(006SV)
ကလေးမြို့ဘက်မှ ချင်းတောင်သို့ အင်အားအလုံးအရင်းဖြင့် စစ်ကြောင်း ထိုးလာသည့် စစ်ကောင်စီတပ်ကို ချင်းပူးပေါင်းတပ်က တစ်လကျော်ကြာ ပိတ်ဆို့တိုက်ခိုက်နေရာ အထိအခိုက်အကျအဆုံးများစွာဖြင့် ကလေးဘက်သို့ ပြန်ဆုတ်ခွာသွားသည်ဟု ချင်းတော်လှန်ရေးပူးပေါင်းမှ သိရသည်။
“လက်ရှိတော့ စကစတွေက ကလေးမြို့ကို အကုန်ရောက်ကြပြီး ထွက်ပြေးကြကုန်တာ။ တစ်ရွာပြီး တစ်ရွာ ရှင်းလင်းရေး လုပ်ပြီး နောက်ဆုံးမှာ မွာလ်ပီးရွာအထိ ကျနော်တို့ ရောက်သွားတာပေါ့။ မွာလ်ပီးရွာကို အထိုင်ပုံစံနဲ့ ချထားတော့ ကတုတ်ကျင်းတွေ ကောင်းကောင်းတူးထားတာတွေ့တယ်။ ကိုယ်ဘက်ကလည်း ထိခိုက်ဒဏ်ရာ ရတဲ့ လူတွေများလာတဲ့အခါမှာ ကိုယ့်ဘက်က အင်အား မမျှတာတော့ ရှိတာပေါ့။ သို့ပေမယ့် ကိုယ့်ရှိတဲ့ လူနဲ့ မရ၊ မက ထိုးစစ်ဆင်ပြီးမှ ကျနော်တို့ သိမ်းနိုင်ခဲ့တယ်။ အခုချိန် မွာလ်ပီးကျေးရွာမှာတော့ ရှင်းလင်းရေး လုပ်နေတုန်း၊ စစ်ကောင်စီက မရှိတော့ဘူး။ ဒီဘက် ရွာတွေမှာလည်း မိုင်းရှင်းလင်းရေးတွေ ဆက်လက်ပြီး လုပ်ဖို့တော့ ရှိပါသေးတယ်” ဟု ချင်းပူးပေါင်းတပ်မှ တာဝန်ရှိသူတစ်ဦးက ပြောသည်။
မေလ ၁၈ ရက်မှစတင်၍ စစ်ကိုင်းတိုင်း၊ ကလေးမြို့မှ အင်အား ၅၀၀ ကျော်ဖြင့် စစ်ကြောင်းထိုးလာသော စစ်ကောင်စီတပ်ကို မေလ ၂၁ ရက်တွင် ချင်းပူးပေါင်းတပ်က စတင်ပိတ်ဆို့ တိုက်ခိုက်နေခဲ့ပြီး ဇူလိုင်လ ၅ ရက်တွင် တော်လှန်ရေးပူးပေါင်းတပ်သည် မွာလ်ပီးကျေးရွာတွင် အထိုင်ချထားသော စစ်ကောင်စီတပ်ကို တစ်နေကုန်နီးပါး ထိုးစစ်ဆင်တိုက်ခိုက်၍ သိမ်းပိုက်နိုင်ခဲ့သည်။
ဇူလိုင်လ ၅ ရက် တိုက်ပွဲမှာပင် CNA ရဲဘော် ၃ ဦး၊ CDF – Mara ရဲဘော် ၂ ဦး၊ CDF – CDM Siyin ရဲဘော် ၁ ဦး ကျဆုံးခဲ့ပြီး ထိခိုက်ဒဏ်ရာရရှိမှုများ ရှိခဲ့ကြောင်း၊ စစ်ကောင်စီမှ ထိခိုက်သေဆုံးသူ ၁၀ ဦးကျော်ရှိခဲ့ပြီး အထိအခိုက်များစွာပြန် ပြန်ဆုတ် သွားသည်ဟု သိရသည်။
တစ်လကျော်ကြာတိုက်ပွဲအတွင်း ချင်းပူးပေါင်းတပ်မှ ၁၀ ဦးကျော် ကျဆုံးခဲ့ပြီး ထိခိုက်ဒဏ်ရာရရှိမှု အများအပြားရှိကြောင်း၊ စစ်ကောင်စီတပ်မှလည်း ထိခိုက်သေဆုံးမှုများ အများအပြားရှိခဲ့သည်ဟု ချင်းပူးပေါင်းတပ်မှ သိရသည်။
