မလေးရှားနိုင်ငံ ကွာလာလမ်ပူရ်မြို့တွင် ချင်းအမျိုးသားတစ်ဦးသည် သူ၏ ကလေး ၃ ယောက်နှင့်အတူ တံတားပေါ်မှခုန်ချ၍ ကိုယ့်ကိုကိုယ်အဆုံးစီရင်မှုတစ်ခု သြဂုတ်လ ၂ ရက်နေ့က ဖြစ်ပွားခဲ့သည်ဟု သိရသည်။
အသက် ၃၈ နှစ်အရွယ်ရှိဖြစ်သော ဦး Cholei သည် ကွာလာလမ်ပူရ်မြို့ MRR2 အဝေးပြေးလမ်းမ ဂုံးကျော်တံတားတွင် သူ၏ သားသမီး ၃ ယောက်ဖြစ်သော အသက် ၈ နှစ်အရွယ်သမီး Vadetisoh၊ အသက် ၆ နှစ်အရွယ်သား Vabiechose နှင့် အသက် ၃ နှစ်အရွယ် Shadrah Vabiechopha နှင့်အတူ ခုန်ချခဲ့ကြသည်ဟု သိရသည်။
မလေးရှားတွင်နေထိုင်သည့် ချင်းအမျိုးသားတစ်ဦးက “ဖခင်ဖြစ်သူက သာမန်လူလိုမဟုတ်ဘဲ စိတ်မမှန်သူလို့လည်းကြားရတယ်၊ သူ့မိန်းမပဲ အလုပ်လုပ်တယ်။ ဖခင်က အိမ်မှာ ကလေးထိန်းတယ်။ ည ၁၀ နာရီလောက်ကနေ ကလေးတွေနဲ့အတူ အိမ်ကနေထွက်သွားတာ မနက်ပိုင်းရောက်တော့ အခုလိုဖြစ်သွားတာပဲတွေ့ရတယ်” ဟု ပြောသည်။
ဦး Cholei သည် သူ့ကလေးငယ်များကို တံတားပေါ်မှ အရင်တွန်းချပြီးနောက် သူကိုယ်တိုင်းလည်း တံတားပေါ်မှ ခုန်ချကာ အဆုံးစီရင်လိုက်ခြင်းဖြစ်နိုင်သည်ဟု ယူဆရသည္။
အဆိုပါဖြစ်စဉ်ကြောင့် ဦး Cholei နှင့် သမီး Vadetisoh၊ သား Vabiechose တို့ အခင်းဖြစ်ရာနေရာတွင် သေဆုံးကာ အငယ်ဆုံးသာမှာမူ ဒဏ်ရာအပြင်းအထန်ရရှိကာ Selayang ဆေးရုံ ICU တွင် ကုသမှုခံယူလျှက်ရှိကြောင်း သိရသည်။
ဦး Cholei သည် ချင်းပြည်နယ် ထန်တလန်မြို့နယ် မီးဖူ(စ်)ဂိုတလာ (Meisakotla) ကျေးရွာတွင်နေထိုင်သော မရာချင်းလူမျိုးတစ်ယောက်ဖြစ်သည်ဟု သိရသည်။
