(006SV)
ချင်းပြည်နယ်၊ မတူပီမြို့နယ်အခြေစိုက် CDF – မတူပီ၊ တပ်မဟာ (၂) သည် နိုင်ငံရေး ရပ်တည်ချက်တွင် ချင်းလဲန်း ကောင်စီနှင့် ပူးပေါင်းဆောင်ရွက်သွားမည်ဖြစ်ကြောင်း သတင်းထုတ်ပြန်လိုက်သည်။
ဧပြီလ ၁၁ ရက်မှ ၁၂ ရက်ထိ CDF- မတူပီ၊ တပ်မဟာ – ၂၏ တပ်ရင်း တပ်မှူးများနှင့် ဒေသ အုပ်ချုပ်ရေးအဖွဲ့ များဖြင့် ညီလာခံ ကျင်းပခဲ့ပြီး ရပ်တည်ချက်နှင့် အခြေခံမှုများ ရေးဆွဲနိုင်ခဲ့ကြပြီးနောက် ချင်းပြည်နိုင်ငံရေး ရပ်တည်ချက်တွင် မတူပီမြို့နယ် ပြည်သူလူထု အများသဘောတူ ချင်းလဲန်းကောင်စီကို ထောက်ခံသည်ဟု CDF-မတူပီ တပ်မဟာ (၂) သတင်းနှင့် ပြန်ကြား ရေးဌာနက ယမန်နေ့ မေလ ၁၄ ရက်က ထုတ်ပြန်သည်။
CDF -မတူပီ၊ တပ်မဟာ (၂) တွင် တပ်ရင်း (၂) (အောက်ချင်းတပ်ရင်း)၊ တပ်ရင်း (၃) ( ကိုင်ဆီတပ်ရင်း)၊ တပ်ရင်း – ၄ (လီစန်တပ်ရင်း) နှင့် တပ်ရင်း- ၆ (အိုင်ခါခ်တပ်ရင်း) တို့ပါဝင်ကြောင်း သိရသည်။
ပြီးခဲ့သည့် ဖေဖော်ဝါရီလထဲတွင် CDF – မတူပီ၏ တတိယအကြိမ် ညီလာခံမှာ နိုင်ငံရေးရပ်တည်ချက်တွင် ချင်းလဲန်းကောင်စီ၊ ချင်းပြည်အစိုးရအဖွဲ့နှင့် ICNCC ၊ ချင်းညီနောင်အဖွဲ့ဟူ၍ သဘောထားကွဲလွဲမှုများ ဖြစ်ပေါ်ခဲ့ပြီး CDF – မတူပီသည် တပ်မဟာ (၂) ခုအဖြစ် ပြင်ဆင်ဖွဲ့စည်းခဲ့သည်။
CDF – မတူပီ၊ တပ်မဟာ (၁) တွင် တပ်ရင်း – ၁ (လင်းယုန်တပ်ရင်း)၊ တပ်ရင်း – ၅ (ဆီးနိုင်တပ်ရင်း) ၊ တို့ ပါဝင်ပြီး ဧပြီလ ၁၀ ရက်က ချင်းညီနောင်အဖွဲ့ဝင် စတင်ပူပေါင်းပါဝင်ကြောင်း ထုတ်ပြန်ခဲ့သည်။
CDF – မတူပီ၊ လင်းယုန်တပ်ရင်းတွင် ၂၀၂၂ ခုနှစ်ကတည်းက ပူပေါင်းပါဝင်၍ စစ်အာဏာရှင်ကို တော်လှန်နေသော ထိုင်ဖုန်းဒေသကာကွယ်ရေတပ်ဖွဲ့ကလည်း ၂၀၂၄ မေလ ၁၀ ရက်က CDF- မတူပီ တပ်မဟာ -၁ နှင့် ချင်းညီနောင်တွင် ပါဝင်ကြောင်း ထုတ်ပြန်ခဲ့သည်။
၂၀၂၁ အာဏာသိမ်းမှု အစောပိုင်းကာလတွင် မတူပီမြို့နယ်အတွင်း “မတူပီလုံခြုံရေးအဖွဲ့” အဖြစ် စတင်ဖွဲ့စည်းခဲ့ပြီးနောက် “မတူပီတော်လှန်ရေးတပ်ဖွဲ့” အဖြစ် ပြောင်းလဲဖွဲ့စည်းခဲ့ကြောင်း၊ ယင်းမှတစ်ဆင့် ၂၀၂၁ ဧပြီလ ၁၀ ရက်တွင် CDF – မတူပီအဖြစ် ဖွဲ့စည်းခဲ့ကြောင်း သိရသည်။
မတူပီမြို့နယ်အတွင်း မတူပီမြို့ပေါ် စစ်ကောင်စီ စခန်းများမှအပ ကျန်ကျေးလက်ဒေသများကို CDF – မတူပီ၏ ထိန်းချုပ်နယ်မြေအဖြစ် လုပ်ဆောင်နိုင်ခဲ့ကြောင်း သိရသည်။