“(စကစ) အကျအဆုံးကတော့ တော်တော်များတယ်။ သူတို့ဘက်က အစောပိုင်းကတည်းက ကျတာကို ချက်ချင်း အလောင်းတွေကို ဆွဲယူနိုင်သလောက် ဆွဲပြီးမှ အကုန်လုံးက ကလေးမြို့ကို ပို့သွားတယ်။ ဒီမှာက သိပ်မကျန်ဘူး။ ဒဏ်ရာ ရတဲ့ လူတွေကောပေါ့။ ကျနော်တို့ ဒီဗီဒီယိုဖိုင်မှာ တက်တဲ့ဟာတွေက ဒီနောက်ဆုံး ၅ ရက်နေ့မှာ ပြန်တိုက်တဲ့အချိန်မှာ အလောင်းတွေ ပြန်ဆွဲလို့ မရတဲ့ ဟာတွေပါ၊၊ ကျနော်တို့ သဂြိုလ်ပေးရတယ်။ အခုက ရှင်းလင်းရေးတွေ လုပ်နေတုန်း ကောင်းကောင်းတော့ မသိရသေးဘူး။ တောထဲမှာ ပုတ်နေတာလည်း ရှိသေးတယ်။ ကလေးမြို့ကို ယူသွားတဲ့ အလောင်းတွေလည်း ရှိသေးတော့ အဲဒါတွေ စုံစမ်းနေတုန်းပါ” ဟု ချင်းပူးပေါင်းတပ်မှ တာဝန်ရှိသူတစ်ဦးက ပြောသည်။
စစ်ကောင်စီ စစ်သုံ့ပန်း ၆ ဦးကိုလည်း ဖမ်းဆီးရမိခဲ့ပြီး ထိခိုက်ဒဏ်ရာ ရရှိသူ တချို့ကို ဆေးဝါးကုသပေးနေသည်ဟု သိရသည်။
တိုက်ပွဲများအတွင်း လက်နက်ကြီးနှင့် သေနတ် အလက်ပေါင်း ၃၀ ကျော်အပါအဝင် ခဲယမ်းများ၊ စစ်အသုံးအဆောင်ပစ္စည်းများကို သိမ်းဆည်းရမိသည်ဟု သိရသည်။
ခမရ (၃၉၁)၊ ခမရ (၅၉)၊ ခမရ (၈)၊ ခမရ (၇)၊ ထပရ-(၉၃၄)၊ တပ်မ (၃၃) ၊ တပ်မ (၇၇) စသည့် တပ်ရင်း ၆ ရင်း အင်အား ၈၀၀ ဝန်းကျင်ဖြင့် ချင်းတောင်သို့ စစ်ကြောင်းထိုးလာသော စစ်ကောင်စီစစ်ကြောင်းကို CNA ၊ CDF – CDM Siyin၊ CDF-KKG၊ CDF – Lautu ၊ PDF Zoland ၊ CNDF ၊ CDF Zophei ၊ CDF – Mara ၊ PDA ၊ PDF Kalay ၊ CDF – Matupi ၊ TCDF စသည့် တော်လှန်ရေးပူးပေါင်းတပ်များက တစ်လကျော်ကြာ အပြင်းအထန် ပိတ်ဆို့ ခုခံတိုက်ခိုက်ခဲ့ခြင်းဖြစ်သည်။
စစ်ကောင်စီစစ်ကြောင်းကြောင့် ကလေး- သိုင်းငင် လမ်းဘေးရှိ မွာလ်ပီး၊ ထေးဇန်၊ ဟိန်ဇိန်၊ ဗွန်ဆမ်နှင့် သိုင်းငင်း စသည့်ကျေးရွာများမှ ဒေသခံ တစ်ထောင်ကျော် စစ်ဘေးတိမ်းရှောင်နေရဆဲဖြစ်ပြီး ကျေးရွာများတွင် မိုင်းရှင်းလင်းရေးလုပ်ငန်းများ ဆောင်ရွက်ရန် စီစဉ်နေသည်ဟု သိရသည်။
