(002MG)
စစ်ကိုင်းတိုင်း၊ ကလေးမြို့နယ်တောင်ပိုင်းဒေသတွင် ဖြစ်ပွားနေသော တိုက်ပွဲအတွင်း စစ်ကောင်စီကနေ့စဉ်ရက်ဆက် ဗုံးကြဲတိုက်ခိုက်မှုကြောင့် ကလေး -ဂန့်ဂေါကြားက ၆၆ ကေဗွီလျှပ်စစ်ဓာတ်အားလိုင်းထိခိုက်ပျက်စီးသွားပြီး ကလေး မြို့တွင် လျှပ်စစ်မီးပြတ်တောက်နေသည်မှာ ၅ ရက် ရှိသွားပြီဟု သိရသည်။
ကလေးမြို့ခံတဦးက ” မီးပျက်တာကြာပြီလေ တောင်ပိုင်းရွာတွေကို ဗုံးကြဲတော့ တာဝါတိုင်ထိတာလား၊ မီးကြိုး တွေပျက်တာလား သူတို့မပြင်နိုင်ဘူးလေ၊ ပြင်လို့လည်းမရဘူး။ ဗုံးကြဲနေတာ၊ အမြောက်တွေထု စစ် တွေဖြစ် နေတာဆိုတော့ လေယာဉ်နဲ့ ဗုံးကြဲပြီးထိလို့ အဲ့လိုမျိုးပျက်သွားတာလို့ကြားတယ် အနည်းဆုံး ၄၊၅ ရက်ရှိ ပြီ။ ကလေးမြို့ပဲမဟုတ်ဘူး၊ ကလေးဝလည်းမရဘူး” ဟု ပြောသည်။
ကလေးတောင်ပိုင်းဒေသ ကလေး-ဂန့်ဂေါကြားကားလမ်းမပေါ်မှာ ဖေဖော်ဝါရီလ ၁၁ ရက်နေ့ကစ၍ စစ်ကောင်စီ၊ ပျူစောထီး နှင့် တော်လှန်ရေးပူးပေါင်းတပ်ဖွဲ့များအကြား တိုက်ပွဲအပြင်းအထန်ဖြစ်ပွားခဲ့ပြီး စစ်ကောင်စီက လေကြောင်းဖြင့် အပြင်းအထန်ဗုံးကြဲတိုက်ခိုက်ခဲ့သည်။
ထိုကဲ့သို့ ဗုံးကြဲတိုက်ခိုက်မှုကြောင့် ကလေး-ဂန့်ဂေါကြားရှိ ၆၆ ကေဗွီလျှပ်စစ်ဓာတ်အားလိုင်းသည် ဖေဖော်ဝါရီလ (၁၄) ရက်နေ့က စတင်ပြတ်တောက်သွားပြီး လျှပ်စစ်မီးပြန်လည်ရရှိနိုင်မည့်အခြေအနေမှာမသေချာကြောင်း ကလေးမြို့ လျှပ်စစ်ရုံးတာဝန်ရှိသူက ၎င်း၏ လူမူကွန်ရက်တွင် အသိပေး ဖော်ပြထားသည်။
“၆၆ ကေဗွီ Line Fault က ကလေး-ဂန့်ဂေါကြားဖြစ်နေတာပါ၊ ဖြစ်တဲ့နေရာအတိကျတောင် သေချာမသိရသေးပါဘူး၊ ဖြစ်တဲ့နေရာသေချာသိမှ ပြင်ဆင်မှုအပိုင်းက လုပ်ရာမှာပါ ရှေ့ဆက်ကြာဦးမယ့်သဘောပါပဲ” ဟု လျှပ်စစ်ရုံးတာရှိက လူမှုကွန်ယက်တွင်အသိပေးထားသည်။
ယခု ၂၀၂၅ နှစ်သစ်မှစတင်ကာ ကလေးမြို့ပေါ်တွင် လျှပ်စစ်မီးကို ပုံမှန်အားဖြင့် ည (၈) နာရီမှ မနက်ပိုင်း (၅) နာရီ အချိန်အတွင်းသာ ဖြန့်ဝေလေ့ရှိသည်ဟု သိရသည်။
ကလေးမြို့နယ်တောင်ပိုင်းတွင် စစ်ကောင်စီသည် ဇန်နဝါရီလကုန်ပိုင်းမှစတင်ကာ လေကြောင်းဗုံးကြဲတိုက်ခိုက် နေသောကြောင့် အရပ်သားပြည်သူသေဆုံးမှုများ၊ နေအိမ်ထိခိုက်ပျက်စီးမှုများကြုံတွေ့ရနေရသည့်အပြင် အနည်းဆုံး ကျေးရွာ ၁၀ ရွာက လူဦးရေတစ်သောင်းကျော် စစ်ဘေးရှောင်နေကြရသည်။
