင်းပို့ရန်ပျက်ကွက်ခြင်း၊ အစိုးရ၀န်ထမ်းများအား ပြစ်မှုကျူးလွန်စေရန် တိုက်ရိုက် (သို့) သွယ်၀◌ိုက်၍ ပြုလုပ်ခြင်းတို့ကြောင့် အကြမ်းဖက်မှုတိုက်ဖျက်ရေး ဉပဒေပုဒ်မ ၅၀(ည) ၅၂(ခ)၊ ရာဇသတ်ကြီး ပုဒ်မ ၅၀၅-က(ဂ) တို့ဖြင့် ထောင်ဒဏ်တစ်သက်ကျခံစေရန် ချမှတ်ခဲ့သည်ဟု ယနေ့ ဖေဖော်၀ါရီလ ၁၄ ရက်တွင် စစ်ကောင်စီ၀ါဒဖြန့် Fitty Two News ကဖော်ပြလာသည်။
အလားတူ မင်းတပ်မြို့နေ အွမ်လိန်းဂေ (ခ) ပီတာကိုလည်း တော်လှန်ရေးတပ်ဖွဲ့များထံ စစ်သင်တန်းတက်ရောက်ခြင်း၊ အစိုးရဌာနဆိုင်ရာအဆောက်အဦများ၊ လုံခြုံရေးကင်စခန်းများ၊ နိုင်ငံပိုင်အဆောက်အဦများအား ပြင်းထန်စွာ ထိခိုက်ဖျက်ဆီးခြင်းတို့ကြောင့် အကြမ်းဖက်မှုတိုက်ဖျက်ရေး ဉပဒေပုဒ်မ ၅၀(က)၊ ၅၂(က) တို့ဖြင့်ထောင်ဒဏ်တစ်သက်ချမှတ်ခဲ့ သည်ဟု ဖော်ပြထားသည်။
ထို့အပြင် ဟားခါးမြို့နေ ငွန်လျှန်ထန်း (ခ) ရောဘတ်နှင့် ဗန်ချိန်ကျဲအိုတို့ကို တော်လှန်ရေးတပ်ဖွဲ့ထံ သင်တန်းတက်ရောက်ခြင်း၊ တော်လှန်ရေးတပ်ဖွဲ့တစ်ခုခုတွင် ပါ၀င်ဆောင်ရွက်ခဲ့သည့်အတွက်ဟုဆိုကာ အကြမ်းဖက်မှုတိုက်ဖျက်ရေး ဉပဒေပုဒ်မ ၅၂(က) အရ ထောင်ဒဏ် ၇ နှစ်စီ ပြစ်ဒဏ်ချမှတ်ခဲ့သည်ဟု စစ်ကောင်စီအာဘော် Fifty Two News တွင်ဖော်ပြထားသည်။
ပြီးခဲ့သည့် ဇန်န၀ါရီလ ၂၅ ရက်နေ့ကလည်း ဟားခါးမြို့နေ နှီဘွေထန်းနှင့် မနှီလှောန်းတို့ကို အကြမ်းဖက်မှု တိုက်ဖျက်ရေး ဥပဒေပုဒ်မ ၅၀ (ည) နှင့်ထောင်ဒဏ်တစ်သက်၊ ဟရမ်နော်ထန် ကို ပုဒ်မ ၅၂ (က) နှင့် အလုပ်ကြမ်း ထောင်ဒဏ် (၇) နှစ် ပြစ်ဒဏ်အသီးသီးချမှတ်ခဲ့သည်။
