ချင်းပြည်နယ်တွင် မြန်မာ့တပ်မတော်စစ်အင်အားတိုးချဲ့မှု ချင်းပါတီများစိုးရိမ်

0

By လားနွန် – ယခုရက်ပိုင်းအတွင်း ချင်းပြည်နယ်တောင်ပိုင်း၊ မတူပီမြို့ဘက်တွင် မြန်မာ့တပ်မတော်မှ စစ်အင်အား အလုံးအရင်းနှင့် တိုးချဲ့လာမှုအပေါ် တိုက်ပွဲများ ပိုမိုပြင်းထန်လာမည်ကို ချင်းနိုင်ငံရေးပါတီများက စိုးရိမ်မကင်းဖြစ်နေကြသည်။

ချင်းအမျိူးသားဒီမိုကရက်တစ်ပါတီဥက္ကဌ ဦးဇိုဇမ်းက “တကယ်တမ်းတော့ မတူပီတို့ဘာတို့ စစ်မျက်နှာပြင်ဖွင့်လာမယ်ဆိုရင် လက်နက်ကိုင်တဲ့ AA ဖက်ကရော၊ တပ်ဖက်ကရော ခံရတာက ကျွန်တော်တို့ပြည်သူ တွေကခံရတာကိုး၊ နောက်အေးအေးဆေးဆေးဖြစ်နေတဲ့ ကျွန်တော်တို့ ချင်းပြည်နယ်ကို စစ်မျက်နှာပြင်အနေနဲ့ အဲလိုရှေ့တန်းမျက်နှာပြင်တစ်ခုအနေနဲ့ ဖြစ်လာမှာကို တော်တော်စိုးရိမ်တယ်” ဟု ပြောသည်။

မတူပီမြို့နယ်သည် ယခုလက်ရှိ တပ်မတော်နှင့် ရခိုင်လက်နက်ကိုင်တပ်ဖွဲ့ (AA) အကြား တိုက်ပွဲဖြစ်ပွားနေသည့် ပလက်ဝမြို့နယ်နှင့် နယ်နိမိတ်ခြင်းထိစပ်နေပြီး ဖေဖော်ဝါရီ (၃) ရက်နေ့က စစ်ကားအစီး (၁၀၀) ကျော်နှင့် စစ်ရဟတ်ယာဉ် (၂) စီးရောက်ရှိလာပြီး တပ်မတော်ဖက်မှ တပ်အင်အားတိုးချဲ့လာခဲ့သည်။

ယခုကဲ့သို့ မတူပီမြို့နယ်တွင် မြန်မာ့တပ်မတော်မှ တပ်ရင်းအမြောက်အများနှင့် အလုံးအရင်းလာရောက်သည့်အတွက်  တပ်မတော်နှင့် AA အကြားတိုက်ပွဲသည် ပလက်ဝမြို့နယ်တွင်သာမက မတူပီမြို့နယ်ဘက်သို့ ကူးစက်လာမည်ကို စိုးရိမ်စရာရှိသည်ဟု ချင်းဒီမိုကရေစီအဖွဲ့ချူပ် (CLD) ပါတီအတွင်းရေးမှူး ဆလိုင်းအောင်လိန်းကပြောသည်။

“အခု AA က ပလက်ဝနေရာတစ်ခုတည်းကို နေရာယူထားတယ်လေ၊ ယူထားတဲ့အခါကြတော့ မတူပီမှာ စစ်တပ်ဗျူဟာ (မြန်မာ့တပ်မတော်) ရှိတဲ့အခါကျတော့ မတူပီဗျူဟာကနေတဆင့် AA ကို ထိန်းချင်တဲ့သဘောရှိတယ်၊ AA က ရခိုင်ပြည်နယ်နဲ့ ပလက်ဝမှာ စစ်ရေးလှုပ်ရှားနေတဲ့အခါကြတော့ မတူပီက AA တွေအတွက် ကချင်ပြည်ဘက်ကိုသွားတဲ့လမ်းကြောင်းဖြစ်နေတယ်၊ အဲဒီလမ်းကြောင်းကနေ သူဖြတ်တောက်ပြီးတော့မှ ထိန်းချုပ်မယ့် သဘောမှာရှိတယ်၊ အဲလိုထိန်းချုပ်တဲ့အခါမှာ ဘာဖြစ်လာမလဲဆိုလို့ရှိရင် တိုက်ပွဲတွေက ပလက်ဝမြို့နယ်တွေမကပဲနဲ့ မတူပီမြို့နယ်အထိပါ တိုက်ပွဲတွေက ပျံ့နံ့သွားနိုင်တဲ့ အနေအထားမှာရှိတယ်၊ တိုက်ပွဲတွေက ပျံ့နှံ့သွားတယ်ဆိုလို့ရှိရင် ပိုပြီးတော့မှ ပြည်သူလူထုက ဒုက္ခရောက်မယ်၊ ပိုပြီးတော့မှ ခက်ခဲလာမှာဖြစ်ပါတယ်’’ ဟု ဆလိုင်းအောင်လိန်းကပြောသည်။

ထို့အပြင် ချင်းပြည်နယ်၊ ပလက်ဝမြို့နယ်တွင် မြန်မာ့တပ်မတော်နှင့် AA တပ်ဖွဲ့အကြား တိုက်ပွဲများ ဆက်လက်ဖြစ်ပွားနေပါက ချင်းပြည်နယ်၏ စီးပွားရေးကို ထိခိုက်လာနိုင်သည်ဟု သူကဆက်ပြောသည်။

“အထူးသဖြင့် ကျွန်တော်တို့ ဒီပလက်ဝမြို့နယ်မှာလုပ်နေတဲ့ ကုလားတန်ဘက်စုံစီမံကိန်း ရပ်တန့်သွားနိုင်တယ်၊ အဲဒီဟာက ကျွန်တော်တို့နိုင်ငံတော်ရဲ့ စီးပွားရေးသော်လည်းကောင်း၊ ချင်းပြည်နယ်ရဲ့စီးပွားရေးကိုလည်းကောင်း အကြီးအကျယ်ထိခိုက်ပြီးတော့မှ ဒေသငြိမ်းချမ်းရေးသာမက ဒေသဖွံ့ဖြိုးတိုးတက်ရေးကိုပါ အများကြီးထိခိုက်မှာဖြစ်တယ်၊ ပြည်သူလူထုက ပိုပြီးတော့ ဒုက္ခရောက်မယ်”ဟု ဆလိုင်းအောင်လိန်းကပြောသည်။

ယခုလက်ရှိ မတူပီမြို့တွင် မြန်မာ့တပ်မတော်မှ ညနေ (၅) နာရီနောက်ပိုင်း တပ်မတော်တပ်ရင်းစခန်းရှေ့ ဖြတ်သန်းသွားလာခွင့်မပြုကြောင်း၊ နေ့ခင်းဘက် တပ်ရင်းစခန်းရှေ့ ဖြတ်သန်းသွားလာသည့်အခါ ဓါတ်ပုံရိုက်ယူခြင်း၊ ဖုန်းပြောဆိုခြင်း၊ ဆိုင်ကယ်ရပ်နားခြင်းများမပြုလုပ်ရန်နှင့် မည်သူမှ သေနတ်ဖြင့် တောလည်ခြင်းမပြုလုပ်ရန် တပ်မတော်မှ ဖေဖော်ဝါရီလ (၆) ရက်နေ့က အမိန့်ထုတ်ပြန်ထားသည်။

Share.

About Author

Leave A Reply

*

code