စစ်ကိုင်းတိုင်း တမူးမြို့က အမျိုးသမီးတစ်ဦး သတ်ခံရသည့် ဖြစ်စဉ်သည် စစ်ဘက်ဆိုင်ရာကျင့်ဝတ်နှင့် သွေဖည်ပြီး ကျူးလွန်သူ မည်သူမဆို အရေးယူမည်ဟု အမျိုးသားညီညွတ်ရေးအစိုးရက NUG က ဒီဇင်ဘာ ၅ ရက်နေ့က ထုတ်ပြန်လိုက်သည်။
အမျိုးသားညီညွတ်ရေးအစိုးရအနေဖြင့် အဆိုပါဖြစ်စဉ်အသေးစိတ်နှင့် ဖြစ်စဉ်အတွင်း ပြည်သူ့ကာကွယ်ရေးတပ်မတော်သားများ ပါဝင်ပတ်သက်ခြင်းရှိ/မရှိ စုံစမ်းစစ်ဆေးခြင်းလုပ်ငန်းများကို စစ်ဘက်ဆိုင်ရာ ဥပဒေများနှင့်အညီ လုပ်ဆောင်သွားရန် သက်ဆိုင်ရာ စစ်ရေးတာဝန်ရှိသူများအား ညွန်ကြားထားပြီဖြစ်သည်ဟု ဆိုပါသည်။
အဆိုပါဖြစ်စဉ်သည် စစ်ဘက်ဆိုင်ရာ ကျင့်ဝတ်စည်းကမ်းများအရ လုံးဝလက်သင့်မခံနိုင်သည့် ကိစ္စရပ်ဖြစ်သောကြောင့် ဖြစ်စဉ်နှင့်ပတ်သက်သည့် ကွင်းဆက်များကို စုံစမ်းဖော်ထုတ်သွားမည်ဖြစ်ပြီး ကျူးလွန်ခဲ့သူ မည်သူ့ကိုမဆို ဥပဒေနှင့်အညီ ထိရောက်စွာ အရေးယူမည်ဟု NUG ၏ ထုတ်ပြန်ချက်တွင် ဖော်ပြထားသည်။
တမူးမြို့တွင် ဒလန်ဟုဆိုသော အမျိုးသမီးတစ်ဦးကို ပြည်သူ့ကာကွယ်ရေးတပ်ဖွဲ့များက သတ်ဖြတ်ခဲ့သည့် ရုပ်သံဖိုင်သည် စစ်ကောင်စီနှင့်နီးစပ်သော တယ်လီဂရန်ချန်နယ်များတွင် ဒီဇင်ဘာ ၃ ရက်နေ့ ညပိုင်းက စတင်ပျံ့နှံ့လာခဲ့ရာ လူသုံးများသော Facebook လူမှုကွန်ရက်စာမျက်နှာပေါ်မှာပါ ပျံ့နှံ့လာကာ ဝေဖန်မှုအမျိုးမျိုး ထွက်ပေါ်လာခဲ့သည်။
အဲဒီဖြစ်စဉ်နှင့်ပတ်သက်၍ အမျိုးသားညီညွတ်ရေးအစိုးရအဖွဲ့က စုံစမ်းစစ်ဆေးမှုများဆောင်ရွက်ပြီး ယခုကဲ့သို့ ထုတ်ပြန်လာခြင်းလည်းဖြစ်သည်။
ပြည်သူ့ကာကွယ်ရေးတပ်ဖွဲ့ဝင်များအနေဖြင့် အကြမ်းဖက်မှုတိုက်ဖျက်ရေးနှင့် ပြည်သူ့ခုခံတွန်းလှန်စစ်ဆင်နွှဲရာတွင် စစ်ဘက်ဆိုင်ရာဥပဒေများ စစ်ရေးညွန်ကြားချက်များနှင့်အညီသာ စီမံဆောင်ရွက်ကြရန်လိုအပ်ပြီး စစ်ကောင်စီအနေဖြင့် ပြည်သူ့ကာကွယ်ရေးတပ်ဖွဲ့အား ၎င်းတို့ကဲ့သို့အကြမ်းဖက်မှုအား ပြုလုပ်နေသည်ဟု ပုံဖော်ရန်ကြိုးစားနေသည့် ထောင်ချောက်ထဲသို မကျရောက်မိစေရန် အထူးသတိချပ်ရမည်ဟု NUG ကဆိုသည်။
စစ်ကောင်စီတပ်ဖွဲ့မှ ကျူးလွန်နေသော စစ်ရာဇဝတ်မှုများ၊ လူမဆန်သောရက်စက်ကြမ်းကြုတ်မှုများကို အပြီးတိုင် အဆုံးသတ်နိုင်ရေး စစ်ရေးနည်းလမ်းဖြင့် တော်လှန်တိုက်ပွဲဝင်နေကြရသော်လည်း စစ်ကောင်စီတပ်ဖွဲ့ဝင်များကဲ့သို့ အသိတရားမဲ့ တရားလက်လွတ်ပြုကျင့်သူများ မဖြစ်စေရေးကိုလည်း ဂရုပြုကြရန် NUG က တိုက်တွန်းထားသည်။
ယခုဖြစ်စဉ်ကဲ့သို့သော ကိစ္စရပ်မျိုး နိုင်ငံတော်၏ မည်သည့်နေရာတွင်မှ ထပ်မံဖြစ်ပွားခြင်းမရှိစေရန် တာဝန်ယူမှု တာဝန်ခံမှုအပြည့်ဖြင့် ကွပ်ကဲကြပ်မတ်ဆောင်ရွက်သွားမည်ဟု NUG က ထုတ်ပြန်ချက်တွင် ဖော်ပြထားသည်။
