ချင်းပြည်နယ်တောင်ပိုင်း ပလက်ဝမြို့နယ်မှာ ကျောင်းသူ၊ ကျောင်းသားတွေ လိုက်ပါလာတဲ့ စက်လှေတစ်စီးကို စစ်ကောင်စီတပ်က ပစ်ခတ်မှုကြောင့် ကျောင်းသား ၂ ဦးသေဆုံးပြီး ၃ ဦး ဒဏ်ရာရရှိခဲ့တယ်လို့ သိရပါတယ်။
ပလက်ဝမြို့နယ် တုံးမဝကျေးရွာအခြေခံပညာကျောင်းမှာ ကျောင်းတက်ပြီး ကုလားတန်မြစ်ကြောင်းအတိုင်းပြန်လာတဲ့ ရီမဝကျေးရွာက ကျောင်းသူ၊ ကျောင်းသားတွေ လိုက်ပါလာတဲ့ စက်လှေတစ်စီးကို ယနေ့ သြဂုတ်လ ၂ ရက်နေ့မှာ နှမတာကျေးရွာဆိပ်ကမ်းမှာ တပ်စွဲထားတဲ့ စစ်ကောင်စီတပ်ဖွဲ့က ပစ်ခတ်ခဲ့တာကြောင့် အသက် ၁၂ နှစ်အရွယ် ၅ တန်းကျောင်းသား ၂ ဦး သေဆုံးခဲ့တာလို့
ပလက်ဝမြို့က ဒေသခံတစ်ဦးက ပြောပါတယ်။
စစ်ကောင်စီတပ်ရဲ့ပစ်ခတ်မှုကြောင့် သေဆုံးသူတွေဟာ ရီးမဝကျေးရွာက အသက် ၁၂ နှစ်အရွယ် ၅ တန်းကျောင်းသား တွေဖြစ်ကြတဲ့ မောင်နေမင်းထွန်းနှင့် မောင်အောင်သန်းမြတ်တို့ ဖြစ်ကြပါတယ်။
ဒဏ်ရာရရှိတဲ့ ၃ ဦးကတော့ အသက် ၁၂ နှစ်အရွယ် ၅ တန်းကျောင်းသားနှင့်ကျောင်းသူ မောင်အောင်လင်းဝင်း (နောက်ကျောဒဏ်ရာ)၊ မခင်ကြည်အောင် (ခြေထောက်ဒဏ်ရာ) နှင့် အသက် ၅၄ နှစ်အရွယ် အထွေထွေဝန်ထမ်း ဦးပဒူး (ယာလက်မောင်းနဲ့ နားရွက်အနီးတဝိုက်ထိ) တို့ဖြစ်ကြတယ်လို့သိရပါတယ်။
အဲဒီစက်လှေမှာ ကျောင်းသူ၊ ကျောင်းသားအနည်းဆုံး ၁၀ ယောက်လောက်ပါလာတယ်လို့သိရပြီး ဒဏ်ရာရရှိတဲ့သူ ၃ ယောက်ဟာ ယနေ့ည ၇ နာရီခွဲလောက်မှာ ပလက်ဝမြို့ ပြည်သူ့ဆေးရုံကို ရောက်ရှိပြီလို့ သိရပါတယ်။
ယမန်နေ့ သြဂုတ်လ ၁ ရက်နေ့က နှမတာကျေးရွာအနီးတဝိုက်မှာ စစ်ကောင်စီတပ်နဲ့ ရက္ခိုင့်တပ်တော် (AA) တပ်ဖွဲ့တို့ တိုက်ပွဲဖြစ်ပွားခဲ့ကြပြီးနောက် ယနေ့မနက်ပိုင်းကစပြီး ကုလားတန်မြစ်ကြောင်းအတိုင်း သွားလာမှုကို စစ်ကောင်စီက လုံခြုံရေးတင်းကြပ်ကာ ခုလို ပစ်ခတ်သေဆုံးမှုတွေ ဖြစ်ပွားခဲ့တာလို့ သိရပါတယ်။
တုံးမဝနှင့် ရီးမဝကျေးရွာတို့ဟာ ကုလားတန်းမြစ်ရဲ့ အနောက်ဘက်ခြမ်းမှာတည်ရှိတဲ့ ကျေးရွာတွေဖြစ်ကြပြီး ပလက်ဝမြို့ကနေ စက်လှေနဲ့ တစ်နာရီလောက်သွားရတယ်လို့ သိရပါတယ်။
