ဖလမ်းမြို့သိမ်းစစ်ဆင်ရေးအတွင်း တော်လှန်ရေးပူးပေါင်းတပ်ဖွဲ့ဘက်မှ ရဲဘော် ၈၉ ဦးကျဆုံး

(004SS)

၅ လကြာဆင်နွှဲခဲ့ရသော ဖလမ်းမြို့သိမ်းတိုက်ပွဲအတွင်း တော်လှန်ရေးပူးပေါင်းတပ်ဖွဲ့မှ ရဲဘော်၊ရဲမေ ၈၉ ဦး ကျဆုံးပြီး ထက်ဝက်နီးပါးမှာ အိမ်ရှင်တပ်ဖွဲ့ဖြစ်သော CNO/CNDF မှ ရဲဘော်များဖြစ်ကြောင်း CNO/CNDF ပြောရေးဆိုခွင့်ရှိသူ ဆလိုင်းတင်မီက ပြောသည်။

“ဒီ ၈၉ ဦး ကျဆုံးတဲ့အထဲမှာ ကျွန်တော်တို့အိမ်ရှင် CNO/CNDF အနေဖြင့် ကျဆုံးသူ အယောက် ၄၀ ပါဝင်ပါတယ်။ ဒီ ထဲမှာမှ ကျန်းမာရေးဘက် တာဝန်ထမ်းဆောင်တဲ့ သူနာပြု ဆရာမ ၁ ဦး၊ သူနာပြု ဆရာ ၁ ဦး၊ ၂ ဦးလဲ ပါဝင်ပါတယ်” ဟု CNO/CNDF မှ ပြောရေးဆိုခွင့်ရှိသူ ဆလိုင်းတီမီက ပြောသည်။

ထို့အပြင် ကိုယ်လက်အင်္ဂါဆုံးရှုံးသူ ရဲဘော် အယောက် ၃၀ ဝန်းကျင်ရှိပြီး အခြား မစိုးရိမ်ရ ဒဏ်ရာရရှိသူ ရဲဘော် အယောက် ၅၀၀ ခန့်ရှိသည်ဟု ၎င်းကပြောသည်။

စစ်ဆင်ရေးအတွင်း ကျဆုံးခဲ့ရသော ရဲဘော်တချို့၏ ရုပ်အလောင်းများကို ၎င်းတို့နေရပ်အသီးသီးသို့ ပို့ဆောင်ပေးနိုင်ခြင်းရှိသလို အချို့မှာမူ မြေပြင်အခြေ အနေအရ ပို့ဆောင်ပေးနိုင်ခြင်းမရှိဘဲ ဖလမ်းမြို့တစ်နေရာတွင် ခေတ္တမြေမြုပ်ပေးထားကြောင်း သိရသည်။

“ကျွန်တော်တို့ တစ်ချို့က ခရီးဝေးပြီးတော့ ပို့ဖို့ရန် အဆင်မပြေတဲ့သူတွေပေါ့လေ၊ နောက်ပြီတော့ တစ်ချို့ကျွန်တော်တို့ CNO/ CNDF ဆိုရင် အိမ်ရှင်ဖြစ်တဲ့အတွက်ကြောင့် သူတို့ရွာတွေမှာ ပို့လို့ရတယ်၊ မိဘဆီ ပို့လို့ရတယ် ဆိုရင် အကုန်လုံး ပို့ပေးပါတယ်။ ပြီးတော့ နယ်ဝေးကနေလာပြီး ပို့ဖို့အဆင်မပြေတဲ့သူ နောက် မီးသဂြိုလ်လို့မရတဲ့သူတွေကိုတော့ ကျွန်တော်တို့ လောလောဆယ် ဒီမှာ မြုပ်နှံထားပါတယ်။” ဟု CNO/ CNDF ပြောခွင့်ရသူက ပြောသည်။

ယမန်နေ့ ဧပြီလ ၁၃ ရက်နေ့သည် CNO/CNDF တည်ထောင်ခြင်း ၄ နှစ်ပြည့်သည့် နေ့ဖြစ်သည့်အပြင် ယခုလသည် ဖလမ်းမြို့ အပြီးသိမ်းပိုက်နိုင်သည့် လဖြစ်ပြီး ထိုစစ်ဆင်ရေးအတွင်း အားလုံး၏ ပေးဆပ်မှုအပေါ် ကျေးဇူးတင်ကြောင်း ဆလိုင်းတီမီက ပြောသည်။

“ဒီ ၄ နှစ်တာကာလအတွင်း အသက်ပေးဆပ်ခဲ့ကြတဲ့ ရဲဘော်တွေ၊ ခန္ဓာကိုယ် ပေးဆပ်ခဲ့ရတဲ့ ရဲဘော်တွေ အကုန်လုံးကို လေးစာသလို အလေးနီပြုပါတယ်လို့ ပြောချင်ပါတယ်။ နောက်ပြီးတော့ ကျွန်တော်တို့ကို ဝိုင်းဝန်းထောက်ပို့ပေးကြတဲ့ မိဘ ပြည်သူများ၊ နိုင်ငံတကာရောက် ချင်းအမျိုးသားများ၊ CNDF supporter များ၊ CB supporter များ၊ ဒီကနေကျေးဇူး တင်ကြောင်း ပြောကြားချင်ပါတယ်” ဟု ဆလိုင်းတီမီကပြောသည်။

ချင်းညီနောင် စစ်ဆင်ရေးအဖြစ် ၂၀၂၄ ခုနှစ် နိုဝင်ဘာက ၉ ရက်နေ့ကစတင်ဖော်ဆောင်ခဲ့ကြသော ဖလမ်းမြို့သိမ်းစစ်ဆင် ရေးကို ၅ လပြည့်သည့် ၂၀၂၅ ခုနှစ် ဧပြီလ ၉ ရက်‌နေ့တွင် အောင်မြင်စွာသိမ်းပိုက်နိုင်ခဲ့ကြပြီး ဖလမ်းမြို့နယ်တစ်ခုလုံး စစ်ကောင်စီ ကင်းစင်သော နယ်မြေအဖြစ် ဖော်ဆောင်နိုင်ခဲ့ကြသည်။

ဖလမ်းမြို့သိမ်းတိုက်ပွဲကို ချင်းတော်လှန်ရေးအင်အားစုများဖြစ်သော ချင်းညီနောင်ပူးပေါင်းအဖွဲ့များ၊ အာရက္ခ တပ်တော် (AA/ ULA) ၏ စစ်ရေးအကြံဥာဏ်၊ ခဲယမ်းစစ်လက်နက်ပံ့ပိုးမှုနှင့်အတူ စစ်ကိုင်း၊ မကွေး တို့က တော်လှန်ရေးအင်အားစု (၁၇) ဖွဲ့တို့က ပူးပေါင်းပါဝင်တိုက်ခိုက်ခဲ့ကြခြင်းဖြစ်သည်။