(002MG)
စစ်ကိုင်းတိုင်း၊ တမူးခရိုင်အတွင်းရှိ တော်လှန်ရေးတပ်ဖွဲ့များထိန်းချုပ်ထားသည့် ခမ်းပတ်မြို့ကို ယနေ့ ဇန်နဝါရီလ (၁၆)ရက်နေ့ ည ၁၀ နာရီဝန်းကျင်တွင် စစ်ကောင်စီတပ်ဖွဲ့က လေကြောင်းဖြင့် သုံးကြိမ် ဗုံးကြဲခဲ့သည်ဟု ဒေသခံများထံမှ သိရသည်။
ကလေးမြို့သို့ ရောက်နေသည့်ခမ်းပတ်ဒေသခံတဦးက “အိမ်ကနေ ဖုန်းဆက်လာကြတာ (၃) ကြိမ် ဗုံးလာကြဲတယ်။ အမှတ် ၁ ရပ်ကွက် အစွန်ပိုင်း ကျီခါးလမ်းဖက်မှာ၊ အသံကတော့ တော်တော်ကျယ်တယ်၊ အဲ့နားမှာရှိသူတွေကတော့ ပုန်းကျင်းထဲဝင်ပုန်းနေရတယ်။ ထိခိုက်တာတော့ ဘာမှမသိရသေးဘူး” ဟု ပြောသည်။
ခမ်းပတ်မြို့ကို စစ်ကောင်စီက မြေပြင်တိုက်ပွဲဖြစ် ပွားခြင်းမရှိဘဲ ဗုံးကြဲတိုက်ခိုက်ခြင်းဖြစ်ပြီး အရပ်သားထိခိုက်မှု တချို့ရှိသည်ဟု သိရသော်လည်း သီးခြားအတည်ပြုနိုင်ခြင်း မရှိသေးပေ။
အိန္ဒိယ-မြန်မာနယ်စပ် ကလေး-တမူးကားလမ်းမပေါ်မှာတည်ရှိသော ခမ်းပတ်မြို့သည် ပြီးခဲ့သည့် ၂၀၂၃ ခုနှစ် နို၀င် ဘာလ ၇ ရက်နေ့တွင် တော်လှန်ရေးပူးပေါင်းတပ်ဖွဲ့များက သိမ်းပိုက်ခဲ့ကြခြင်းဖြစ်သည်။
ချင်းလူမျိုးအများစုနေထိုင်ကြသော ခမ်းပတ်မြို့တွင် ရပ်ကွက်ကြီး (၅) ခုနှင့် လူဦးရေ (၄၀ဝ၀) ဝန်းကျင်ရှိသည်ဟု သိရသည်။
ခမ်းပတ်မြို့တွင် Wifi အင်တာနက်လိုင်းပြတ်တောက်နေသည်မှာ ၁ လနီးပါးရှိပြီဖြစ်ကာ ဆက်သွယ်ရေးဖုန်းလည်းများ လည်း မကြာခဏ ပြတ်တောက်မှုကြုံနေရကြောင်း ဒေသခံများကပြောသည်။
