(006SV)
ရခိုင်ပြည်နယ်၊ အမ်းမြို့နယ်၊ ဒါးလက်ချောင်းဒေသက စစ်သုံ့ပန်းအကျဉ်းစခန်းကို စစ်ကော်မရှင်တပ်က သုံးနာရီခွဲကြာ လေကြောင်းတိုက်ခိုက်မှု ပြုလုပ်ရာ စစ်ကော်မရှင် စစ်သုံ့ပန်း အသေအပျောက် အများဆုံးဖြစ်စဉ် ဖြစ်ပွားခဲ့ပြီး အရာရှိကြီးများအပါအဝင် ၁၁၆ ဦး သေဆုံးပြီး ၃၂ ဦး ထိခိုက်ဒဏ်ရာများ ရရှိကြောင်း သိရသည်။
မတ်လ ၈ ရက် နံနက် ၁၁ နာရီမှ မွန်းလွဲ ၂ နာရီခွဲခန့်အထိ စစ်ကော်မရှင်တပ်သည် ဂျက်ဖိုက်တာ ၄ စီး၊ Y- 12 ၄ စီးတို့ဖြင့် ဒါးလက်ချောင်းဒေသရှိ အာရက္ခတပ်တော် ULA/ AA ၏ စစ်သုံ့ပန်းအကျဉ်းစခန်းကို ၃ နာရီခွဲခန့် ကြာမြင့်သော လေကြောင်းဗုံးကြဲ တိုက်ခိုက်မှုမျိုးကို မရပ်မနား ပြုလုပ်သည်ဟု ULA/ AA က ယနေ့မတ်လ ၁၁ ရက်မှာ ထုတ်ပြန်သည်။
လေကြောင်းတိုက်ခိုက်မှုကြောင့် လတ်တလောစာရင်းအရ စစ်သုံ့ပန်း ၁၁၆ ဦး သေဆုံးပြီး ၃၂ ဦး ထိခိုက်ဒဏ်ရာ ရရှိကြောင်း၊ ထို့အပြင် ပြင်းထန်၊ အလတ်စား၊ အသေးစားဒဏ်ရာ ရရှိသူ အများအပြားလည်း ရှိနေသေးကြောင်း သိရသည်။
အရပ်သားများထဲက ပြစ်ဒဏ်ကျခံရသူတချို့လည်း အဆိုပါလေကြောင်းတိုက်ခိုက်မှုတွင် သေဆုံးမှု၊ ထိခိုက်ဒဏ်ရရှိမှုလည်း ရှိခဲ့ကြောင်း သိရသည်။
ရခိုင်ပြည်နယ်အတွင်း စစ်ကော်မရှင်တပ်၏ လေကြောင်းတိုက်ခိုက်မှု ဖြစ်စဉ်များတွင် စစ်ကော်မရှင်တပ်ဖွဲ့မှ စစ်သုံ့ပန်းများ အသေအပျောက် အများဆုံးဖြစ်စဉ် ဖြစ်ပြီး စစ်ဘက်အရာရှိကြီး များစွာလည်း ပွဲချင်းပြီး သေဆုံးကြောင်း သိရသည်။
စစ်သုံ့ပန်းအလောင်းတချို့မှာ မည်သူမည်ဝါဖြစ်ကြောင်း စစ်ဆေးရန် ခက်ခဲခြင်း၊ ခန္ဓာအသားအစများ တစ်မှ မရှိသော ပျောက်ဆုံးအလောင်းများလည်း ရှိနေသေးကြောင့် အသေးစိတ် အချက်အလက်များကို ထပ်မံထုတ်ပြန်သွားမည်ဟု ULA/ AA ထံမှ သိရသည်။
