#Unicode
By လားနွန် – တပ်မတော် စစ်အာဏာသိမ်းမှုကို ဆန့်ကျင်ကန့်ကွက်သည့်အနေဖြင့် Civil Disobedience Movement (CDM) လှုပ်ရှားမှု တွင် ပူးပေါင်းပါဝင်ကြသော ချင်းပြည်နယ် ဟားခါးမြို့အထွေထွေအုပ်ချုပ်ရေးဦးစီးဌာနရုံးမှ ဝန်ထမ်းများကို ရုံးမတက်ပါက အရေးယူမည်ဟု ဖိအားပေးခံနေရကြောင်းသိရသည်။
ဟားခါးမြို့ရှိ အမည်မဖော်လိုသူထွေအုပ်ရုံးဝန်ထမ်းတစ်ဦးက “အထက်ကနေ လုပ်ခိုင်းတာဖြစ်မယ် CDM မှာပါတဲ့သူတွေ မနက်ဖြန်ရုံးပြန်တက်ရင် အရေးမယူဘူး၊ တကယ်လို့ မနက်ဖြန်ရုံးပြန်မတက်ရောက်ဘူးဆိုရင်တော့ ပြစ်ဒဏ်အပြစ်ပေးတာ ဒါမှမဟုတ် အရေးယူမယ်ဆိုပြီးသိရတယ်” ဟု ပြောသည်။
CDM တွင်ပါဝင်သော ထွေအုပ်ရုံးဝန်ထမ်းများကို မနက်ဖြန်ရုံးပြန်တက်ရန် ဖုန်းဖြင့်အကြောင်းကြားမှုများပြုလုပ်ရန်လည်း အထက်မှညွန်ကြားထားသည်ဟု ၎င်းကဆက်ပြောသည်။
မြန်မာ့တပ်မတော်မှ ဖေဖော်ဝါရီလ ၁ ရက်နေ့က အရပ်သားအစိုးရထံ အာဏာသိမ်းယူလိုက်ပြီးနောက် မြန်မာနိုင်ငံတစ်ဝန်း လုံးတွင် စစ်အာအာသိမ်းဆန်ကျင်ဆန္ဒပြမှုဖော်ပေါက်လာပြီး ချင်းပြည်နယ်တွင်လည်း ဖေဖော်ဝါရီ ၇ ရက်နေ့ကစ၍ ဆန္ဒ ဖော်ထုတ်မှုစတင်ခဲ့ကြသည်။
ယင်းဆန္ဒဖော်ထုတ်မှုတွင် ဟားခါးမြို့ရှိ ပြည်နယ်၊ ခရိုင်၊ မြို့နယ် အထွေထွေအုပ်ချူပ်ရေးဦးစီးဌာနရုံးမှ ဝန်ထမ်း ၁၂၄ ဦးတို့ သည် Civil Disobedience Movement (CDM) တွင် ပူးပေါင်းပါဝင်လာခဲ့ကြသလို မင်းတပ်၊ မတူပီ၊ ကန်ပက်လက်၊ တီးတိန်၊ ထန်တလန် စသည့်မြို့နယ်မှ ထွေအုပ်ရုံးဝန်ထမ်းများလည်း CDM တွင်ပူးပေါင်းပါဝင်ခဲ့ကြသည်။
#Zawgyi
