ကန်ပက်လက်မြို့နယ်ထဲကို စစ်ကော်မရှင်က ပေါင် ၅၀၀ ဗုံးများဖြင့် တိုက်ခိုက်

(006SV)

ချင်းပြည်နယ်တောင်ပိုင်း၊ ကန်ပက်လက်မြို့နယ်၊ ခါပန်းကျေးရွာကို စစ်ကော်မရှင်တပ်က ပေါင် ၅၀၀ ဗုံးများ အသုံးပြုပြီး လေကြောင်းတိုက်ခိုက်မှု ပြုလုပ်သွားသည်ဟု CDF – ကန်ပက်လက် ပြောရေးဆိုခွင့်ရှိသူက ပြောသည်။

စက်တင်ဘာလ ၁၀ ရက် ည ၁၂ နာရီခန့်က ကန်ပက်လက်မြို့နယ်၊ တိုက်နယ်အမှတ် – ၅ ထဲက ခါပန်းကျေးရွာကို စစ်ကော်မရှင်တပ်က ဂျက်ဖိုက်တာ ၁ စီးဖြင့် ပေါင် ၅၀၀ ဗုံး၊ ၂ လုံးကို အသုံးပြု၍ တိုက်ခိုက်ခဲ့ခြင်းဖြစ်သည်။

“ပြည်သူတွေကို အကြောက်တရားတွေ ရှိလာအောင် ပစ်မှတ်ထားပြီးမှ တိုက်ခိုက်တာလည်း ဖြစ်နိုင်သလို ရဲဘော်တွေ ရှိနေတယ် ထင်ပြီးမှ တိုက်ခိုက်တာလည်း ဖြစ်နိုင်ပါတယ်။ အဓိကက ပြည်သူတွေကို အကြောက်တရားဝင်အောင် လေကြောင်းကနေ ပြည်သူတွေကို ပစ်မှတ်ထား တိုက်ခိုက်မှု လုပ်နေတာလို့ ပြောချင်ပါတယ်” ဟု CDF – ကန်ပက်လက် ပြောရေးဆိုခွင့်ရှိသူက ပီတာသန်းရွှေက ပြောသည်။

လေကြောင်းတိုက်ခိုက်မှုကြောင့် ကျောင်းဆောင် ၂ ဆောင် ထိခိုက်ပျက်စီးသွားပြီး ဒေသခံပြည်သူ ၁ ဦးလည်း လက်မှာ မစိုးရိမ်ရ ဒဏ်ရ ရရှိသည်ဟု သိရသည်။

စစ်ကော်မရှင်သည် ကန်ပက်လက်မြို့ကို လက်လွတ်ဆုံးရှုံးရပြီးနောက် လေကြောင်းတိုက်ခိုက်မှုများ မကြာခဏ ပြုလုပ်သော ကြောင့် ဒေသခံများ ထိခိုက်သေဆုံးမှုတချို့ ရှိခဲ့ပြီး အစိုးရအခြေခံအဆောက်အဦးများ၊ လူနေအိမ်များ ထိခိုက်ပျက်စီးမှုများ ရှိသည်။

မကွေးတိုင်း၊ ယောဒေသအစပ်မှာ ရှိသည် ကန်ပက်လက်မြို့နယ်တစ်ခုလုံးကို ၂၀၂၄ ဒီဇင်ဘာလအတွင်းက CDF – ကန်ပက်လက်က စစ်ကောင်စီတပ်ထံမှ သိမ်းပိုက်ထိန်းချုပ်ပြီးနောက် မြို့အုပ်ချုပ်ရေးယန္တရာများနှင့် ပြန်လည်ထူထောင်ရေးလုပ်ငန်းများ ဆောင်ရွက် လျက်ရှိသည်။

လက်ရှိတွင် စစ်ကော်မရှင်တပ်များသည် ချင်း- မကွေးစပ်၊ ယောဒေသတွင် စစ်ရေးပြင်ဆင်စုဖွဲ့မှုများ လုပ်ဆောင်နေသောကြောင့် CDF – ကန်ပက်လက်သည်လည်း ကျည် ၂ သောင်း ကမ်ပိန်းကို စက်တင်ဘာလ ၈ ရက်မှစတင်၍ နိုဝင်ဘာလ ၈ ရက်အထိ သတ်မှတ် လုပ်ဆောင်လျက်ရှိသည်။