(005MK)
ချင်းပြည်နယ် ဖလမ်းမြို့နယ် ဟွာလ်ငိုးရမ်းဒေသ Khawpuichhip ကျေးရွာကို အာဏာသိမ်းစစ်တပ်က လေကြောင်း တိုက်ခိုက်မှုကြောင့် ကလေးငယ် ၆ ဦးနှင့် လူကြီးတစ်ဦး စုစုပေါင်း ၇ ဦးသေဆုံးမှုအပေါ် အပြင်းအထန် ရှုတ်ချကြောင်း မီဇိုရမ်ပြည်နယ်အခြေစိုက် Zo Reunification Organization (ZORO) က ယနေ့မေလ ၄ ရက်နေ့တွင် ထုတ်ပြန် သည်။
မြန်မာနိုင်ငံမှာ လူထုကရွေးချယ်သော ဒီမိုကရေစီအစိုးရပေါ်ပေါက်ပြီဟု အာဏာသိမ်းစစ်တပ်က ဂုဏ်ယူဝံ့ကြွားစွာ ပြောဆိုခဲ့ခြင်းသည် အမည်ခံသက်သက်သာဖြစ်ပြီး စစ်အုပ်ချုပ်မှုအောက်မှာဆက်လက်တည်ရှိကာ ပြည်သူလူထု ကို ရက်စက်စွာဆက်လက်သတ်ဖြတ်နေသည်ကို Khawpuichhip ရွာဖြစ်ရပ်ကသက်သေပြနေသည်ဟု ZORO ၏ ထုတ် ပြန်ချက်တွင်ဖော်ပြသည်။
ချင်းတောင်တန်းပေါ်က ချင်းလူမျိုးများသည် ကမ္ဘာကုလသမဂ္ဂ-UN က ဌာနတိုင်းရင်းသားလူမျိုးများအဖြစ် အသိမှတ် ပြုထားပြီး UN ၏ တိုင်းရင်းသားလူမျိုးများအခွင့်အရေးဆိုင်ရာ (Declaration on the Rights of Indigenous Peoples, 2007 (UN DRIP) ကြေညာစာတမ်းမှာလည်း အကာအကွယ်ပေးထားသည်ဟု ZORO ကဆိုသည်။
UNDRIP ကြေညာစာတမ်း အပိုဒ် ၇ တွင် ဌာနေတိုင်းရင်းသားများသည် ဘဝရှင်သန်ခွင့်၊ ရုပ်ပိုင်းဆိုင်ရာနှင့် စိတ်ပိုင်း ဆိုင်ရာလွတ်လပ်ခွင့်နှင့် ပုဂ္ဂိုလ်ရေးဆိုင်ရာ လုံခြုံမှုတို့အတွက် အခွင့်အရေးရှိပြီး၊ လွတ်လပ်မှု၊ ငြိမ်းချမ်းမှုနှင့် လုံခြုံမှု တို့ဖြင့် နေထိုင်ခွင့်ရှိသည့်အပြင် လူမျိုးသုဉ်းသတ်ဖြတ်မှု (သို့မဟုတ်) အခြားမည်သည့်အကြမ်းဖက်မှုမျိုးကိုမဆို မခံရစေရဟု ဖော်ပြထားသည်။
ထို့ကြောင့် မေလ ၁ ရက်နေ့ကဖြစ်ပွားခဲ့သော Khawpuichhip ရွာလေကြောင်းတိုက်ခိုက်မှုသည် ကုလသမဂ္ဂ၏ တိုင်းရင်းသားလူမျိုးများအခွင့်အရေးဆိုင်ရာကို ပြောင်ပြောင်တင်းတင်းချိုးဖောက်လိုက်တာဖြစ်ပြီး နောက်နောင်မှာ ထိုကဲ့သို့သောဖြစ်ရပ်မျိုး ထပ်မဖြစ်ပွားစေရန်နှင့် ယခုဖြစ်ရပ်ကို ကုလသမဂ္ဂအဖွဲ့အစည်းထံ တင်ပြမည်ဟု ZORO ၏ ထုတ်ပြန်ချက်တွင်ဖော်ပြသည်။
အာဏာသိမ်းစစ်တပ်သည် ပြီးခဲ့သည့်မေလ ၁ ရက်နေ့ မွန်းလွဲပိုင်း ၃ နာရီခန့်တွင် Khawpuichhip ရွာကို တိုက် လေယာဉ်ဖြင့် ၂ ကြိမ်ဗုံးကြဲခဲ့ပြီး ၅ လအရွယ်အပါအဝင် ကလေးငယ် ၆ ဦး နှင့် လူကြီးတစ်ဦး စုစုပေါင်း ၇ ဦး သေဆုံးခဲ့သည်။
