(006SV)
ချင်းပြည်နယ်မြောက်ပိုင်းက ဖလမ်းမြို့သိမ်းစစ်ဆင်ရေးတွင် ယခုတပတ်တိုက်ပွဲများအတွင်း CDF – မင်းတပ်မှ ရဲဘော် ၁ ဦးနှင့် PDF – Zoland မှ ရဲဘော် ၁ ဦးတို့ ထိခိုက်ကျဆုံးမှုရှိခဲ့သည်ဟု သိရသည်။
ချင်းညီနောင်စစ်ဆင်ရေးအဖြစ် ဖော်ဆောင်နေသည့် ဖလမ်းမြို့သိမ်းစစ်ဆင်ရေးသည် လက်ရှိတွင် သုံးလကျော် ရှိလာပြီး မြို့ပေါ်ရှိ စစ်ကောင်စီစခန်းအားလုံးကို သိမ်းပိုက်ထားကာ နောက်ဆုံး ကျန်ရှိသည့် ခလရ – ၂၆၈ တပ်ကုန်းကို သိမ်းနိုင်ရန် ထိုးစစ်ဆင်နေချိန်မှာ ချင်းရဲဘော်တချို့ ထိခိုက်သေဆုံးမှုများ ထပ်မံ ထွက်ပေါ်လာခြင်းဖြစ်သည်။
“ဖလမ်းကတော့ လေကြောင်းပစ်ခတ်မှုတွေက နေ့တိုင်းရှိတယ်။ တိုက်ပွဲကလည်း ပြင်းထန်တဲ့အခြေအနေမှာ ရှိပါတယ်။ ရဲဘော်ကျဆုံးတွေကတော့ ဟုတ်ပါတယ်။ စစ်ပွဲဆိုတာကတော့ အဲလိုပါပဲ ရှိပါတယ်” ဟု CNDF ပြောရေးဆိုခွင့်ရှိသူ ဆလိုင်းတီမီက ပြောသည်။
CDF – မင်းတပ်၊ တပ်ရင်း ၆ က တပ်စုမှူး ဆလိုင်းလိန်းထန်းကီးသည် ဖလမ်းမြို့သိမ်းတိုက်ပွဲတွင် ပူးပေါင်းတိုက်ခိုက်နေရာ ဖေဖော်ဝါရီလ ၂၁ ရက်က စစ်ကောင်စီ၏ စနိုက်ပါကျည်ထိမှန်ပြီး ကျဆုံးခဲ့ရခြင်းဖြစ်သည်။
ကျဆုံးသွားသည့် ဆလိုင်းလိန်းထိန်းကီး၏ ရုပ်အလောင်းကို ဇာတိမင်းတပ်မြို့သို့ ပြန်လည်သယ်ယူရန် ခက်ခဲသောကြောင့် ဖလမ်းမြို့နယ် တနေရာမှာ သဂြိုလ်မည်ဟု သိရသည်။
တိုက်ပွဲအတွင်း နောက်ထပ်ရဲဘော်တဦးလည်း ထိခိုက်ဒဏ်ရာတချို့ ရရှိပြီး ဆေးကုသနေရသည်ဟု သိရသည်။
PDF- Zoland မှ ရဲဘော်တဦးဖြစ်သည့် Lian Hau Sum သည်လည်း ဖလမ်းမြို့ကို အပြီးသတ်သိမ်းနိုင်ရေး ထိုးစစ်ဆင် နေမှုအတွင်း ယခုရက်ပိုင်းမှာ ကျဆုံးသွားသည်ဟု PDF – Zoland မှ တာဝန်ရှိသူများက ပြောသည်။
PDF- Zoland မှ ရဲဘော်တဦးကျဆုံးမှုနှင့်ပတ်သက်၍ သတင်းထုတ်ပြန်မှု ပြုလုပ်ပြီးမှသာ အသေးစိတ်ဖြေဆိုနိုင်မည်ဟု ၎င်းကပြောဆိုသည်။
ဖလမ်းမြို့ မကျစေရန် စစ်ကောင်စီသည် ဇန်နဝါရီလက ရဟတ်ယာဉ်ဖြင့် နောက်ဆုံးကျန်ရှိနေသော ခလရ – ၂၆၈ တပ်ကုန်းကို စစ်ကူအင်အား ပေးပို့ထားပြီး လေကြောင်းပစ်ကူအများအပြားဖြင့် ခုခံနေကြောင်း၊ စစ်ကောင်စီနှင့် ချင်းပူးပေါင်းတပ် နှစ်ဖက် စလုံးတွင် ထိခိုက်ကျဆုံးမှုများ ရှိနေသည်ဟု သိရသည်။
ဖလမ်းမြို့သိမ်းစစ်ဆင်ရေးအတွင်း စစ်ကောင်စီလက်အောက်ခံ ရဲအရာရှိကြီးများအပါအဝင် စစ်သုံ့ပန်း ၁၀၀ ကျော် ဖမ်းဆီး ရမိထားပြီး နိုင်ငံတကာဥပဒေများအတိုင်း ထိန်းသိမ်းစောင့်ရှောက်ထားသည်ဟု CNDF က ထုတ်ပြန်ထားသည်။
လက်ရှိတွင် ဖလမ်းမြို့က စစ်ကောင်စီ၏ နောက်ဆုံးလက်ကျန် ခလရ ၂၆၈ တပ်ရင်းကို အပြီးသတ်သိမ်းနိုင်ရေး ချင်းတော် လှန်ရေးပူးပေါင်းတပ်များ ဆက်လက်တိုးစစ်ဆင်နေကြောင်း သိရသည်။
