(006SV)
စစ်အာဏာသိမ်းပြီးနောက်ပိုင်း စစ်ကောင်စီ၏ အရပ်သားများအပေါ် ညှင်းပန်းနှိပ်စက်မှုများသည် ချင်းပြည်နယ်အပါအဝင် တနိုင်ငံလုံးတွင် တစ်နှစ်ထက်တစ်နှစ် ပိုမိုများပြားလာသည်ဟု ညီမျှခြင်းမြန်မာ၏ အစီရင်ခံစာက ဆိုသည်။
ညီမျှခြင်းမြန်မာ၏ “ညှင်းပန်းနှိပ်စက်ခွင့်လိုင်စင်?” ဟူသော အစီရင်ခံစာကို ယနေ့ စက်တင်ဘာလ ၁၈ ရက်က အွန်လိုင်းမှ ထုတ်ပြန်ခဲ့ပြီး စစ်အာဏာသိမ်းပြီးနောက် လပေါင်း (၃၀) အတွင်း နေ့စဉ်နှင့်အမျှ နည်းလမ်းမျိုးစုံဖြင့် အရပ်သားပြည်သူများကို ညှင်းပန်းနှိပ်စက်မှုများ ပိုမိုလုပ်ဆောင်လာသည်ဟု တာဝန်ရှိသူများက ပြောသည်။
ဒေသအလိုက် ဖြစ်ပွားမှုဖြစ်စဉ်တွင် စစ်ကိုင်းက အများဆုံးဖြင့် အမှုပေါင်း ၈၀၊ မကွေးက ၃၉၊ မန္တလေးက ၃၈၊ တနင်္သာရီက ၂၄၊ ရန်ကုန်က ၁၉၊ ပဲခူးက ၁၆၊ ကချင်က ၁၄၊ ဧရာဝတီက ၉၊ ရခိုင်က ၈၊ ကရင်က ၇၊ ချင်းက ၆၊ ကရင်နီက ၃၊ ရှမ်းမှာ ၂ မှုတို့ ရှိခဲ့သည်ဟု အစီရင်ခံက ဆိုသည်။
ချင်းပြည်နယ်တွင် အချက်အလက်စုဆောင်းမှု အခက်အခဲရှိခဲ့သောကြောင့် ဖြစ်စဉ် ၆ ခုသာ ကောက်ယူနိုင်ခဲ့သော်လည်း မြေပြင်တွင် ပိုမိုများပြားနိုင်သည်ဟု ညီမျှခြင်းမြန်မာက တာ၀န်ရှိသူ မခင်ငြိမ်းသက်က ပြောသည်။
“ချင်းပြည်နယ်မှာ ရွာတွေထဲကို စစ်ကြောင်းတွေဝင်တယ်။ ဝင်ပြီးသွားရင် လူတွေကို ဖမ်းတယ်။ ဖမ်းပြီးသွားရင် PDF လို့ အမည်တပ်တယ်။
များသောအားဖြင့်တော့ အသတ်ခံရသူတွေ များတယ်။ ချင်းပြည်နယ်က ၆ ကေစ့်ကလည်း ဖမ်းသွားတယ်။ အဲထဲမှာ အသတ်ခံရတဲ့ကေစ့်ပါတယ်။ ဖမ်းသွားတယ်။ ပျောက်ဆုံးသူတွေလည်းပါတယ်။ ဖမ်းသွားတယ်။ ထောင်ကျနေတဲ့သူတွေလည်း ပါတယ်။ နေရာပေါင်းစုံမှာတော့ ပုံသဏ္ဍာန်က အနည်းငယ်ပဲ ကွာခြားတယ်’’ ဟု မခင်ငြိမ်းသက်က ပြောသည်။
စစ်ကောင်စီ၏ အရပ်သားပြည်သူများကို ညှင်းပန်းနှိပ်စက်မှုများသည် ၂၀၂၁ ခုနှစ်တွင် ၅၄ မှု၊ ၂၀၂၂ ခုနှစ်တွင် ၉၅ မှုနှင့် ၂၀၂၃ နှစ်ဝက်အတွင်းတွင် ၁၁၈ မှုအထိရှိခဲ့ပြီး တစ်နှစ်ထက်တစ်နှစ် ပိုမိုများပြားလာကာ မြေပြင်တွင် ယခုထက် အများကြီး ရှိနိုင်သည်ဟု အစီရင်ခံစာကို ပြုစုသူများထဲမှ တစ်ဦးဖြစ်သူ မခင်ငြိမ်းသစ်က ပြောသည်။
ညှင်းပန်းနှိပ်စက်မှု ခံရသူများတွင် အမျိုးသားက ၆၅၄ ဦးဖြင့် အများဆုံးဖြစ်ပြီး အမျိုးသမီးက ၁၆၄ ဦး၊ အသက်မပြည့်သေးသည့် ကလေးငယ်များက ၃၈ ဦး၊ ၊ LGBT များက ၁၂ ဦးနှင့် ကျား/မ ခွဲခြားမသိသူက ၂၉၀ ဦးရှိသည်ဟု အစီရင်ခံစာက ဖော်ပြသည်။
“လူအခွင့်အရေး ချိုးဖောက်မှုကို ခံစားနေရတဲ့ ပြည်သူတွေ တရားမျှမှုကို ရရှိအောင် ဒီရီပို့က အထောက်အကူပြုမယ်လို့ ကျမယုံကြည်ပါတယ်။ ဒီရီပို့မှာ ၂၆၇ ကေစ့်မှာ စစ်ကိုင်းက အများဆုံး လက်ခံရရှိပါတယ်။ ဒုတိယအနေနဲ့ ကရင်နီဒေသရယ်၊ မကွေးနဲ့ မန္တလေးရယ်ကနေ ရရှိပါတယ်။ တတိယအနေနဲ့ကတော့ တနင်္သာရီနဲ့ ရန်ကုန်တို့ကနေ လက်ခံရရှိထားခြင်းဖြစ်ပါတယ်။ လူဦးရေး အများဆုံးက အမျိုးသားတွေဖြစ်တယ်။ ဒုတိယက အမျိုးသမီးတွေ၊ တတိယကကလေးများဖြစ်ပြီး LGBT များလည်း ပါဝင်ပါတယ်” ဟု ညီမျှခြင်းမြန်မာက တာဝန်ရှိသူက ပြောသည်။
အစီရင်ခံစာသည် စစ်ကောင်စီ၏ စစ်ကြောရေးစခန်း၊ ရဲစခန်း၊ အကျဉ်းထောင်နှင့် လက်နက်ကိုင် တိုက်ပွဲဖြစ်ပွားသော ဒေသက စစ်ကောင်စီ၏ ကျူးလွန်မှုဖြစ်ရပ် ၂၀၀ ကျော်ကို ကောက်ယူပြုစုထားခြင်းဖြစ်သည်။
စစ်ကောင်စီ၏ ကျူးလွန်မှုများနှင့် ပတ်သက်၍ ကုလသမဂ္ဂ၊ အာဆီယံ၊ အမျိုးသားညီညွတ်ရေးအစိုးရတို့ ရှေ့ဆက်လုပ်ဆောင်ရန် အကြံပြုတိုက်တွန်းချက် (၁၀) ချက်ကိုလည်း အစီရင်ခံစာတွင် ညီမျှခြင်းမြန်မာက ထည့်သွင်းဖော်ပြထားသည်။
