(002MG)
ကလေး-တမူးလမ်းပိုင်း တကျော့ပြန် တိုက်ပွဲဖြစ်ပွားမှုကြောင့် ခမ်းပတ်မြို့နှင့် အနီးနားပတ်ဝန်းကျင်ကျေးရွာက ဒေသခံ ပြည်သူများသည် အိန္ဒိယ-မြန်မာ နယ်စပ်ဘက်သို့ စစ်ဘေးတိမ်းရှောင်နေကြရပြီး နေထိုင်စားသောက်ရေးအပြင် သောက်သုံးရေ အခက်အခဲများရင်ဆိုင်နေကြရသည်ဟု သိရသည်။
အိန္ဒိယ-မြန်မာနယ်စပ် ကုန်သွယ်ရေးလမ်းကြောင်းဖြစ်သည့် ကလေး-တမူးကားလမ်းအား ပြန်လည်ထိန်းချုပ်နိုင်ရေးအတွက် စစ်ကောင်စီဖွဲ့တပ်သည် ဇွန်လဆန်းပိုင်းမှ စတင်ကာ ကလေးမြို့မှ စစ်ကြောင်း တစ်ကြောင်း၊ တမူးမြို့မှ စစ်ကြောင်းတစ်ကြောင်း၊ မော်လိုက်မြို့မှ စစ်ကြောင်းတစ်ကြောင်းတို့ဖြင့် အင်အားထောင်ချီအသုံးပြု၍ ထိုးစစ်ဆင်လာခဲ့သော ကြောင့် ဒေသခံပြည်သူများသည် အရေးပေါ် စစ်ဘေးတိမ်းရှောင်ခဲ့ကြရခြင်းဖြစ်သည်။
အိန္ဒိယနယ်စပ်ဖက် စစ်ရှောင်တစ်ဦးက “ လတ်တလော ကြုံနေရတဲ့အခက် အခဲက သောက်သုံး ရေမသန့် ရှင်းမှုပေါ့နော် ယာယီတဲ လိုမျိုး အရှည်ကြီး ဆောက်ပြီးတော့ နေကြရတယ်။ မိုးတွင်း ကာလဖြစ်တဲ့အတွက် ခြင်၊ ယင်များတယ် တချို့က ခြင်ထောင်ပါ တဲ့သူတွေရှိတယ်၊ မရှိတဲ့သူတွေ လည်းရှိတယ်။” ဟု ပြောသည်။
စစ်ဘေးရှောင်များသည် အိန္ဒိယ-မြန်မာနယ်စပ် ကံမကြီးမြောက်ဘက် အိန္ဒိယဘက်ခြမ်းတွင် ယာယီတဲထိုးကာ နေထိုင်ကြရပြီး အိမ်ထောင်စု မိသားစု ၁၀၀ ကျော်ခန့်ရှိသည်ဟု သိရသည်။
လက်ရှိတွင် အခြေခံစားနပ် ရိက္ခာများအပြင် စောင်၊ ခြင်ထောင်၊ သောက်သုံးရေများ လိုအပ်နေကြောင်းသိရသည်။
ထို့အပြင် ကလေးမြို့သို့ စစ်ဘေးတိမ်းရှောင်နေကြသူများသည်လည်း အိမ်ငှားရှားပါးခြင်းကြောင့် ဆွေးမျိုးများထံနှင့် အများစုမှာ ဘုရားကျောင်းများတွင် ခိုလှုံနေကြရသည့်အပြင် ကုန်ဈေးနှုန်းအဆမတန်မြင့်တက်ခြင်းတို့ကြောင့် နေထိုင်၊စားသောက်ရေးအပိုင်း အခက်အခဲကြုံနေကြရသည်ဟု သိရသည်။
အိန္ဒိယ- မြန်မာ နယ်စပ်ကုန်သွယ်ရေး လမ်းဖြစ်သည့် ကလေး – တမူး လမ်းမပေါ်ရှိ ခမ်းပတ်မြို့ကို ဇွန် (၂၀) ရက်နေ့တွင် ထိန်းချုပ်လိုက်ပြီဟု စစ်ကောင် စီတပ်က ထုတ်ပြန်ခဲ့သော်လည်း ခမ်းပတ်မြို့အမှတ် ၁ ရပ်ကွက်ဘက် နှင့် ကနန် ကျေးရွာဘက်တွင် ထိတွေ့မှုများဆက်လက်ရှိနေသည်ဟု သိရသည်။
နယ်စပ်ကုန်သွယ်ရေး လမ်းကြောင်းပေါ်ရှိ အချက်အချာကျသော ခမ်းပတ်မြို့ကို NUG နှင့် တော်လှန်ရေးပူးပေါင်းတပ် များက ၂၀၂၃ ခုနှစ် နိုဝင်ဘာလ ၇ ရက်က သိမ်းပိုက်ခဲ့ပြီး စစ်ခေါင်းဆောင် မင်းအောင်လှိုင်၏ မေလ အိန္ဒိယ ခရီးစဉ် အပြီးတွင် စစ်ကောင်စီက ပြန်လည်သိမ်း နိုင်ရေး ထိုးစစ်ဆင်နေခြင်းဖြစ်သည်။
