(006SV)
ချင်းပြည်နယ်၊ ဟားခါးမြို့နယ်ထဲက ကလေးငယ်နှင့် အမျိုးသမီးများ အများစုပါဝင်သည့် ချင်းပြည်သူ ၂၀ ဝန်းကျင်သည် မလေး ရှားနိုင်ငံအတွင်းကို ဝင်ရောက်လာစဉ် ဖမ်းဆီးခံရပြီးနောက် အမှုရင်ဆိုင်နေရကြောင်း မလေးရှားရောက် ချင်းလူမျိုးများကို ကူညီပေးနေသူများထံမှ သိရသည်။
မလေးရှားနိုင်ငံအတွင်းသို့ ကား ၂ စီးဖြင့် မြန်မာနိုင်ငံသား ချင်းလူမျိုး ၂၀ ဦး၊ ရခိုင်လူမျိုး ၃ ဦးတို့သည် ဝင်ရောက်လာစဉ် မေလ ၂၃ ရက်က မလေးရှားအာဏာပိုင်များ၏ ဖမ်းဆီးခံရခြင်းဖြစ်ပြီး လက်ရှိတွင် ကွာလာလမ်ပူရဲစခန်းမှာ အမှုရင်ဆိုင်နေရသည်ဟု မလေးရှားရောက် ချင်းလူမျိုးများကို ကူညီပေးနေသူ ဦးအိုက်လွင်က ပြောသည်။
“အခုလောလောဆယ်မှာတော့ သူတို့ရဲ့ စစ်ချက်တွေ ဘာသာပြန်သွားလုပ်တယ်။ အမှုကိုင်တဲ့ ရဲအရာရှိကို ကျနော်တို့အနေနဲ့ သူတို့က ဒုက္ခသည်ဖြစ်တယ်။ ချင်းတောင်မှာ လက်ရှိ နေလို့ မရလို့ မလေးရှားကို ဒုက္ခသည်အဖြစ် ခိုလှုံလာတဲ့ လူတွေ ဖြစ်တယ်။ အဲဒါကြောင့် UNHCR နဲ့ တွေ့ခွင့်ပေးပါလို့ တောင်းဆိုထားတယ်။ ကြားထဲမှာတော့ UNHCR နဲ့ တွေ့တာတော့ မရှိသေးဘူး။ ကျနော်တို့ကလည်း follow up လုပ်နေတယ်” ဟု ဦးအိုက်လွင်က ပြောသည်။
ဖမ်းဆီးခံရသူများမှာ ချင်းပြည်နယ်၊ ဟားခါးမြို့နယ်ထဲက အများဆုံးဖြစ်ကာ ၅ နှစ်အရွယ် ကလေး ၂ ဦး၊ ၆ နှစ်နှင့် ၇ နှစ်အရွယ် ကလေးငယ် ၂ဦး အပါအဝင် ကလေးငယ် ၅ ဦးပါဝင်ပြီး ၁၉ နှစ်နှင့် ၂၀ အရွယ် အမျိုးသမီးတွေ များကြောင်း၊ ၂၃ ဦးတွင် ၂၀ ဦးသည် အမျိုးသမီးနှင့် ကလေးငယ်များဖြစ်ကြသည်ဟု သိရသည်။
၂၀၂၅ ခုနှစ်အတွင်းတွင် ချင်းလူမျိုးသာမက မြန်မာနိုင်ငံက ပြည်သူများသည် မလေးရှားနိုင်ငံအတွင်းသို့ အများအပြား ရောက်လာနေဆဲဖြစ်ကြောင်း၊ ထိုင်းနှင့် မလေးရှားနယ်စပ်မှာလည်း ဖမ်းဆီးခံရမှုများရှိနေကြောင်း သိရသည်။
“ကျနော် မေးကြည့်တာက ရွာမှာနေလို့လည်း အဆင်မပြေ၊ တချို့က ဆွေမျိုးတွေနဲ့ ဘေးပတ်ဝန်းကျင်မှာ စစ်ဘေးရှောင်ကြတယ်။ တချို့မိသားစုက အိန္ဒိယဘက်မှာ စစ်ဘေးရှောင်ကြတယ်။ အဲဒီမှာ စစ်မှုထမ်းဥပဒေကလည်း ထုတ်ပြန်ထားတော့ မလေးရှားကို ဒုက္ခသည်အနေနဲ့ ပြေးလာကြတာဖြစ်တယ်။ သူတို့ရဲ့ ထွက်ဆိုချက်အရပေါ့နော်” ဟု ဦးအိုက်လွင်က ပြောသည်။
၂၀၂၅ ခုနှစ် မေလအတွင်း မလေးရှားနိုင်ငံတွင် မြန်မာနိုင်ငံသား ၂၅၀၀ ခန့် ဖမ်းဆီးခံရပြီး ယင်းအထဲတွင် ချင်းလူမျိုး ၃၀၀ ခန့် ပါဝင်နိုင်ကြောင်း မလေးရှားရောက် ချင်းလူမျိုးများကို ကူညီပေးနေသူများက ခန့်မှန်းထားသည်။
မေလ ၂၂ ရက်ကလည်း မလေးရှားနိုင်ငံ၊ ဆလန်ဂေါပြည်နယ်၊ ဆန်းဝေးမန်တရီကောအရပ်တွင် အထောက်အထားမဲ့ နိုင်ငံခြားသား ၆၀၀ နီးပါးကို မလေးရှားအာဏာပိုင်များက ဖမ်းဆီးရာ ချင်းလူမျိုး အများအပြားလည်း ဖမ်းဆီးခံခဲ့ရသည်ဟု သိရသည်။
မေလ ၂၉ ရက်ကလည်း ဆာလာယန်းတွင် မလေးရှားအာဏာပိုင်များက ဌာနပေါင်းစုံဖြင့် အော်ပါရာစီ ဝင်ရောက်ဖမ်းဆီးရာ နိုင်ငံခြားသား ၁၄၃၅ ဦး ဖမ်းဆီးခဲ့ကြောင်း၊ ၎င်းတို့ထဲ မြန်မာနိုင်ငံသား ၁၂၂၂ ဦး ဖမ်းဆီးခံရပြီး ယင်းဖမ်းဆီးသောဒေသတွင် မြန်မာမူဆလင် အများအပြား နေထိုင်ကြသည်ဟု သိရသည်။
မလေးရှားမှာ အထောက်အထားမဲ့ နိုင်ငံခြားသားများကို ထောင်ဒဏ်များ မချတော့ဘဲ မိမိနိုင်ငံကို တရားဝင်ပြန်လိုပါက နေရပ်ပြန်နိုင်ရေး အစီအစဉ်ကို မေလ ၁၉ ရက်မှစတင်၍ စတင်ကျင့်သုံးတော့မည်ဟု မလေးရှားအာဏာပိုင်များက ကြေညာထားသည်။
