မြန်မာငလျင်ဘေးဒဏ်သင့် လူထုကို ကူညီရန် အိန္ဒိယရေတပ်သင်္ဘော ၂ စင်း ရန်ကုန်ရောက်

အိန္ဒိယ ရေတပ်သင်္ဘော ၃ စင်းလည်း ရန်ကုန်သို့ ဦးတည်လာနေ

(006SV)

ငလျင်ဘေးဒဏ်သင့် မြန်မာလူထုကို ကူညီထောက်ပံ့နိုင်ရန် အိန္ဒိယရေတပ် သင်္ဘော ၂ စင်းသည် လူသားစာနာမှု အကူအညီပစ္စည်များ တန်ချိန် ၅၀ ကျော် တင်ဆောင်၍ ရန်ကုန်မြို့ကို ရောက်ရှိလာပြီး နောက်ထပ် သင်္ဘော ၃ စင်းသည်လည်း ကူညီထောက်ပံ့နိုင်ရန် လာနေပြီဖြစ်ကြောင်း အိန္ဒိယသံရုံးကက ထုတ်ပြန်သည်။

မတ်လ ၃၁ ရက် ညပိုင်းက INS Satpura နှင့် INS Savitri အမည်ရသော အိန္ဒိယရေတပ် သင်္ဘော ၂စီးသည် လူသားချင်စာနာမှု အကူအညီပစ္စည်းများ တန်ချိန် ၃၁ တန်နှင့် ၁၉ တန်တို့ကို အသီးသီးတင်ဆောင်၍ ရန်ကုန်ကို ရောက်လာသည်ဟု အိန္ဒိယသံရုံးက မတ်လ ၃၁ ရက် ညပိုင်းက ထုတ်ပြန်သည်။

ယင်း ရေတပ် သင်္ဘော ၂ စီးမှ ပစ္စည်းများကို ရန်ကုန်၊ သီလဝါဆိပ်ကမ်းမှတဆင့် ငလျင်ဘေးဒဏ်သင့် ဒေသများကို ခွဲဝေဖြန့်ဖြူးနိုင်ရေး ဆောင်ရွက်နေသည်ဟု သိရသည်။

ထို့အပြင် Karmukh ၊ Gharial နှင့် LCU – 52 အမည်ရသော အိန္ဒိယရေတပ် သင်္ဘော ၃ စီးသည်လည်း လူသားချင် စာနာမှု အထောက်အပံ့ အကူအညီ ပစ္စည်းများ မက်ထရစ်တန် ၅၀၀ ကျော်ကို တင်ဆောင်ပြီး ရန်ကုန်ကို ဦးတည်လာနေပြီဖြစ်ကြောင်း အိန္ဒိယသံရုံး၏ သတင်းထုတ်ပြန်ချက်တွင် ဖော်ပြထားသည်။

ယနေ့ ဧပြီလ ၁ ရက်မှာလည်း ကူညီကယ်ဆယ်ရေး၊ ထောက်ပံ့ရေး ပစ္စည်းများ တန်ချိန် ၁၅ တန် တင်ဆောင်လာမည့် အိန္ဒိယလေတပ်မှ C -130 လေယာဉ်သည်လည်း မန္တလေး လေဆိပ်ကို တိုက်ရိုက်ဆင်းသက်ပြီး ကူညီကယ်ဆယ်ရေး၊ ထောက်ပံ့ရေးလုပ်နိုင်ရန် ဆောင်ရွက်နေသည်ဟု သိရသည်။

အင်ဒို- ပစီဖိတ်ဒေသတွင်း အားလုံး လုံခြုံရေးနှင့် ဖွံ့ဖြိုးရေး (SAGAR)၊ အရှေ့မျှော်အက်ဥပဒေ၊ အိမ်နီးချင်းဦးစာပေး မူဝါအရ မြန်မာငလျင်ဘေး ကူညီကယ်ဆယ်ရေး၊ ထောက်ပံ့ရေးကို ‘Operation Brahma’ အစီအစဉ်ဖြင့် မတ်လ ၂၉ ရက်တည်းက အိန္ဒိယအစိုးရက ဆောင်ရွက်နေခြင်းဖြစ်သည်။

ငလျင်ဘေးဒဏ်သင့်ဒေသများအတွက် အိန္ဒိယအစိုးရက အမျိုးသားသဘာဝဘေးအန္တရာယ်တုံ့ပြန်ရေးတပ်ဖွဲ့ (National Disaster Response Force) ၊ ကျန်မာရေး စောင့်ရှောက်မှုအဖွဲ့အပါအဝင် အိန္ဒိယကယ်ဆယ်ရေးအဖွဲ့များကို စေလွှတ်ထားသည်ဟု သိရသည်။

မြန်မာငလျင်ဘေးကူညီရန်အတွင် အိန္ဒိယလေတပ်မှ စစ်လေယာဉ် ၆ စီး၊ စစ်သင်္ဘော ၅ စီးတို့ဖြင့် လူသားချင်းစာနာမှု အထောက်အပံ့ပစ္စည်းအများအပြားကို ရန်ကုန်၊ နေပြည်တော်၊ မန္တလေးတို့တွင် ဆင်းသက်ပြီး ပေးပို့ထားသည်ဟု သိရသည်။