ချင်းပြည်နယ် တီးတိန်မြို့နယ် ကနေဒီတောင်ပေါ်က စစ်ကောင်စီတပ်စခန်းကို ယနေ့ ဇွန်လ ၂၂ ရက်နေ့တွင် ချင်းလဲန်းကောင်စီတပ်ဖွဲ့များက ပြန်လည်သိမ်းပိုက်ထိန်းချုပ်လိုက်ပြီဟု သိရသည်။
တီးတိန်-ကလေး ကားလမ်းမဘေးတွင်တည်ရှိသော ကနေဒီတောင်ကုန်းပေါ်က စစ်ကောင်စီတပ်စခန်းကို ပြီးခဲ့သည့် ၂၀၂၃ ခုနှစ် နိုဝင်ဘာလ ၂၁ ရက်နေ့က PDF-Zoland တပ်ဖွဲ့က တိုက်ခိုက်သိမ်းပိုက်ခဲ့ပြီးနောက် ယခုနှစ် ဇွန်လ ၁၈ ရက်နေ့တွင် စစ်ကောင်စီက ပြန်လည်တိုက်ခိုက်သိမ်းပိုက်ခဲ့သည်။
အင်အား ၁၀၀ ခန့်ရှိသော စစ်ကောင်စီတပ်ဖွဲ့သည် ဇွန်လ ၁၈ ရက်နေ့က တီးတိန်မြို့မှ ကနေဒီတောင်သို့ စစ်ကြောင်းထိုးကာ PDF-Zoland တပ်ဖွဲ့များနှင့် တိုက်ပွဲဖြစ်ပွားပြီး အင်အားမမျှသည့်အတွက် PDF-Zoland တပ်ဖွဲ့များသည် ကနေဒီတောင်မှ ဆုတ်ခွါသွားခဲ့ရသည်ဟု သိရသည်။
သို့သော်လည်း ချင်းလဲန်းကောင်စီတပ်ဖွဲ့များက ယနေ့ဇွန်လ ၂၂ ရက်မနက်ပိုင်းတွင် ကနေဒီတောင်ကုန်းတပ်စခန်းကို ပြန်လည်သိမ်းပိုက်နိုင်ခဲ့ကြသည်ဟု ယင်းဒေသတွင်အခြေပြုလှုပ်ရှားနေသော People Defence Army (PDA-Tedim) က ထုတ်ပြန်လာသည်။
တချိန်တည်းမှာပဲ တီးတိန်-ကလေးလမ်းမပေါ်ရှိ သိုင်းငင်တပ်စခန်းကိုလည်း စစ်ကောင်စီတပ်ဖွဲ့များက ပြန်လည်သိမ်းပိုက်ရန် ထိုးစစ်ဆင်တိုက်ခိုက်ကာ ချင်းလဲန်းကောင်စီတပ်ဖွဲ့များနှင့် ထိတွေ့တိုက်ပွဲများဖြစ်ပွားလျှက်ရှိကြောင်း သိရသည်။
