တီးတိန်မြို့ပေါ်တွင် ဝန်ထမ်းများအားလုံး မဖြစ်မနေ မဲပေးရမည်ဟု ဌာနဆိုင်ရာကအမိန့်ထုတ်ထား

(004SS)

စစ်ကော်မရှင်ကျင်းပမည့် ရွေးကောက်ပွဲတွင် ချင်းပြည်နယ်၊ တီးတိန်မြို့ရှိ ဌာနဆိုင်ရာ ဝန်ထမ်းများအားလုံး သည် မဖြစ်မနေ မဲပေးကြရန် အမိန့်ညွှန်ကြားချက်ထုတ်ပြန်ထားသည်ဟု ဒေသခံများထံမှ သိရသည်။

ဒီဇင်ဘာလ (၂၈) ရက်နေ့တွင် ပြုလုပ်မည့် ရွေးကောက်ပွဲအပိုင်း ၁ တွင် ဝန်ထမ်းတိုင်း ကိုယ်တိုင် မဲပေးကြရန်နှင့် မဲပေးရန် ပျက်ကွက်ပါက နောက်ဆက်တွဲပြသနာများကို ကာယကံရှင် ဝန်ထမ်းများကသာ ဖြေရှင်းရမည်ဟု လူမှု ကွန်ရက်တွင် ပျံ့နှံ့လာသော တီးတိန်မြို့နယ် ပြည်သူ့ကျန်းမာရေးဦးစီးဌာန၏ ရုံးအမိန့်စာတွင် ဖော်ပြထားသည်။

အဆိုပါ ထုတ်ပြန်ချက်တွင် ကျန်းမာရေးဝန်ထမ်းများအနေဖြင့် မဲပေးသည့်အခါ မိမိတို့၏ မှတ်ပုံတင်မူရင်း (ဝန်ထမ်းကဒ်) များကို မဖြစ်မနေ ယူဆောင်လာရန်နှင့် “အလေးအနက်” ထားကာ မဲပေးကြရန် ညွှန်ကြားထားခြင်းဖြစ်သည်။

မဲပေးရန် ပျက်ကွက်သူများအား အကာအကွယ်ပေးမည်မဟုတ်ဘဲ ဥပဒေကြောင်းအရဖြစ်စေ၊ အုပ်ချုပ်ရေးအရဖြစ်စေ ကြုံတွေ့လာရမည့် ကိစ္စရပ်များကို ကယကံရှင်ဝန်ထမ်းကိုယ်တိုင် ဖြေရှင်းရမည်ဟု ပါရှိသည်။

တီးတိန်မြို့ ဒေသခံအမျိုးသမီးတစ်ဦးက “ဒီလိုစာထုတ်တာ ဟုတ်ပါတယ်။ ဒါကတော့ ဆေးရုံဝန်ထမ်းတွေ အတွက်ပေါ့နော်။ တခြား ဌာနဆိုင်ရာအားလုံးလည်း မဖြစ်မနေ မဲပေးရမယ်လို့ သိရတယ်။ ပြည်သူတွေအတွက်တော့ အခြေအနေ မသိရသေးပေမဲ့ ရုံးတိုင်းကတော့ ပေးရမယ်လို့ ပြောနေကြတယ်” ဟု ပြောသည်။

လက်ရှိတွင် ဝန်ထမ်းများကို အဓိကပစ်မှတ်ထား၍ မဲပေးရန် ဖိအားပေးမှုများ ရှိနေသော်လည်း မြို့ပေါ်ရှိ အရပ်သား ပြည်သူများအား မဲပေးရန် တိုက်ရိုက်ဖိအားပေးမှုမျိုးတော့ ယနေ့အထိ မရှိသေးကြောင်း သိရသည်။

တစ်ဖက်တွင်လည်း ရွေးကောက်ပွဲအကြိုကာလအဖြစ် စစ်ကော်မရှင် လက်အောက်ခံ ရွေးကောက်ပွဲ ကော်မရှင် အဖွဲ့ဝင်များနှင့် တပ်ဖွဲ့ဝင်များသည် တီးတိန်မြို့ပေါ်ရှိ လူစည်ကားရာ လမ်းဇန်လမ်းခွဲတွင် ဆန်ပြုတ်စတုဒီသာ ကျွေးမွေးခြင်းများ ပြုလုပ်နေပြီး လမ်းသွားလမ်းလာအချို့ ဝင်ရောက်သုံးဆောင်မှုများ ရှိနေကြောင်းလည်း ဒေသခံများထံမှ သိရသည်။