အိန္ဒိယ-မြန်မာနယ် အမှတ် ၂ နယ်စပ်ကုန်သွယ်ရေးခစန်း အခြေစိုက်ရာ ချင်းပြည်နယ် ဖလမ်းမြို့နယ် ရိခေါဒါရ်မြို့မှာ ယနေ့မနက်ပိုင်းကဖြစ်ပွားတဲ့တိုက်ပွဲအတွင်း စစ်ကောင်စီဘက်က တပ်ရင်းမှူး ဒု-ဗိုလ်မှူးကြီး ဝေမျိုးပိုင်အပါအဝင် ၅ ဦးသေဆုံးပြီး ဒဏ်ရာရရှိသူ အများအပြားရှိခဲ့တယ်လို့ သိရပါတယ်။
ရိခေါဒါရ်မြို့ အမှတ် ၂ ရပ်ကွက် (တီအို) တောင်ထိပ်မှာ တပ်စွဲထားတဲ့ စစ်ကောင်စီတပ်ဖွဲ့ကို ချင်းကာကွယ်ရေးပူးပေါင်းတပ်ဖွဲ့တွေက ယနေ့နက်ပိုင်း ၂ နာရီကနေ သွားရောက်ပစ်ခတ်တိုက်ခိုက်ခဲ့ကြတာဖြစပြီး မနက်ပိုင်း ၇ နာကျော်ကျော်လောက်အထိ အပြန်အလှန် ပစ်ခတ်တိုက်ခိုက်မှု ဖြစ်ပွားခဲ့ကြဖြစ်ပါတယ်။
အဲဒီတိုက်ပွဲမှာ စစ်ကောင်စီဘက်က ၅ ဦးသေဆုံးပြီး ၄ ဦးကတော့ တပ်စခန်းကနေ လက်နက်မပါဘဲ ထွက်ပြေးလာကြပြီး ချင်းကာကွယ်ရေးတပ်ဖွဲ့တွေထံ အလင်းဝင်ရောက်ခဲ့တယ်လို့ သိရပါတယ်။
ယနေ့မနက်ပိုင်း တိုက်ပွဲနဲ့ပတ်သက်ပြီး PDF-Zoland တပ်ဖွဲ့ရဲ့ ပြောရေးဆိုခွင့်ရှိသူက “ကျနော်တို့ ဒီကနေ့ အိန္ဒိယ-မြန်မာနယ်စပ် ရိအခြေစိုက်တပ်စခန်းကို ကျနော်တို့ ပူးပေါင်းတပ်ဖွဲ့က သွားပြီးတော့ တိုက်ခိုက်တာပါ သူတို့ထဲက ၅ ယောက်ကျဆုံးတယ်လို့ သိရတယ် ထွက်ပြေးတာတော့ ၄ ယောက်ထွက်ပြေးတယ်၊ ဒဏ်ရာရတာတော့ အများကြီးရှိတယ်လို့ပြောတယ်” လို့ သူကပြောပါတယ်။
ရိခေါဒါရ်မြို့မှာ အမှတ် ၁ နဲ့ အမှတ် ၂ ရပ်ကွက် ၂ ခုရှိပြီး စစ်ကောင်စီတပ်ဖွဲ့တွေဟာ မြို့ရဲ့အချက်အချာကျတဲ့ တောင်ကုန်း ၂ နေရာမှာ စခန်းချတပ်စွဲနေကြတာဖြစ်ပြီး ချင်းကာကွယ်ရေး ပူးပေါင်းတပ်ဖွဲ့တွေဖြစ်တဲ့ CDM-Siyin၊ PDF-Zoland, CNDF နဲ့ MEDF တပ်ဖွဲ့တွေက အမှတ် ၂ ရပ်ကွက် တောင်ထိပ်မှာတပ်စွဲထားတဲ့စခန်းကို သွားရောက်တိုက်ခိုက်ခဲ့ကြတာဖြစ်ပါတယ်။
အဲဒီတိုက်ပွဲမှာ ရိခေါဒါရ်မြို့အမှတ် ၁ ရပ်ကွက် တောင်ထိပ်မှာတပ်စွဲထားတဲ့ စစ်ကောင်စီတပ်စခန်းကနေ လက်နက်ကြီးတွေနဲ့ အကြိမ်ကြိမ်ပစ်ကူခဲ့တာကြောင့် အမှတ် ၂ ရပ်ကွက်ထဲက လူနေအိမ်တစ်လုံးပေါ် ကျရောက်ပေါက်ကွဲပြီး အရပ်သားပြည်သူတစ်ဦး သေဆုံးခဲ့သလို ၂ ဦး ပြင်းထန်ဒဏ်ရာရရှိခဲ့တယ်လို့လည်း သူကဆက်ပြောသည်။
“သူတို့တောင်ကုန်းပေါ်ကနေ လှမ်းပစ်လိုက်တဲ့ အမြောက်ကျည်ဆံတွေက အရပ်သားနေတဲ့ရပ်ကွက်ထဲကိုကျပြီးတော့ ၂ ယောက်ပြင်းပြင်းထန်ထန် ဒဏ်ရာရတယ် တယောက်ကတော့ သေတယ်လို့ပြောတယ်” လို့ PDF-Zoland ပြောရေးဆိုခွင့်ရှိသူက ပြောပါတယ်။
သေဆုံးသူဟာ ကလေးမြို့မွန်းလိုင်ရပ်ကွက်တွင်နေထိုင်သူဟုသိရပါတယ်။
ရိခေါဒါရ်မြို့မှာ တိုက်ပွဲဖြစ်ပွားပြီးနောက် မနက်ပိုင်း ၉ နာရီဝန်းကျင်လောက်ကနေ စစ်ကောင်စီတပ်ရဲ့ တိုက်ခိုက်ရေ လေယာဉ် ဂျက်ဖိုက်တာတစ်စီး ရိခေါဒါရ်မြို့နဲ့ ဟိုင်မွှလ်ရွာသစ်ပေါ်ကို အနည်းဆုံး လေးကြိမ်လောက် ပျံဝဲခဲ့တယ်လို့လည်း သိရပါတယ်။
ယနေ့ နေလည်ပိုင်းမှာတော့ တိုက်ပွဲဖြစ်ပွားမှုမရှိတော့ဘဲ အခြေနေတည်ငြိမ်သွားတယ်လို့ သိရပေမယ့် ရိခေါဒါရ်မြို့ အမှတ် ၂ ရပ်ကွက်က ပြည်သူအများစုကတော့ တဖက် အိန္ဒိယနိုင်ငံ မီဇိုရမ်ပြည်နယ် ဇိုခေါထာရ်ကျေးရွာဘက်ကို ထွက်ပြေးတိမ်းရှောင်နေကြရတယ်လို့ သိရပါတယ်။
