(005MK)
အိန္ဒိယ-မြန်မာနယ်စပ် မီဇိုရမ်ပြည်နယ် ရှာဟာခရိုင်ထဲမှာ အာသံရိုင်ဖယ်တပ်ဖွဲ့က မြန်မာနိုင်ငံသားတစ်ဦးထံ Walkie Talkie စကားပြောစက်အလုံး ၁၀၀ ဖမ်းဆီးရမိသည်ဟု သိရသည်။
ဖေဖော်၀ါရီလ ၁၀ ရက်နေ့က မြန်မာဘက်ကိုပို့ဆောင်မည်ဟု ယူဆရသော အဆိုပါစကားပြောစက်များကို ရှာဟာခရိုင် Siahatlang လမ်းဆုံတွင် အာသံရိုင်ဖယ်တပ်ဖွဲ့က စစ်ဆေးရှာဖွေရာမှာ ကားတစ်စီးပေါ်ကနေ ဖမ်းဆီးရမိခဲ့ခြင်းဖြစ်သည်ဟု မီဇိုရမ်ဒေသတွင်းသတင်းမှာ ဖော်ပြသည်။
ဖမ်းဆီးရမိသော ပစ္စည်းများမှာ UV-10R (Walkie Talkie စကားပြောစက်အလုံး ၁၀၀)၊ ဘက်ထရီအလုံး ၁၀၀၊ အားသွင်းစက် (Charging set) အလုံး ၁၀၀ ဖြစ်ပြီး တန်ဘိုးအားဖြင့်ရူပီးငွေ ၂ သိန်းခန့်ရှိသည်ဟု သိရသည်။
အဆိုပါစက်ပစ္စည်းများနှင့်အတူ ချင်းပြည်နယ် ဟားခါးမြို့နယ်က အသက် ၃၈ နှစ်အရွယ် Chungtu ဆိုသူကို ဖမ်းဆီးကာ ရဲတပ်ဖွဲ့ထံ လွှဲပြောင်းခဲ့သည်ဟု သိရသည်။
