အိန္ဒိယနိုင်ငံအရှေ့မြောက်ဒေသ မီဇိုရမ်ပြည်နယ်တွင် လွန်ခဲ့သည့် ၃ ရက်အတွင်းမှာ ရူပီးသိန်း ၃၀ ကျော် တန်ဖိုးရှိသည့် ဘိန်းဖြူများကို မြန်မာနိုင်ငံသားတစ်ဦးအပါအဝင် လူ ၈ ဦးထံမှ ဖမ်းဆီးရမိသည်ဟု မီဇိုရမ်ပြည်နယ် မူးယစ်တိုက်ဖျက်ရေးဌာနက ထုတ်ပြန်သည်။
ပြီးခဲ့သည့် စနေနေ့ ဇူလိုင် ၃၀ ရက်နေ့က ကျန်ဖိုင်းခရိုင် Hnahlan ကျေးရွာတွင် ရူပီး ၆ သိန်းခန့်တန်ဖိုးရှိသော ဘိန်းဖြူ ၅၀၀ ဂရမ်ကို မြန်မာနိုင်ငံသားတစ်ဦးထံမှ ဖမ်းဆီးရမိခဲ့ကြောင်း Mizoram News သတင်းတွင်ဖော်ပြသည်။
ထို့အပြင် ဇူလိုင်လ ၂၈ ရက်နေ့ကလည်း မာမစ်ခရိုင် Dapchhuah ကျေးရွာတွင် ရူပီး ၂၃ ဒသမ ၄ သိန်း ကျော်တန်ဖိုးရှိသော ဘိန်းဖြူ ၂.၈၅ ကီလိုဂရမ်ကို တြိပူရပြည်နယ်သား သုံးဦးနှင့် အာသံပြည်နယ်သား နှစ်ဦးထံမှ ဖမ်းဆီးခဲ့ကြပြီး မူးယစ်ဆေးဝါးများ သယ်ဆောင်ရာတွင် အသုံးပြုသည့် ယာဉ်တစ်စီးကိုလည်း သိမ်းဆည်းရမိခဲ့သည်ဟု သိရသည်။
အလားတူ ဇူလိုင် ၂၇ ရက်နေ့ကလည်း ရူပီး ၁ ဒသမ ၈ သိန်းတန်ဖိုးရှိ ဘိန်းဖြူ ၁၅၄ ဂရမ်ကို အိုင်ဇောလ်မြို့ ရပ်ကွက်တစ်ခုတွင် အမျိုးသမီးတစ်ဦးအပါအဝင် လူနှစ်ဦးထံမှ ဖမ်ဆီးရမိခဲ့ပြီး ၎င်းတို့အားလုံး မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ အက်ဥပဒေ 1985 ပုဒ်မများဖြင့် အမှုဖွင့်ထားကြောင်း Mizoram News သတင်းတွင် ဖော်ပြထားသည်။
မီဇိုရမ်ပြည်နယ်တွင် ယခုရက်ပိုင်းအတွင်း မူးယစ်ဆေးဝါး (အထူးသဖြင့် ဘိန်းဖြူ) ဖမ်းဆီးမှု မကြာခဏရှိခဲ့သည်။
ဘိန်းဖြူအများစုသည် အိန္ဒိယ-မြန်မာနယ်စပ်ဘက်မှ ဝင်ရောက်လာခြင်းဖြစ်သည်ဟု ယူဆရပြီး ဘိန်းဖြူဖမ်းဆီးမှုအများစုမှာ မြန်မာနိုင်ငံသားများ ပါဝင်လေ့ရှိကြသည်။
ထို့အကြောင့် ချင်းလက်နက်ကိုင်အဖွဲ့အစည်းများကလည်း မြန်မာနိုင်ငံသားများအနေဖြင့် မီဇိုရမ်ပြည်နယ်အတွင်းသို့ မူးယစ်ဆေးဝါးများ သယ်ယူရောင်းချခြင်းမပြုရန် ပြင်းပြင်းထန်ထန် သတိပေးထုတ်ပြန်ခဲ့သည်။
