ချင်းပြည်နယ် မင်းတပ်မြို့ရှိ စစ်ကောင်စီတပ်ဖွဲ့၏ မြို့အဝင်ဂိတ်ကို CDF-Mindat ဝံပုလွေစစ်ကြောင်းက ယနေ့ နံနက်ပိုင်း ၅ နာရီခွဲအချိန်ခန့်က ဝင်ရောက်တိုက်ခိုက်ခဲ့သည်ဟု သိရသည်။
ယင်းတိုက်ခိုက်မှုသည် စစ်ကောင်စီက မင်းတပ်မြို့တွင် ယနေ့ကျင်းပပြုလုပ်သည့် ဈေးရောင်းပွဲတော်အား ဆန့်ကျင်ကန့်ကွက်သည့်အနေဖြင့် ပြုလုပ်ခြင်းဖြစ်သည်ဟု CDF-Mindat က ထုတ်ပြန်သည်။
ဝံပုလွေစစ်ကြောင်း၏ တိုက်ခိုက်မှုကြောင့် စစ်ကောင်စီဘက်က ထိခိုက်ကျဆုံးမှုများနိုင်သည်ဟု သိရသည်။
မင်းတပ်မြို့ပေါ်တွင် စစ်ကောင်စီတပ်ဖွဲ့မှ ကျင်းပပြုလုပ်သော ဈေးရောင်းပွဲတော်သို့ ပြည်သူလူထုများအနေဖြင့် ပူးပေါင်းဆောင်ရွက်ခြင်းမရှိရန်နှင့် မိမိတို့နေအိမ်များတွင်သာ လုံလုံခြုံခြုံနေထိုင်ကြရန်လည်း CDF-Mindat က တိုက်တွန်းနှိုးဆော်ထားသည်။
စစ်ကောင်စီသည် ယခုရက်ပိုင်းအတွင်း ချင်းပြည်နယ် မြို့နယ်အသီးသီးတွင် ဈေးရောင်းပွဲတော်များ ကျင်းပပြုလုပ်ကာ အခြေခံစားကုန်များကို လျှော့ဈေးဖြင့် ရောင်းချပေးလျှက်ရှိပြီး ပြည်သူအပေါ် စေတနာထား၍မဟုတ်ပဲ ဟန်ပြသဘောသာ လုပ်ဆောင်ခြင်းဖြစ်သည်ဟု ဝေဖန်မှုများလည်းရှိနေသည်။
